Halo Lansamentu Ofisial, KI Fo Parabens Ba Mídia SAPNewsTL
![](https://sapnewstl.com/wp-content/uploads/2023/02/Espedito-Dias.jpg)
Imajem Diskursu Membru Konselleiru Konsellu Imprensa (KI) Espedito Dias Ximenes iha Salaun INAP, I.P, DIli, 24/02/2023. Foto : John Marito
SAPNewsTL, Dili: Konsellu Imprensa (KI) fo Parabens ba media SAPNewsTL tanba halo lansamentu ofisial ne’ebe sei fortifika papel media nian ba prosesu konstrusaun estadu Timor-Leste nian iha area informasaun bazeia ba artigu 40 no 41 konstituisaun RDTL kona-ba ba liberdade imprensa no expresaun nian.
“KI hato’o Parabens ba Midia SAPNewsTL ne’ebe ita ohin halo lansamentu ofisial, ha’u reprezentante KI sente ksolok prezensa SAPNewsTL sei fortifika liu tan papel media nian iha prosesu konstrusaun estadu iha area informasaun nian hein katak SAPNewsTL sei atensaun ba informasaun hoax no informasaun falsu sira hodi fo notisia kredivel ba publiku sira tanba iha era dijital agora ema se deit bele fo informasaun ho telefone deit laos media deit maibe KI fiar SAPNewsTL nia publikasaun sei tuir kode etika jornalizmu eziste iha Timor-Leste nian”, Dehan Reprezentante KI Expedito Dias ba jornalista sira liu husi diskursu iha salaun INAP Comoro, Dili sesta (24/02/2023)
Expedito hatutan, KI hare’e dirijente husi SAPNewsTL mesak joven ho ambisaun ne’ebe makaas hein katak bele hala’o servisu media nian ho diak ne’ebe KI hakarak enkoraja jornalista sira iha media SapNewsTL tenki iha papel Kontrolu Sosial, eduka, informa no diverte tanba KI iha papel promove liberdade espresaun no imprensa no asegura jornalista sira nia servisu no promove kualidade jornalista sira.
![](https://sapnewstl.com/wp-content/uploads/2023/02/Espedito.jpg)
Imajem Diretor SAPNewsTL tara tais ba Representante Konsellu Imprensa Espedito Dias Ximenes
Nia informa, jornalista ida tenki presiza iha kapasidade intelektual, profesional no tekniku ne’ebe hein katak jornalista Media SAPNewsTL iha hotu ona ne’ebe importante ba prosesu konstrusaun estadu nian ne’ebe kapasidade tolu ne’e sei fortifika jornalista sira Media SAPNewsTL nia servisu atu nune’e sira nia produtu fo sai ba publiku ho kualidade.
Reprezentante KI akresenta, sai media tenki hatene papel mak hanesan informa, eduka no diverte ba ema hotu ida ne’e mak parte redasaun nian ne’ebe bele kontribui hodi halakon probelma sira iha Timor-Leste tanba ne’e papel media importante tebes iha situasaun saida deit media iha papel hamenus korupsaun, koluzaun no nepotismu, KI sei servisu hamutuk nafatin ho Media SAPNewsTL hodi hare’e sira publikasaun notisia atu nune’e labele ses husi kode etika jornalizmu nian no KI mos sei ajuda Media SAPNewsTL nia jornalista sira hetan karteira profesional ba jornalizmu nian.
Enkuantu, Representante KI ne’e mos halo lansamentu ba filmajem fraternidade humana, selebra aniversariu media nian, fo sasain ba tomada de posse estrutura midia nian hamutuk ho Sekretaria Estadu Komunikasaun Sosial Mericio Juvinal Akara, inklui konslleiru SAPNewsTL Padre Mouzinho Pereira Lopes no Armindo de Jesus
Reportajen: Augusto dos Santos