APFTL Anunsia Rezultadu Survey, PLP Lakon Elektabilidade Husi Eleitor Jovens

Imajem : Presidente APFTL Zaulino Gomes da Silva, iha Sede APFTL Bekora, 18/04/2023

SAPNewsTL, Dili : Eleisaun Parlamentar 2023 ne’ebe sei realiza iha 21 Maiu, Bazeia ba survey Alumni Parlamentu Foinsa’e Timor Leste (APFTL) ne’ebe hala’o durante fulan rua resin hatudu Partidu Libertasaun Popular (PLP) la hetan espasu husi joven sira nia preferensia

Presidente APFTL Zaulino Gomes da Silva haktuir survey ne’ebe APFTL kobre Munisipiu 11 exeptu Munisipiu Vikeke, Manufahi no RAEOA, survey ne’e foku ba joven ho idade 17 to’o 35 hamutuk atus tolu limanulu (350), portantu Survey ne’e mai husi inisiativa assosiasaun APFTL nian ne’ebe la hetan apoia husi instituisaun ruma

“Survey ne’e mai husi inisiativa organizasaun nian ne’ebe la hetan apoia husi instituisaun ruma, Survey ne’e ba deit joven ho idade hosi 17 to’o 35, kompostu husi respondente hamutuk 350 husi 11 munispiu hanesan Aileu, Ainaru, Atauro, Baucau, Bobonaru, Cowalima, Dili, Ermera, Lautem, Likisa, no Manatutu, la inklui Manufahi, RAEOA, no Vikeke tanba rekursu la sufisiente hodi fasilita ekipa survey to’o munisipiu hotu”. hatete Presidente APFTL Zaulino Gomes da Silva ba Jornalista sira iha Sede APFTL Bekora, 18/04/2023

Tuir Rezultadu Survey amostra Partidu Congresso Nacionál Reconstrução de Timor (CNRT) okupa 39,9 %, Partidu Frente Revolucionário Timor Leste Independente (FRETILIN) okupa 28,5%, Partidu Demokrátiku (PD) okupa 18,3 %, Partidu Kmanek Haburas Unidade Nasional Timor Oan (KHUNTO) hetan 5.7%, portantu partidu sira seluk akumula deit 7.6%, enkuantu Partidu Libertasaun Popular (PLP) la hetan espasu iha preferensia joven sira nian

Imajem Rezultadu Survey husi APFTL

Entretantu, Lideransa APFTL ne’e hatutan rezultadu eleisaun ne’ebe mai sei hatudu katak povu matenek ona, povu nia espetativa ne’e boot, tanba ne’e partidu politiku sira tenki hakonu povu ne’e nia espetativa katak povu hakarak kualidade edukasaun, saude, ekonomia, agrikultura ne’ebe diak

“Povu julga ona partidu sira husi eleisaun ida ba eleisaun ida, Rezultadu eleisaun sei hatudu katak povu matenek ona, povu nia espetativa ne’e boot, oinsa partidu politiku sira bele hakonu povu ne’e nia espetativa katak povu hakarak edukasaun ne’ebe kualidade, saude nia kualidade ne’ebe diak, oan ida eskola iha matebean hun nia kualidade hanesan mos oan ida eskola iha Eskola Kasait Likisa, nune’e mos inan ida hahoris iha Hatubuiliku hetan atendimentu ne’ebe dignu hanesan inan ida partus iha ospital nasional”. dehan Zaulino

Lider Assosiasaun ne’e fundameta joven sira prefere  hili partidu polítiku sira tanba haree ba figura partidu, vizaun partidu,istória no seluk tan, iha ne’ebe hili bazeia ba figura kobre 37,89%, vizaun partidu kobre 37.54%, istória kobre 13,68%, no sira seluk kobre 10,88%

Bazeia ba rezulta survey ida ne’e, Presidente APFTL hateten joven barak liu hakarak guvernu dasia ne’ebe sei mai presiza prioritiza setor edukasaun, infraestrutura, saude, ekonomia, kampu de traballu, agrikultura no sosial tanba rezulta amostra maioria jovens hili setor edukasaun kobre 26,90%, Infraestrutura kobre 24,24%, Saude kobre 18,81%, Ekonomia kobre 8,15%, Kampu de Traballu kobre 7,21%, Agrikultura kobre 5,12%no sosial kobre 3,13%

Enkuantu, Survey ne’e la’o durante fulan rua hahu husi fevereiru to’o abril ne’ebe konsege husu respondente hamutuk 350 husi munisipiu 11 la inklui Munisipiu Vikeke, Manufahi no RAEOA

Jornalista : Vincensius Saldanha