Númeru Moras Dengue Aumenta Iha Dili: Análiza Kauza No Efeitu

SAPNewsTL, Dili : Artigu Sientifiku husi Cesarino Gonçalves, L.Ed kona-ba Númeru Moras Dengue iha kapital Dili : Analiza Kauza no Efeitu sira, Lisensiatura Edukasaun Universidade Nasional Timor Lorosa’e (UNTL) ne’e konsidera Governu através Ministériu Saúde ladauk iha Planu estratéjiku espésifiku hodi kombate moras dengue iha Timor Leste

Rezumu
Kapitál nasaun nu’udar sentru ba konsentrasaun ema hotu nian, nu’udar mós demonstrasaun imajem nasaun nian ba mundu, maibé kapitál refere ho kondisaun la saudavel nia emar sira sei afeta moras oioin inklui moras dengue no mos la garante vizibilidade atrativu iha públiku. Artigu ida ne’e ho objetivu halo análize hodi buka-hatene kona-ba kauza sira ne’ebé konsidera hanesan fatór kontribuente ba moras dengue, liuhosi kauza sira ne’e, fo biban hodi bele verifika efeitu negtivu ne’ebé akontese ona no posibilidade bele akontese mós iha futuru.

Estudu ida ne’e utiliza métodu kualitativu deskritivu liuhosi aprosimasaun ai-hun problema/problem tree analysis, reliza iha salaun enkontru Alumni Parlamentu Foinsa’e Timor-leste [APFTL], ho envolvimentu husi joven nain-16 feto-11 no mane-5. Joven hirak ne’e mai hosi Universidade lahanesan iha Dili laran, altura ne’e joven hirak ne’e partisipa iha formasaun kona-ba materia Análiza sosial. Peskizador aproveita hodi guia sira halo diskusaun no análize kona-ba númeru moras dengue aumenta iha munisípiu Dili.

Informasaun ne’ebé rekolla Peskizador kontinua halo revizaun literatura iha internet hodi reforsa nu’udar énfaze no konsidera hanesan auténtiku. Rezultadu husi estudu ne’e konsege identifika kauza prinsipal sira hanesan ambiente sidade Dili ladun saudável, komunidade menus informasaun, Governu la aplika jestaun ida lolos ba sidade Dili no ministériu Saúde ladauk iha planu estratéjiku espesífiku hodi kombate moras dengue.

Liafuan Xave; virus, moras dengue, kauza no efeitu,

Introdusaun
Timor-Leste ukun-an durante dekada rua ona, maibé dezemvolvimentu iha setór hotu-hotu hatúr hela interogasaun ba komunidade nia matan no fuan. Tempu atuál ita bele haree iha kapital Dili ne’ebé sai hanesan sentru dezevolvimentu ekonomia no konsentrasan ema hotu nian, maibé kondisaun sidade nian hatudu imajem ho ilustrasaun ne’ebé la atrai vizibilidade públiku, kondisaun sira hanesan; rai-rahun ne’ebé nakonu iha sidade iha tempu bai-loron, tahu nakonu iha tempu udan, lixu ne’ebé nakonu iha bee dalan ka valeta sira, soe foer/sintina tuir bee dalan sira, bee ne’ebé sulin iha resintu sidade la ijieniku nakonu ho poluisaun, susuk buras iha fatin hotu, inklui komunidade nia uma ne’ebé laiha distansia ba malu.

Kondisaun sira hanesan ne’e la’os deit iha kapital Nasaun maibé da’et dadauk no akontese mós iha Munisipiu seluk. Iha parte seluk ita bele observa katak dezemvolvimentu infraestrutura ne’ebé hakdasak no laiha jestaun diak ba sidade sei kontribui nafatin ba ameasa komunidade nia vida, bele mós motiva ema hodi kontra moral no étika ne’ebé pro ba saúde públiku, tamba deit intrevensaun elite no klase altu sira [ukun nain sira] la fo ezemplu diak no lahatudu mudansa iha dezemvolvimentu.

Ita ko’alia kona-ba moras dengue ita haree katak moras refere mosu tamba kauza oi-oin [multicausal] no nia implikasaun bele hasa’e númeru mortalidade ba labarik sira, labarik sira bele afeta moras dengue ho fasil tamba kondisaun imunidade ne’ebé fraku, ema joven no adultu sira bele mós sofre moras refere bainhira moris iha kondisaun no ambiente ne’ebé la saudável hanesan temi iha leten.

