Governu Sei Apoia Makaas Ba Atleta TL, Partisipa Asian Games 2023

SAPNewsTL, Dili: Governu liu husi Ministériu Juventude Desportu Arte Kultura (sigla portuges MJDAC) hamutuk Konfederasaun Desportu Timor-Leste (sigla portuges CDTL) sei fo apoiu makaas ba atleta Timor-Leste partisipa Asian Games 2023 iha sidade Hangzhou, China komesa husi preparasaun to’o atleta sira fila fali mai Timor-Leste.

“Preparasaun atleta sira ba Asian Games daudaun ne’e ita iha modalidade sanulu ho atleta 26 tan ne’e prosesu dahuluk fo tempu ba federasaun sira nune’e kada federasaun sira halo selesaun no preparasaun ba atleta sira depois to’o loron 1 fulan agostu to’o 19 fulan setembru 2023”,

“CDTL mak jere maibe treinamentu ba atleta sira jestaun nafatin husi kada federasaun tanba tinan ne’e CDTL ho federasaun sanulu deside ona la iha fatin konsentrasaun ba atleta sira tanba federasaun sira fatin diak ba atleta sira”, dehan Prezidente CDTL Macario F. Sanches ba jornalista sira iha salaun Ian Martin Balide, Dili sabadu (22/07/2023).

Macario hatutan, orsamentu hahan nian ba atleta sira CDTL sei halo kontratu hotu entrega hotu ba federasaun sira depois sira mak kontrola no jere tuir prosesu aprovizionamentu, ekipa husi CDTL hamutuk governu no CONTL halo monitorizasaun hare’e hahan nutritivu tuir montante kada federasaun hetan husi governu.

Prezidente CDTL haforsa tan, antes loron 1 fulan agostu 2023 CDTL fo tempu ona ba federasaun sira halo try out ba atleta sira, halo kampionatu nasional no lori atleta sira ba treinu iha rai liur tanba bainhira tama ona ba loron 1 fulan agostu 2023 ne’e faze ida ba atleta sira halo treinamentu ba tekniku, tatiku, fiziku no mental para hein ba kompete iha Asian Games 2023

Eventu Internasional ne’e sei realiza iha sidade Hangzhou, China komesa iha loron 23 fulan setembru remata iha loron 8 fulan outubru 2023 ne’ebe partisipa husi nasaun 45.

Iha fatin hanesan, Ministru Juventude Desportu Arte Kultura Nelio Izaac Sarmento hatete, governu hamutuk ho CDTL sei apoiu ba atleta sira halo preparasaun partisipa Asian Games tinan ne’e no governu garante masimu atleta sira tenki partisipa Asian Games tanba Timor-Leste nu’udar membru Asean nune’e atleta sira labele hanoin barak.

“Governu hamutuk ho CDTL sei apoiu ba ita nia atleta sira halo preparasaun partisipa Asian Games tinan ne’e, maibe treinamentu ita sei hala’o deit iha kada federasaun no governu garante masimu ba ita nia atleta sira tenki partisipa Asian Games iha tinan ne’e tanba ita nia nasaun nu’udar membru Asean nune’e atleta sira labele hanoin barak”, tenik Nelio