Governu Apresia CDTL Realiza Kongresu Extraordináriu Altera Estatutu
SAPNewsTL, Dili:Governu lius husi Ministériu Juventude Desportu Arte kultura (sigla portuges MJDAC) apresia Konfederasaun Desportu Timor-Leste (sigla portuges CDTL) realiza kongresu extraordinariu altera estatutu tanba sira hakarak altera artigu balun atu nune’e dezenvolve liu tan federasaun sira ne’ebe hamahan an iha konfederasaun
“Ohin ita realiza kongresu extraordinariu altera estatutu CDTL tanba ita iha razaun hetan rekomendasaun husi federasaun sira hamahan iha CDTL, ezizensia husi governu atu adapta ba mudansa no tanba estatutu ne’e halo tinan 11 ona termu balun uza hela antigu hanesan distritu maibe agora ita uza munisipiu ho tan papel CDTL la tau iha estatutu atual”, dehan Prezidente CDTL Macario F. Sanches ba jornalista sira iha salaun Ian Martin Balide, Dili sabadu (22/07/2023).
Prezidente CDTL hatutan, sira iha proposta alterasaun iha artigu 16, artigu 13 mudansa aumenta no artigu 3 foun tanba koalia kona ba jestaun rekursu umanu CDTL, despeza publika CDTL nian ho direitu no dever orgaun eleitu iha no kongresu ne’e partisipa husi federasaun 33 tuir lolos 35 maibe federasaun rua Kanoazen ho automolizmu la funsiona ona nune’e partisipasaun liu ona 50% +1 tuir estatutu CDTL nian.
Macario informa tan, agora sira hamutuk federasaun sira halo alterasaun ba estutu CDTL sai parseiru diak ba governu hodi ajuda implementa planu governu ba area dezenvolvimentu desportu nian no rezolve problema federasaun sira estabelese ho naran maibe organizasaun la iha rejistadu afilia ba organizasaun internasional
Entretantu, Federasaun balun iha maibe funsionamentu ba halo atividade la iha no federasaun balun mandatu estrutura hotu maibe seidauk iha kongresu hili estrutura foun.
Nune’e agora CDTL hakbesik ba sira rezolve problema sira ne’e para hatan ba diploma ministerial numeru 40/2022 ba utilidade públiku no hatan mos rekezitu kria federasaun mak hanesan tenki eziste asosisaun iha munispiu hotu, iha klube no atleta maibe avaliasaun CDTL barak mak la priense kriteria foin federasaun haat mak iha kondisaun oituan nune’e ho kongresu extraordinariu federasaun sira debate sira nia futuru.
Iha fatin hanesan Ministru Juventude Desportu Arte Kultural Nelio Izaac Sarmento hatete, uluk estrutura foun eleitu konfederasaun sei lakuna balun kona estatutu para atu dezenvolve CDTL lao ba oin tan ne’e ohin sira halo kongresu extraordinariu altera konfederasaun nia estatutu
“Tan ne’e ohin Ha’u agredese ba Presidente CDTL ho nia estrutura ho Prezidente Federasaun tuur hamutuk kolia ho ulun malirin halo diskusaun diak hetan ideia diak tuir kondisaun Timor-Leste nian liuliu lori desportu ba oin hetan prestasaun diak”.
Governante ne’e hatutan, “CDTL sai mahon ba federasaun hotu iha Timor-Leste uluk estrutura foun eleitu konfederasaun sei lakuna balun kona estatutu para atu dezenvolve CDTL lao ba oin tan ne’e ohin sira halo kongresu extraordinariu altera konfederasaun nia estatutu”. Nia subliña
Iha sorin seluk, Sekretariu Jerál Federasaun Tiru Timor-Leste Marino C. R. Laranjeira dehan, ohin sira halo kongresu extraordinariu altera estatutu CDTL importante hadia sistema desportu iha Timor-Leste.
“Ohin ne’e, ita halo kongresu extraordinariu altera estatutu CDTL nian importante tebes ba futuru hadia sistema desportu iha Timor-Leste tanba durante sira mos halo halo atividade iha sira nia federasaun”, Marino hateten