Aniceto Eleitu, Lidera ABPTL Ba Periodu 2024-2028
Imajem : Presidente Asosiasaun Boxing Profesional Timor Leste(ABPTL) Aniceto Rosario, iha Salaun Luz Clarita, Dili , 20/03/2024. Foto : Augusto dos Santos
SAPNewsTL, Dili: Aniceto Rosario eleitu lidera Assosiasaun Boxing Profesional Timor Leste(ABPTL) periodu 2024-2028 iha kongresu daruak ABPTL ho votu aklamasaun tanba pakote uniku.
“Ohin ha’u eleitu nu’udar prezidente ABPTL mandatu tinan haat, nune’e hamutuk ho hau nia estrutura sei halo servisu hodi hare’e hikas fali susesu no servisu asosiasaun halo ona para ita hare’e nu’udar lisaun hodi kontinua servisu assosiasaun nian ba oin,” dehan nia ba Jornalista sira iha Salaun Luz Clarita, Dili kuarta (20/03/2024).
Prezidente eleitu hatutan, nia mandatu sei akumula lisaun estrutura anterior iha hodi involve estrutura no membru hotu halo diskusaun para halo planu asaun promove liu tan boxing profesional iha Timor-Leste ida ne’e sei sai responsabilidade boot ba estrutura atual.
Nia informa tan, planu prioridade ba estrutura atual sira sei halo reuniaun dahuluk maibe sira objetivu prinsipal mak promove boxista amateur sira ba profesional tanba klube amateur sira iha Timor-Leste barak tebes hodi promove liu tan talentu joven sira tanba Timor-Leste potensial tebes iha modalidade boxing, istoria pasadu mos hatudu ona maibe presiza nafatin apoiu husi ema hotu liuliu governu no sosiedade atu nune’e lori Timor-Leste ba mundu, boxing profesional ne’e tenki tuir padraun internasional ho kualidade maski laos fasil tan ne’e tenki iha dedikasaun.
Iha sorin seluk, prezidente komisaun organizadora ba kongresu daruak APBTL, Domingos Mali Teti hatete, ABPTL la’os tutela ba Federasaun Amadora Boxe Timor-Leste (FBATL) maibe Asosiasaun Independente ninia hun (induk) iha nasaun Xina, Partisipa iha kongresu daruak ABPTL ne’e kongresista sira mai husi klube 5 sai hanesan membru ABPTL.
“ABPTL laos tutela ba ita nia Federasaun Boxe Amadora Timor-Leste (FBATL) maibe asosiasaun independente ninia hun (induk) iha nasaun Xina, ita nia partisipante sira iha kongresu daruak ABPTL ne’e kongresista sira mai husi klube 5, Tomas Americo Boxing Club, Fomento Boxing Club, Scorpion Boxing Club, Mascarenha Boxing Club no Cavalo Boxing Fronteira Maliana sai hanesan membru ABPTL”, tenik Domingos.
Prezidente komisaun salienta tan, depois kongresu klube 5 nu’udar membru ba ABPTL sei realiza jogu amateur no profesional tanba klube sira ne’e iha boxista amateur ho profesional, kongresu ne’e rasik hetan apoiu finanseiru husi Ministériu Juventude Desportu Arte Kultura (sigla portuges MJDAC) ho total montante orsamentu 1,832 USD.
Entretantu, kongresu daruak ABPTL hetan estrutura atual prezidente mak Aniceto Rosário, Vise-prezidente mak Aleixo Cobra no Sekretariu Jeral mak José da Cruz depois estrutura nia mandatu durante tinan haat (2024-2028).
Reportajen: Augusto dos Santos
