Vise PM, Assanami Preokupa Inseguransa Alimentar & Malnutrisaun
Imajem : VPM-MKAS, MDRHK Mariano Assanami Sabino Assanami iha Salaun Ministériu Finansas Aitarak-Laran, 02/05/2024
SAPNewsTL, Dili – Durante realiza workshop nivel aas kona ba asuntu sosial, Vise Primeiru Ministru, Ministru Koordenador Asuntu Sosiais, Ministru Dezenvolvimentu Rural no Habitasaun Komunitária (VPM-MKAS, MDRHK) Mariano Assanami Sabino preokupa inseguransa alimentar tanba kontribui boot tebes ba malnutrisaun
“Issue tolu (3) ne’ebe mak komplikadu no todan, nasaun hasoru desafiu boot, entaun Ita iha taks force ida ne’ebe fokus servisu ne’e ba buat tolu (3) mak Early Child Development (ECD), Nutrition & Food Security (NFS) no Youth Empowerment (YE), katak prepara kiik oan sira nia futuru ho lais, nutrisaun no seguransa alimentar, no ita tenki kapasita joven sira hodi nasaun ne’e ba oin”. Tenik VPM-MKAS, MDRHK Mariano Assanami Sabino Assanami iha Salaun Ministériu Finansa Aitarak-Laran, 02/05/2024
Vise Primeiru Ministru ne’e aprofunda, iha workshop ne’e halo diskusaun téknika ba grupu tolu (3) Dezenvolvimentu Sedu ba Labarik, seguransa alimentar ho mal nutrisaun no empoderamentu juventude.
“Ita nia nasaun hasoru problema sira ne’ebe mak boot tebe-tebes, ohin diskute asuntu tolu ne’e, oinsa ita halo preparasaun ba ita nia oan sira, investe oan sira mak hodi nasaun ne’e ba futuru, mal nutrisaun ne’ebe as tebes iha rejiaun ida ne’e, númeru um (1) ita nia problema joven ne’ebe mak ita presija prepara sira tanba futuru iha sira nia liman”.
Assanami Sabino hatutan, workshop ne’e hodi formaliza grupu refere hodi servisu diak liu tan liu husi implementasaun interministerial tanba bainhira ko’alia kona ba bebe, ko’alia kona ba saúde no edukasaun.
“Ita halo workshop ida ne’e mak formaliza, oinsa mak dudu grupu tolu (3) bele servisu diak liu husi implementasaun ne’ebe interministerial, bainhira ita ko’alia kona ba bebe liu-liu sira involve hahu eskola, ita ko’alia kona ba edukasaun no saúde.”
Governante ne’e mos preokupa kona ba inseguransa alimentar no malnutrisaun ne’e kontinua sai dejafiu ba Timor-Leste, tan ne’e nia parte hakarak investe iha setor saúde, edukasaun no agrikultura.
“Bainhira ko’alia kona ba mal nutrisaun ou insiguransa aihan, ita koalia kona ba ministeriu agrikultura ho sira seluk tanba ne’e mak situasaun lubuk boot ida mak involve”. Assanami informa
Partisipa iha workshop ne’e maka VPM-MKAS, MDRHK Mariano Assanami Sabino, parseiru sira hanesan UN Rezident Cordinator, World Bank Country Representative, Embaixador Brazil, Korpu Diplomátiku sira no selu-seluk tan.
Tuir dadus, daudaun ne’e malnutrisaun sa’e ona ba 48%, iha tinan 2023 dadus hatudu katak Seguransa Alimentar iha deit 36% tanba kauza husi menuz kontrolu no menuz investimentu ba setor save sira hanesan agrikultura, edukasaun no saude.
Jornalista : Dircia Baptista Belo