Ahi Han Uma Iha Aitarak-Laran, Rezulta Inan Feton Ida Sofre Kanek
SAPNewsTL, Dili : Ohin maiz ou menuz tuku 2 liu mosu insidente ida ahi han uma ida iha Area Aitarak-Laran, Postu Administrativu Dom Aleixo Munispiu Dili rezulta inan feton ida sofre kanek iha liman.
Uma na’in Venancio dos Santos haktuir, ahi han uma refere iha oras tuku 2 resin, familia sira konsege salva deit dokumentu sira maibe sasan inklui osan balun ne’ebe rai hela iha uma laran ka salva.
“Ha’u ohin iha hela ospital ne’eba hafoin ahi han uma mak foin sira kontaktu ha’u mai, Sasan sira uma laran nian ahi han hotu inklui osan balun, salva deit mak dokumentu sira”. Tenik Uma nain Venancio Dos Santos ba Jornalista SAPNewsTL iha Aitarak-Laran, 13/01/2024.
Durante ahi han uma rezulta inan feton ida sofre kanek iha liman tanba tenta atu salva dokumentus inklui ninia oan, portantu vítima refere lori ona ba ospital hodi halo tratamentu emergensia.
Iha sorin seluk, Xefe Aldeia Aitarak-Laran Frangelino Maia hateten, kondisaun uma refere aat ona ho sasan sira tanba ne’e husu ba Sekretariu Estadu Protesaun Civil atu bele ajuda netik familia afetadu.
“Kondisaun refere aat total, tan ne’e husu guvernu atu bele ajuda familia ne’ebe ohin sai vitima ba insidente ne’e”. Dehan Xefe Aldeia Aitarak-Laran Frangelino Maia
Hafoin mosu ahi han uma refere, Ekipa Bombeirus Munispiu Dili to’o kedas iha fatin akontesimentu hodi halo intervensaun no hamate ahi ne’ebe han uma refere.
Insidente ne’ebe akontese iha Posto Administrativu dom Aleixo, Suku Kampo Alor Aldeia ai-tarak laran ne’e tanba kauza husi fiu ne’ebe soke malu.
Jornalista : Marcela Mery da Costa