Assalam & Emmanuel Prontu  Hadau Pontu Tolu iha Liga Timorense 2023

SAPNewsTL, Dili: Assalam FC ho Emmanuel FC prontu ona hadau malu pontu tolu iha Liga Timorense epoka 2023, ekipa rua sei kontra malu iha loron 21 fulan fevereiru 2023 iha Estadium Munisipal Dili.

“Ami halo ona preparasaun para rekolla  pontu tolu hasoru Emmanuel FC ne’ebe ita sei haree jogu minutu 90 mak sei determina se mak sai manan nain maibe ami otimista sei hetan pontu tolu iha jogu aban nian”, dehan Treinador Assalam FC ba jornalista sira liu husi konferensia imprensa iha Estadium Munisipal Dili, segunda (20/02/2023).

Treinador hatutan, preparasaun  durante ne’e sira halo minimu tebes maibe ba kompete iha Liga Timorense epoka ne’e, jogador sira preparadu ona fiar katak sei hatudu jogu diak para anima adeptu sira, sira nia jogador ida mak halo tratamentu tanba problema iha kondisaun fiziku maibe jogador sira seluk kondisaun fiziku diak hotu, jogador sira ne’ebe lori mai kompete iha liga tinan ne’e jogador lokal hamutuk ho estranjeiru nain neen husi Ghana no Indonesia.

Iha sorin seluk treinador Emmanuel FC Emiliano da Silva haktuir sira nia parte promove deit jogador lokal, maske nune’e maibe sira preparadu hodi enfrenta adversariu iha jogu aban hasoru Assalam FC

“Ami preparadu ona para tuir Liga Timorense epoka 2023, ami preparadu ona kontra Assalam FC iha loron aban maski ami hatene ekipa ami hasoru ne’e ekipa boot, ha’u nia ekipa la iha mudansa hau lori jogador lokal sira ne’ebe kampiaun iha divizaun daruak la iha jogador estranjeiru tanba ha’u tipu treinador promove jogador lokal sira”, tenik Emiliano

Emiliano akresenta, nia prepradu ona jogador sira liga tinan ne’e hodi kompete ho klube boot sira seluk maski sira la iha tarjetu sai kampiaun ba divizaun dahuluk Liga Timorense epoka ne’e maibe sira koko hatudu jogu diak.

Reportajen: Augusto dos Santos