PCIC & MP Du’un Malu, Familia Bernardo Husu Orgaun Soberanu Kria Komisaun Independente
Komunikadu Imprensa husi Familia Matebian Benardo de J. Soares iha hotel Luz Clarita Bairro Formosa, Dili tersa 24/01/2023.
SAPNewsTL, Dili: Familia Matebian Benardo de J. Soares husu orgaun soberanu Prezidente Republika, Primeiru Ministru, Parlamentu Nasional ho Tribunal Rekursu kria komisaun independente halo investigasaun klean ba kazu mate iha sela laran PNTL, Caicoli nian tanba kazu refere Polisia Cientifika Investigasaun Criminal (PCIC) ho Ministériu Publiku MP du’un malu hela .
“Ami nia respeitu tomak, ami hakarak husu urujente tebes orgaun soberanu Prezidente Republika Jose Manuel Ramos Horta, Primeiru Ministru Taur Matan Ruak, Prezidente Parlamentu Nasional Aniceto Guterres, Prezidente Tribunal Rekursu Deolindo da Costa hamutuk ho Xanana Gusmão atu kria komisaun independente hodi investiga kazu matebian Jose Bernardo de Jesus Soares nian ne’ebe mate iha sela laran iha PNTL Caicoli, Dili iha loron 1 fulan setembru 2022 iha tuku 07:20 kalan ne’ebe ema hotu hatene”, Porta voz familia matebian Moreno Liberto Oliveira da Costa ba jornalista sira liu husi konferensia imprensa iha hotel Luz Clarita Bairro Formosa, Dili tersa 24/01/2023.
Portavoz hatutan, sira nu’udar juventude Timoroan hotu hakarak hato’o sira nia insatifasaun ba kazu Matebian Jose Bernardo de Jesus Soares nian ne’ebe sai hanesan kazu dahuluk iha Timor-Leste tanba mate iha sela laran PNTL nian tan ne’e sira husu ba orgaun soberanu hodi aselera kazu para hetan lais nia naroman tanba kazu ne’e halo familia lakon fiar ba PNTL, bainhira tan mak joven barak mate iha polisia nia liman hodi loke orgaun soberanu sira nia matan hodi hapara PNTL sira nia attitude ne’ebe sai fali inimigu ba joven sira
Moreno mos husu ba orgaun soberanu haat hamutuk ho Xanana Gusmão aselera investigasaun detallu labele halo sai fali arkivu hodi fo lialos ho prova ba familia tanba kazu komesa lian atu lakon ona, husu mos ba joven sira kumu liman hamutuk kontra injustisa, portantu nia husu ba PNTL atu hatene nia obrigasaun nu’udar protetor no salvador servi povu laos sai fali inimigu ba joven sira iha nasaun Timor-Leste.
Iha fatin hanesan familia matebian Estelio Antonio de Jesus Soares hatete, sira ba husu rezultadu investigasaun iha PCIC ho Ministériu Publiku maibe sira du’un malu
“Ami familia ba husu rezultadu investigasaun iha PCIC ho Ministeriu Publiku maibe sira du’un malu ne’ebe ami ba ministeriu publiku dehan kazu sei iha PCIC seidauk lori mai Ministeriu Publiku”, tenik Estelio
Estelio aumenta tan, antes ne’e mos PNTL informa mai familia depois Jose Bernardo de Jesus Soares mate sira informa liu tiha loron 60 rezultadu investigasaun sai ona maibe atu tama fulan lima ona maibe rezultadu seidauk iha tan ne’e parte familia sei ezizi nafatin para to’o hetan lialos.
Reportajen: Augusto dos Santos & Antonio Altamiraldo