Timor-Leste hanesan País Tropikál ne’ebé frekuente ba moras kontajioza sira inklui moras dengue. Kada tinan moras Dengue sempre mosu iha ita nia nasaun, maske Governu liuhosi Ministerio da Saude,Organizasaun Mndial Saúde [OMS] no mos entidades relevantes sira esforsu maka’as hodi kombate moras ida ne’e, maibe moras refere kontinua sirkula iha ita nia rain hodi kauza ba iha sintomas leve hanesan; isin manas, ulun moras no bele to’o severa; baixa ka hospitalizasaun to’o mortalidade ka mate.

Tuir dadus ne’ebé autor asesu iha website ofisial WHO iha Timor-Leste, relata katak kazu dengue ne’ebé mosu dezde tinan-2021 nia rohan, iha nivel ne’ebé aas liu kompara ho tinan hirak uluk nian. tinan-2021 nia laran kazu 1451 no 10 mate (CFR 0.7%), tinan-2020 ho kazu 901 no 11 mate (CFR 1.2%). Iha Fulan- Janeiru 2022 relata de’it kazu 1286, 790 (61.4%) mak labarik sira ho idade tinan 14 mai kraik, 142 mak kazu dengue grave no 20 mak relata katak sira mate (rasio kazu fatál 1.6%). Maioria kazu sira ne’ebé aprezenta ba ospitál hetan diagnóstiku bazeia ba sinál klínika no sintoma. Munisipiu Dili, ne’ebé inklui sidade kapitál Timor-Leste, relata númeru kazu sira ne’ebé aas liu (857 kazu 66.6%), tuir kedas munisípiu Manatuto (92, 7.2%).

Liuhosi dadus ne’e hatudu katak númeru mortalidade sa’e, ita labele konsidera hanesan situasaun normál ida, maibé presiza tau atensaun sériu husi parte relevante sira hodi alerta ba komunidade, familia no esensial liu ba sira ne’ebé afeta ona moras refere liuhosi promosaun [care given] no edukasaun ba sosiedade hodi hatene no prevene an husi moras dengue.

Meiu ne’ebé diak mak nafatin maksimiza promosaun, sensibilizasaun no kria polítika hodi harii sidade ida-ne’ebé moos no saudável. Luta hodi minimza moras dengue iha Tmor-Leste, laos úniku Ministériu Saúde deit mak kombate maibé Sujeitu sira-ne’ebé jere setór importante sira seluk iha Timor-Leste presiza buka-hatene fatór sira seluk ne’ebé kontribui hodi konsidera no rezolve liuhosi mellora kondisaun nasaun Nasaun nian, liuliu kondisaun sira ne’ebé konsidera hanesan kauza negativu ba saúde públiku.

Revizaun Literatura

Iha parte II autor hatúr baze teórika bazeia ba peskiza bibliográfiku ba hakerek nain sira nia obra ne’ebé públika iha fontes konfiavél sira hodi reforsa nu’udar baze fundamental iha parte konseitu nian ligadu ho virus dengue.

Orijen no Konseitu Virus Dengue

Idenfikasaun ba virus dengue ho karakter epidémiku, liuhusi peskizador virologia sira iha tempu pasadu. Sira identifika iha tinan ne’ebé lahenesan no fatin lahanesan, tuir informasaun ne’ebé autor buka-hatene iha jurnal no artigu sientífiku iha Google akadémiku, verifika katak virus dengue la aparese espesifiku iha nasaun ida ka rejiaun ida, maibé virus refere identifikadu iha fatin ne’ebé lahanesan.

Nune’e kada nasaun bele fo naran ka nomenklatura ne’ebé lahanesan. Tamba prega naran ne’ebé lahanesan ikus mai nomenklatura virus refere halo tradusaun ba Lingua franses no ingles hodi konsidera nu’udar nomenklatura universál.

Tuir artigu sietífiku ho tópiku notas históricas e filológicas sobre a palavra dengue, aprezenta istoria aparsimintu moras dengue. Relata katak, iha tinan-1891 doutor ho naran Schuchardt esplika moras dengue afeta ba nia pasiente no moras refere afeta liu ba ema ne’ebé ho imunidade fraku.

Parte seluk, literatura médika nain-rua fo sai iha tinan ne’ebé lahanesan, iha tinan-1780 David Bylon fo sai ktak virus dengue mosu tiha ona iha Java Indonesia iha tinan-1779, no iha tinan-1789 Benjamin Rush fo sai katak moras dengue nu’udar wabah epidemik akontese mós iha Philadelphia Amerika. Husi publikasaun sira nian, ikus mai nomenklatura médiku konsidera hanesan naran foun ba moras refere ( de Rezende, 1997).

