Aban ! Manorin Kontratadu & Estudante UNTL Halo Asaun Boot Hasoru Ministra Edukasaun
SAPNewsTL, Dili : Relasiona ho Professóres kontratadu hamutuk 1.715 ne’ebe Ministra Edukasaun Dulce de Jesus hapara sira nia kontratu iha loron 31 Dezembru 2023, aban manorin kontratadu sira sei halo asaun pasífika hasoru Ministériu Edukasaun liu husi marsa
Senadu Geral Universidade Nasionál Timor Lorosa’e (UNTL) Cristovão de Araujo haktuir aban estudante UNTL hotu sei tun hodi solidariza asaun pasífika ne’ebe sei halo husi manorin kontratadu sira ne’ebe sai vítima ba desizaun Ministra Edukasaun nian.
“Bazeia ba karta husi Konsellu Nasional Professores Kontratadu Timor-Leste (KNPK-TL) ho Nú. Ref.:04/KNPK-TL/I/2024, ne’ebe dirije ba Senadu Geral UNTL, ho nia asuntu ‘Husu Solidariedade Estudante UNTL nian ba Kazu Demisaun Professores Kontratadu tinan 2023’. nune’e aban estudante UNTL sei fo solidariedade ba professores kontratadu sira liu husi ita nia prezenja hamutuk ho professores kontratadu, hodi halo Asaun Marcha pasífika husi Centro de Convenção de Dili (CCD) to’o iha Jardim 5 de Maio iha oras tuku 08:00 dader”. Tenik Senadu Jeral UNTL Cristovão de Araujo ba SAP News TL iha Kampus Sentral UNTL Kaikoli, 21/01/2024
Senadu Jeral UNTL ne’e hatutan objetivu husi asaun refere mak atu ezije ba Ministra Edukasaun da RDTL hodi buka solusaun urjentemente atu solusiona problema professores kontratadu sira nian hodi nune’e la bele fó implikasaun ka prejudika prosesu ensinu aprendizagem formal ne’ebe mak la’o daudaun iha eskola sira iha teritóriu nasional hodi nune’e Alin Estudante sira hahu kedas husi Ensinu Primariu to’o Ensinu Sekundariu Geral sira la bele sai vítima ba Senhora Ministra nia aktu.
Entertantu, Antes ne’e professor kontratadu sira ameasa katak laiha resposta husi Ministra Edukasaun maka trabalhador sira sei organiza masa husi munisipiu hodi halo asaun pasifiku ne’ebe maka’as hasoru Ministeiru Edukasaun iha loron 22 janeiru 2024 hodi defende direitu professor nian.
Nune’e ministeiru bele resolve estatuto professor kontratadu tinan 2023 nian tuir Decreto Lei No.31/2023 de 31 de Maio konaba estatuto karreira dos professores ne’ebe previstu ona iha artigu 11. Vigora regra administrasun funsaun publiku nian.
Enkuantu, Antes ne’e Ministra Edukasaun Dulce Maria de Jesus informa nia parte sei la renova kontratu professor kontratadu sira nian maibe sei servisu hamutuk ho komisaun funsaun públika hodi loke deit vaga ba professores foun iha fulan fevereiru.
Antes ne’e, Portavos Agustinho Pinto informa, liu husi komunikadu impresa ne’ebe hala’o iha jardin 5 de maio Quinta (18/01/2024) hatudu katak professes kontratadu sira reafirma pozisaun nu’udar trabalhador hodi ezije Ministeiru Edukasaun responde ba provas hirak ne’ebe la asegura direitu e intresses legitimos dos cidadaões hodi hamosu lamentasaun ba professes kontratadu 1.715 iha teritoriu nasional
“Ami professores kontratadu sira triste, tuir lolos iha tempo inicio de aprendizajen hanesan ne’e, ami hamutuk ho ami nia oan doben estudantes sira aprende hamutuk iha aulas, maibe hanesan publiku hatene Ministra Edukasaun no Sekretariu Estadu Ensinu Secundario Jéral no Teknika Vokasional hapara tiha ami professor sira nia kontratu sem karta notifikasaun ruma maibe bandu ona ami professor sira labele hamrik tan iha aulas hodi hanorin no eduka ami nia oan estudantes sira”.
Portavoz Agustinho salienta, desizaun ne’ebe Ministra Edukasaun no Sekretario Estadu asuntu Ensinu Secundario Jéral no tekniku vokasional foti halo sira senti triste tebes ho dezisaun refere tamba implika ba direitu professores kontratadu rihun ida resin, Ohin loron eskola balu taka ona tamba menus professor iha sala de aula
Dirijente ne’e hatutan, Ministra Edukasaun no Sekretario Estadu asunto Ensino sekundariu jéral no tekniku vokasional atu resolve uluk problemas professor kontratadus 2023, Reclamantes no voluntarios molok loke teste bolsa kandidatu ba publiku.
Attitude Ministra Edukasaun no Sekretario Estadu asunto Ensino secundario jéral no tekniku vokasional la hatudu vontande nu’udar governante ida ne’ebe hetan komfiança husi Primeiru Ministru, Kay Rala Xanana Gusmão hodi tau intresse nasional aas liu intresse privadu, maibe hakarak kria deit diskriminasaun ba professor sira. Tenik nia
“Ami povu kiik nafatin ezije Ministra Edukasaun no Sekretario Estadu asunto Ensino secundario jéral no tekniku vokasional labele haluha, professor kontratadus sira ne’ebe agora dadaun ami halibur a’n iha ne’e mesak nu’udar mate restu, sobrevivente, veteranos, martires no povo kik nía oan sira. Tamba ne’e ami iha direito tomak atu servi rai lulik ida ne’e liu husi vokasaun no profisaun ne’ebe mak ami iha”
Nia dehan ukun a’an ida ne’e liu husi ema barak nia terus no sofrimentu oi- oin, balu mate tamba ema oho,mate tamba hamlaha no balun lakon to’o ahin loron la hetan. Tamba ne’e bainhira hetan oportunidade atu servi povu no rai ida ne’e karik atu servi ho fuan hodi valoriza no fo honra ba heroi sira tamba ukun a’an ida ne’e nia finalidade maka povo tenke moris diak, povo nia oan sira tenke asessu edukasaun ida diak no kualidade.
Jornalista : Juvita Sarmento & Ermelinda Soares