Apreensaun No Buska Ilegal, TDD Liberta Total Longuinhos Monteiro

SAPNewsTL, Dili: Tribunal Distrital Dili (TDD) liberta total Longuinhos Monteiro (LM) tanba apreensaun no buska ne’ebe autoridade seguransa halo iha nia rezidensia la tuir lei ka ilegamente.

“Hafoin Ministeriu Publiku halo tiha promosaun mai TDD ba ha’u nia kliente Longuinhos Monteiro depois tribunal estuda tiha detensaun apreensaun no buska ne’ebe ita nia autoridade polisia halo ba ha’u nia kliente ne’e la tuir lei ka ilegal entaun TDD deside liberta total ha’u nia kliente ba krimi arma proivida previstu iha artigu 211 husi kodigu penal Timor-Leste alerta iha lei numeru 5/2017”, dehan Defensor Publiku Fernando Carvalho ba jornalista sira iha edifisiu TDD Mandarin, Dili kuarta, (18/01/2023).

Defensor hatutan, tuir prosesu normal apreensaun no buska domisiliariu tenki legal ho baze ne’ebe tenke ho mandadu judisiariu husi TDD ne’e husi oras 06:00 dader to’o 06:00 loraik, apreensaun no buska ne’ebe autoridade polisia halo ne’e la tuir lei no prosedimentu previstu iha kodigu prosesu penal tanba halo fali iha kalan boot tanba ne’e TDD hasai despasu hodi liberta Longuinhos Monteiro.

Fernando Informa, objetu sira ne’ebe antes ne’e ekipa konjunta halo apreensaun no buska iha Longuinhos Monteiro nia uma hanesan defeza ba kliente sei lee despaisu ne’ebe maka tribunal hasai tanba tribunal halo analiza ba prosedimentu legal ne’ebe ministeriu publiku aprezenta ba tribunal kona ba apreensaun no buska autoridade seguransa halo hasoru Longuinhos Monteiro nia uma iha Loes iha semana ne’e.

“Objetu sira ne’ebe antes ne’e ekipa konjunta halo apreensaun no buska ba hau kliente nia uma, nu’udar defeza ba ha’u nia kliente sei lee despaisu ne’ebe maka ita nia TDD hasai tanba TDD halo analiza ba prosedimentu legal ne’ebe ministeriu publiku aprezenta ba tribunal kona ba apreensaun no buska autoridade seguransa halo hasoru Longuinhos Monteiro nia uma iha Loes iha semana ne’e”, tenik Fernando

Reportajen: Augusto dos Santos