“Taça Xanana 2024”: PM Xanana-Prezidente Falur Kongratula Patrosinador Sira
Imajem : Primeiru Ministru Jose Alexandre Kayrala Xanana Gusmão halo diskursu iha Estadium Munisipal Díli kinta (02/05/2024).
SAPNewsTL, Dili: Atual Primeiru Ministru (PM) Jose Alexandre Kayrala Xanana Gusmão ho prezidente interinu Federasaun Futebol Timor-Leste (FFTL) kongratula komisaun organizador no patrosinador ba Taça Rotativa Maun Boot Kayrala Xanana Gusmão 2024.
“Ha’u fo agradese tebes ba patrosinador, banku BRI Timor-Leste, Telemor, banku Mandiri, asosisaun xineza iha TL, Vernie unipessoal Lda, Dellos, Timor GAP no MJDAC tanba sira nia kontribuisaun bele lori dalan diak ba joven sira nia fiziku no mental liu husi futebol, ha’u mos kongratula komisaun organizador hotu”, dehan atual Primeiru Ministru IX governu Jose Alexandre Kayrala Xanana Gusmão ba jornalista sira liu husi diskursu iha Estadium Munisipal Díli kinta (02/05/2024).
Atual primeiru ministru ne’e hatutan, desportu futebol laos violénsia maibe desportu fo oportunidade ba jogador sira hadia sira nia kbiit no talentu iha jogu.
Xanana Gusmão informa, objetivu boot ba jogu ne’e mak kria amizade no paz, hodi hametin estabilidade iha ita nia nasaun no kontinua fo, oportunidade ba joven aira husi munisipiu sira mai partisipa hotu hodi hatudu no hadia sira talentu nune’e loron ruma bele manan Indonezia, Singapura Tailandia, Malaizia, bodi sai kampiaun iha ASEAN maibe ida ne’e tenki esforsu makaas no tau dixiplina iha ulun no hahalok.
Iha fatin hanesan, prezidente interinu FFTL Domingos Raul “Falur Rate Laek” fo parabens ba komisaun organizador sira, nia fiar katak jogu ne’e sei la’o susesu tanba futebol agora sai kultura iha komunidade nia leet, nia hakarak agradese mos patrosinador sira.
“Ha’u fo parabens ba komisaun organizador sira ba Taça Rotativa Maun Boot Xanana Gusmão 2024, ha’u fiar katak jogu ne’e sei la’o ho susesu tanba futebol agora sai kultura iha komunidade nia leet”.
“Ha’u hakarak agradese ba patrosinador sira banku BRI Timor-Leste, Telemor, banku Mandiri, assosisaun xineza iha TL, in Vernie unipessoal Lda, Dellos, Timor GAP no MJDAC tanba apoiu ona sira nia osan ho material ba jogu ida ne’e bele la’o hodi suporta joven sira”.
Prezidente interinu husu ba jogador sira joga para buka manan maibe iha manan nia laran preparadu para lakon. lakon mos ho dixiplina no dignidade, manan mos ho dixiplina no dignidade maibe labele joga bola sai fali violensia, hein katak jogador sira sei esforsu an lori sira nia talentu ho vontade no hakarak rasik.
Jogu ne’e abertura iha loron 2 fulan maiu 2024 depois sei remata iha fulan jullu maibe data seidauk konfirmadu tanba sei bazeia ba Jose Alexandre Kayrala Xanana Gusmão nia tempu, jogu ne’e realiza tanba hetan suporta masimu husi patrosinador sira no jogu sei dirije husi arbitrajen Timor-Leste.
Entretantu, jogu ne’e sei kompete husi klube 32 mak Relay Laleia FC, Buradu FC, Buruma FC, Zhavia FC, Kampo Alor FC, Mulia FC, Bita-ba, Surya Lafaek Haksolok FC, Letefoho FC, Naimeco FC, Sousa United FC, Coach Eleven FC, AS Kantada, Dark Blue FC, União Fortaleza FC, Jomar FC, Laivai Afisafa FC, UEP FC, Aimou FC, Vila Vista FC, Lecidere FC, Ostico FC, Hera United FC, AC Laporan Wekeke, Warikoan FC, Assa FC, Bairro Da Paz FC, Irmão Timor FC, Daudere United FC, Taibesse FC, Laisorulai FC no Maubale FC.
Reportajen: Augusto dos Santos