Liga 1 Voleibol 2023, Hein Rehabilitasaun GMT

SAPNewsTL, Dili: Federasaun Voleibol Timor-Leste (FVTL) tau orariu ona katak divizaun dahuluk liga voleibol 2023 sei hala’o iha fulan outubru maibe federasaun sei hein reabilitasaun jinajiu desportu Dili kunesidu ho GMT (Gedung Matahari Terbit).

“Kalendariu ba divizaun dahuluk liga voleibol epoka dahaat, ita fo sai ona katak sei realiza iha fulan outubru maibe ita sei hare’e jinajiu desportu Dili kunesidu ho GMT ne’e tanba sei iha hela faze rehabilitasaun karik finaliza iha fulan outubru nia laran, ita hahu kedas divizaun dahuluk liga voleibol epoka ba dahaat tinan 2023,”

“Nune’e agora ita mos fo tempu ba klube kompete divizaun dahuluk liga voleibol klube feto ualu no mane ualu para sira halo preparasaun diak liu tan para jogu liga nian iha kualidade”, dehan Prezidente FVTL Inocencio de Araújo ba jornalista sira iha salaun otel Luz Clarita tersa, (26/09/2023).

Prezidente hatutan, agora federasaun liu husi komisaun tekniku halo preparasaun hela no sira mos fo informasaun ba klube sira halo preparasaun ba nia jogador sira tanba klube sira tama ona divizaun dahuluk liga voleibol ne’e otomatikamente rejistu ona la iha tan rejistrasaun ba klube sira

Sira planu durasaun liga nian ba fulan tolu maibe bainhira la’o tempu naruk afeta mos kontratu klube sira ho jogador sira ho ida ne’e sira sei buka tempu enkontru ho prezidente klube sira para rona ideia ka sujestaun balun husi klube sira ba tekniku nian.

Nia afirma tan, tama ba tinan 2024, sira iha planu ona hahu divizaun datoluk liga voleibol iha munispiu 14 inklui RAEOA, nune’e klube sira sei kompete iha munisipiu 14 ne’e, kampiaun iha divizaun datoluk iha munispiu mak sei mai kompete divizaun daruak iha kapital Dili.

Reportajen: Augusto dos Santos