Dengue nu’udar moras ne’ebé konsidera hanesan wabah tamba nia bele afeta ba ema barak ho lais liu ho númeru ne’ebé boot no konsidera hanesan mudansa númeru ne’ebé la normal. Parte seluk, moras dengue akontese imediatu ba ema tamba naturalmente ambiente hotu mak ita hela sempre eziste susuk, husi ne’e fasil tebes ema bele kona moras refere bainhira hetan tata husi susuk.

Tuir [(handra 2010) Moras dengue nu’udar moras ne’ebé konsidera moras hadaet efeitu husi virus dengue, nia mosu iha kualker tempu/momentu no bele afeta ba kualker idade. virus dengue hola parte iha familia virus ho naran Flovovirus [family flavividae]. Transmisaun moras dengue husi ema ida ba ema seluk husi susuk ho naran Aedes Aegypty no Aedes Albopictus.

Virus dengue avaria ba tipu oioin kompostu husi tipu 4 mak hanesan Den-1, Den-2, Den-3 No Den-4. Bainhira ema hetan atake husi Virus DEN 3 ne’e perigu tebes kompara ho sira seluk (Kusumawati, Nila; Sukendra, Dyah Mahendrasari, 2020).

Vetor nu’udar organismu ne’ebé bele transmite moras infeksiozas husi animál ba ema/umanu, iha kazu moras dengue susuk hanesan vetor prinsipal hodi hadaet moras dengue husi ema ida ba ema seluk. Virus dengue hela iha susuk durante loron 7-8, entre loron hira ne’e ema ne’ebé saudável mós bele afeta moras dengue baihira hetan tata husi susuk mak hanesan.

Ema ne’ebé sofre moras dengue ho kondisaun ne’ebé kritis/ka garve liu, hareee husi durasaun isin manas durante loron 2-7, kosar makaas, susar atu toba, moras iha parte fukun hanesan matan fukun, ruin moras, ulun moras mka’as, laran sa’e muta, vontade han laiha, isin mean-mean, ran sai husi ibun no tensaun baixa/diastole. Karik pasiente hetan terapia elektronik ne’ebé lalais ho lolos maka nia bele rekopera lalais, maibé tratamentu mak la adekuadu no la imediata sei rezulta pasiente lakon nia vida (Unteany, Sri; , Thoif, 2018)

Metodolojia
Iha parte ida ne’e, autor hatúr métodu peskiza ho aprosimasaun kualitativu liuhosi estudu referénsia/pustaka no deskritivu xave informasaun sira.

Tuir livru ho títulu Investigação qualitativa em edukasaun, katak Investigador kualitativu kontinua kestiona no buka hatene liuhosi sejeitu ka ema ne’ebé sai nu’udar xave hodi hato’o informasaun relasiona ho situasaun no kondisaun ne’ebé sira ultrapasa ka experimenta, rekolla sira nia observasaun no perspektiva ba fénomenu sosiá iha fatin ne’ebé hela ba. Investigasaun kualitativu ho karakter deskritivu, rekolla dadus sira liuhosi aponta ka deskreve ba ema nia liafuan, imajen no video maibé laos númeru. Informasaun sira ne’ebé deskreve ho nia baze mak sitasaun ba fenómenu hodi hatudu ilustrasaun no haforsa aprezentasaun dadus (Bogdan & Biklen, 1994)

Banati ba autor sira nia ideia iha leten maka autor deskreve informasaun husi joven universitáriu nain-16 feto-11 no mane-5, joven hirak ne’e nu’udar partisipante husi atividade formasaun materia analiza sosiál ne’ebé realiza iha salaun enkontru Alumni Parlamentu Foinsa’e Timor-Leste [APFTL].

Iha sesaun diskusaun fasilitador guia joven sira utiliza métodu analiza ai-hun problema/problem tree analysis hodi buka hatene kauza sira ne’ebé kontribui ba aumenta númeru moras dengue, parte seluk, sira halo mós diskusaun hodi hatúr efeitu ne’ebé espekta sei prejudika negatvu ba moris sosiedade.

Iha altura ne’ebá autor nu’udar fasilitador ba formasaun refere, aproveita halibur joven sira nia ideia hodi sai nu’udar informasaun inisiál hodi hakerek artigu ida ne’e. Autor halo peskiza bibliográfika hodi reforsa ideia hirak ne’ebé sira hatúr nu’udar énfaze nune’e bele konsidera hanesan informasaun auténtiku.

