Ema Ne’ebe Badinas Estuda, Nia Sei Sai Matenek, Boot & Riku

SAPNewsTL, Lautem: Iha serimonia inaugurasaun ba eskola lima iha Munisipiu Lautem, iha diskursu Sekretariu Administrador Munisipiu Lautem Jacinto da Costa hateten edukasaun fo ema moris di’ak, edukasaun fo ema dignidade, tanba ne’e nia husu ba estudante sira atu badinas estuda hodi sai matenek, sai ema bo’ot, hodi hetan moris diak.

Tuir Sekretariu Administrador Munisipiu Lautem Jacinto da Costa iha nia diskursu hato’o edukasaun fo ema dignidade tanba liu husi edukasaun mak ema bele matenek hodi hetan moris di’ak.

“Edukasaun ne’e fo ema moris di’ak, edukasaun ne’e fo ema dignidade, se imi loron-loron halimar de’it iha estrada, ba buka de’it boek iha mota, ba kail ikan de’it iha tasi, ema la kuñese imi maibe kuandu imi eskola didi’ak, imi sai matenek ema hotu kuñese imi no fo imi dignidade, sei buka fatin ba imi atu hetan moris di’ak”. Dehan Sekretariu Administrador Munisipiu Lautem Jacinto da Costa iha EBF Abere-Luro, 11/09/2023

Sekretariu Administrador Munisipiu Lautem ne’e akresenta ema ne’ebé badinas estuda no matenek nia sei hetan moris di’ak no ema seluk sei respeitu

“Semak matenek nia bele sai ba bo’ot, semak badinas nia bele sa’e ba riku, semak fiar na’in nia ba lalehan, edukasaun fo imi moris di’ak no fo imi dignidade tanba bainhira imi moris di’ak, imi matenek ona ema sempre respeitu imi no fo imi fatin di’ak maibe wainhira imi buka boek de’it iha mota laran ema la rekuñese imi tanba ne’e mak matenek atu sai ema bo’ot, badinas atu sai ema riku fiar na’in atu sa’e ba lalehan, maromak mos konsidera”. Nia tatoli

Sekretariu Jacinto mos konta edukasaun tempu uluk difisil tanba la asesu eskola ho di’ak, la hetan fasilidade di’ak maibé sira nafatin esforsu no badinas estuda to’o remata sira nia estudu

“Uluk mestre hanorin ami iha ai-hun de’it, hanorin iha ai-talik de’it maibé ami bele remata ami nia estudu, ohin imi eskola di’ak hetan fatin di’ak, kadeira di’ak, uluk ami nahe ai-tahan mak tur iha leten maibé fatin ne’ebé ohin ita haree ne’e imi tur iha azuleiju, kadeira, rai lasama ona ami nia tempu ami la hetan eskola di’ak tanba ne’e imi tenke badinas estuda atui mi bele matenek hodi imi hetan moris di’ak”. Nia hato’o

Jacinto mos husu ba estudante sira atu halo mudança ba sira nia aan, muda sira nia hanoin, muda sira nia hahalok, halakon buat ne’ebe a’at hodi sai ema ne’ebe di’ak

“Muda imi nia hanoin, muda imi nia hahalok, wainhira imi muda imi nia moris mai husi imi nia an rasik la’os ema seluk, la’os obriga ema atu muda hahalok, muda nia hanoin, atu muda nia moris maibé husi imi nia an rasik, imi hakarak muda imi nia hahalok, muda kakutak, muda imi nia pensamnetu, se baruk ten karik tenke sai badinas, tenke muda no halakon buat ne’ebe a’at hodi bele sai ema di’ak”. Nia hakotu

Jornalista : Luis Pailofo