Vítima Dezastre Natural Lahane Oriental Seidauk Hetan Apoiu, Labele Birokrasia Demais

SAPNewsTL, Dili – Komunidade Uma kain Lima iha Suku Lahane Oriental, Postu-Administrativu Nain Feto, Munisipiu Dili ne’ebe sofre ba dezastre naturais iha fulan Dezembru 2022 no iha fulan janeiru 2023 ne’e seidauk hetan materiál ekipamentu hodi bele halo kontrusaun ba sira nia uma.

“Uma kain lima sai vitima ba dezastre natural ne’ebe akontese iha fulan kotuk mak hetan ona apoiu emerjensia ai-han de’it husi protesaun sivil, maibe seidauk hetan material atu bele halo kontrusaun ba sira nia uma, uma kain lima ne’e uma kain rua husi aldeia Temporal ho aldeia Tuba Rai, familia sira ne’e la evakua ba fatin seluk maibe balun ne’ebe uma la iha aproveita sira tenke tahan hodi hela hamutuk ho viziñu nia uma no vitima balun prega rasik sira nia uma hodi bele fó espasu ba sira nia moris”, dehan Xefi Suku Lahane Oriental ba jornalista sira iha edifisiu administrasaun munisipiu Dili, (18/01/ 2023).

Autoridade Komunitariu ne’e informa, Bainhira dezastre ne’e akontese nia kontaktu kedas ho autoridade protesaun Sivil inklui nia rasik to’o kedas iha fatin akontesimentu, entre vitima sira ne’e aldeia tolu hanesan aldeia Sare, aldeia Rai Mean no Aldeia Suhu Rama mak seidauk hetan atendimentu husi protesaun sivil.

Enkuantu, Nia husu ba Governu tenke tau matan ho lalais ba povu ne’ebe sofre husi dezastre naturais ne’e labele birokrasia demais, tanba sira tuur iha Parlamentu Nasional ne’e ne’e povu mak hili, la’os sira na’in mesak ba tuur iha Parlamentu Nasional, nune’e la’os ko’alia kona-ba politiku no kor partidu nian maibe tenke haree mos ba situasaun sira ne’ebe povu infrenta.

Jornalista : Antonio Tilman