Rezultadu Diskusaun

Diskusaun ne’ebé joven universitáriu sira halo análize ba problema “Númeru moras dengue aumenta iha Munisípiu Dili” konsege identifika kauza sira nu’udar fatór kontribuente hanesan tuir mai ne’e;

Ambiente la saudável iha Sidade Dili

Haree ba imajen kapitál nasaun nian, nota katak mentalidade no atitude makaer ukun sira ka hirak ne’ebé jere rekursu estadu seidauk orienta ba mudansa. Parte seluk mentalidade ema nian sei nafatin hela iha paradigma ne’ebé matenek nain sira hanaran paradigma Antroposentrisme.

Paradigma ida ne’e ho perspektiva katak ema nu’udar sentru ka espesiál liu iha natureza, konsidera ema deit mak iha valor, ambiente ho vida sira seluk konsidera hanesan material hodi fo benefisia no satisfatóriu ba nesesidade ema nian. Mensajen morál hodi hatúr obrigasaun no responsbilidade atu respeita no kuidadu ambiente konsidera hanesan demaziadu (Sutoyo, 2022).

Husi atitude hirak ne’e, maka ema kontinua ignora tiha hodi la fo importansia ba ambiente, to’o agora ema la konsege kuidadu ambiente, ikus mai ambiente halibur no produs fali ar ne’ebé la fresku no hamoris fali susuk hodi rezulta moras ba umanidade. Ambiente konsidera hanesan espasu ne’ebé importante ba ema, kondisaun ne’ebé la moos iha indikasaun hodi bele afeta moras ka fo amesa ba saúde ema nian.

Parte seluk, Tuir informasaun ne’ebé fo sai husi Fundasaun Mahein relata katak bairu sira iha Munisípiu Dili komunidade sira soe lixu iha mota laran, estrada ninin no fatin públiku sira. Komportamentu hirak ne’e hatudu katak komunidade seidauk konsiente kona-ba impaktu ambientál ba saúde, aktu mak hanesan la’os akontese deit iha Dili maibé akontese mós munisípu 13 seluk iha teritóriu Timor-Leste.

Menus Promosaun no Sensibilizasaun Kona-ba Moras Dengue

Governu liuhosi Ministériu Saúde presiza tebes promove Edukasaun iha saúde hodi eleva komunidade nia koñesimentu no konsiensia, kona-ba transmisaun moras dengue. Komunidde tenki hetan informasaun ne’ebé natoon kona-ba oinsa moras ne’e transmite, prevensaun no tratamentu. Nesesáriu Asaun edukativa ne’ebé adekuadu liuhosi investimentu ne’ebé realístiku hodi empodera komunidade nune’e bele proteje no prvene an husi moras dengue

Estadu/Governu La Aplika ho Lolos Polítika Kona-ba Jestaun Sidade Dili.

Tuir diskusaun husi joven universitáriu fundamenta katak, ladauk iha jestaun diak iha sidade Dili, laiha jestaun ne’ebé diak maka la konsege dezenvolve no harii sidade ida ne’ebé organizadu no ijiéniku. Ita foti referensia husi nasaun viziñu Indonézia, nasaun refere iha Instituisaun sira kona-ba ambientál ka Kelembagaan Lingkungan ho nia funsaun atu garante ekilibriu prosesu dezemvolvimentu ne’ebé sustentavel, maibé la estraga ambiente no garante sidade ne’ebé moos no furak, sira iha institutu oioin ne’ebé hala’o knár lahanesan ho nia lei no regra rasik. Sira nia ezistensia asumi Papél no funsaun estratéjiku ho kompromisu halo mudansa ba fatin ida ka Munisípiu ida (Prof. Dr. Nadiroh, 2020).

Karik Timor-Leste iha mós institutu barak mak harii ona?, maibé nesesáriu tebes asumi responsabilidade no obrigasaun hodi halo jestaun ba sidade Dili. Karik laiha seriedade maka ita sei falla no nasaun la konsege harii sidade idade ne’ebé bele estandarija no kompete ho nasaun seluk.

Engrafamentu/kepadatan Uma Komunidade Nian.

Fatór ne’ebé hanesan mós risku hodi hamosu moras dengue, ida mak distansia entre uma. Distansia uma ne’ebé rabat malu fasil los ba kresimentu susuk, husi ne’e komunidade susar kontrola an husi moras dengue tamba susuk fasil halo movimentu no hela fatin diak los, sira bele kontinua sobre vive iha komunidade nia leet (Prasetyani, 2015)

Governu através Ministériu Saúde ladauk iha Planu estratéjiku espésifiku hodi kombate moras dengue

Moras dengue nia aparesimentu hanesan fenómena sosial ne’ebé ho implikasaun negativu ba sosiedade Timor-leste na moris, bele afeta ema barak lakon vida, tamba Virus dengue sei la lakon no kontinua buras iha nasaun Timor-Leste.

Situasau ida ne’e presiza hatúr planu estratéjia ne’ebé klaru hodi kombate virus dengue. Nasaun barak iha mundu mak iha rasik maneira hodi kombate virus sira ne’e, ita foti referensia husi Indonézia sira hatúr planu estratéjiku espesífiku ba kada moras hada’et, inklui moras dengue. Ita bele foti referensia sira nian nu’udar matadalan hodi dezenvolve no kontextualiza tuir situasaun no kondisaun Timor-Leste nian.

Fatór kontribuente sira ne’ebé hatúr iha leten, nu’udar faktus ne’ebé ita-nia nasaun enfrenta, hosi ne’e ita bele deskobre katak seriedade hodi dezenvolve nasaun presiza iha komptensia ne’ebé orienta ba mudansa.

Kauza hirak ne’ebé temi iha leten maka la konsege rezeolve ka realiza intrevensaun ruma sei rezulta efeitu negativu ba sosiedade no nasaun Timor-leste. Afeta ba númeru mortalidade aas, vetor ne’ebé kauza moras dengue kontinua buras, sosedade moris desorganizadu/la armonia, saúde públiku ameasadu, dezemvolvimentu kontinua hakdasak no kapital nasaun la hatudu imajen atratvu iha mundu nia matan.

Konkluzaun no Rekomendasaun

Konkluzaun
Virus dengue konsidera hanesan virus ne’ebé perigu tebes, virus ne’e mundu konsidera hanesan wabah tamba bele da’et lais liu no bainhira laiha intrevensaun ne’ebé diak ho lolos bele halakon ema nia vida iha tempu badak.

Prosesu kurativu hanesan alternativu hodi salva bele mós la salva ema nia vida. Hodi kombate moras dengue presiza ajente hotu nia kontribuisaun hodi rezolve kauza sira ne’ebé kontribui direta ba hamosu moras dengue. Ambiente nu’udar espasu ne’ebé fo moris ba ema, iha tempu hanesan bele mós estraga ka ameasa ema nia saúde bainhira la iha jestaun no konservasaun ne’ebé diak husi Estadu no komunidade rasik.

Rekomendasaun
Haree ba kauza ka fatór kontribuente hirak ne’ebé sita iha leten, maka hatúr rekomendasaun sira hanesan tuir mai ne’e;
a). Rekomenda ba Governu hodi halo estudu no foti referensia hosi nasaun seluk nian, hodi dezenvolve no halo jestaun ba kapital nasaun;

b). Estadu presiza kontrola no regulariza institutu privadu ka Estatal ne’ebé servisu em relasaun ho ambiente nasaun nian, hodi asumi papel no funsaun ne’ebé orienta ba mudansa signifikativa ho efisiente;

c). Husu ba Governu liuhosi Ministeriu Saúde hodi hamosu Planu estratéjiku ida ne’ebé integradu no espesífiku hodi kombate moras dengue iha Timor-Leste.

Bibliografia

Bogdan, R. C., & Biklen, S. K. (1994). Investigação Qualitativa em Educação. Uma Introdução à teoria e os métodos. Porto: PORO EDITORA. LDA.
de Rezende, J. M. (1997). Notas Históricas E Filológicas Sobre A Palavra Dengue. Revista de Patologia Tropikál [Linguagem Medica] , 2.
Kusumawati, Nila; Sukendra, Dyah Mahendrasari. (2020). Spasiotemporal Demam Berdarah Dengue berdasarkan House Index, Kepadatan Penduduk dan Kepadatan Rumah. HIGEIA JOURNAL OF PUBLIC HEALTH RESEARCH AND DEVELOPMENT, 2.
Prasetyani, R. D. (2015). Fatór-Fatór yang Berhubungan dengan Kejadian Demam Berdarah Dengue. Majority | Volume 4 | Nomor 7 |, 3.
Prof. Dr. Nadiroh, M. (2020). Teori dan Konsep Kelembagaan Lingkungan. Modul pembelajaran siswa Universitas, 31.
Sutoyo. (2022). Paradigma Perlindungan Lingkungan HiduP. 194 ADIL : Jurnal Hukum Vol. 4 No.1, 5.
Unteany, Sri; , Thoif. (2018). Evaluasi Kegiatan Kader Kesehatan Sekolah Sebagai Upaya Dalam Mengurangi Kasus Demam Berdarah. Philanthrophy Journal of Psychology, 4.

Hakerek Na’in : Cesarino Gonçalves, L.Ed (Xefe Divizaun Formasaun APFTL)