Assanami Triste, Lakon Meta-Malik Ne’ebe Nunka Sura Kolen

 

 

SAPNewsTL, Díli – Presidente Partidu Demokrátiku (PD) Mariano Assanami Sabino presta omenagem ikus ba Fundador PD, Eis Ministru Asuntu Veteranus Julio Sarmento Meta-Mali iha sede partidu kolmera.

Iha diskursu, Presidente PD Mariano Assanami Sabino ho laran triste haktuir partidu ne’e Meta-Mali hari’i hamutuk ho nia kolega sira iha situasaun difisil ho hanoin ida atu fo kontinuidade ba lutador sira nia mehi.

“Kompañeiru Meta Mali ne’e ikus ona ba ita mai vizita fatin ida ne’e, partidu ida ne’ebé iha situasaun ne’ebé difisil, maun ho kolega sira hamrik no la’o atu bele kontribui no fó kontinuidade ba lutador sira nia mehi, katak rai rai Republika no rai Demokratiku tanba ne’e ita hari partidu demokrátiku”. Tenik Presidente PD Mariano Assanami Sabino liu husi nia diskursu iha Sede PD Kolmera, 25/05/2024

Assanami Sabino hatutan, komprimisu ida mós ba lutador sira atu instala valores, no prinsipiu ne’ebé sira luta no avansa ba rai ida ne’e ho komitmentu bo’ot.

“Uluk Maun Meta-Mali la’o ho ami lubuk ida maibé ohin maun fila la’o hamutuk fali ho ami nia orasaun ho sira hotu ne’ebe maka husik ona partidu ida ne’e no rai ida ne’e ba mundu seluk”.Nia dehan

Atual Vise Primeiru Ministru, Ministru Koordenador Asuntu Sosiais, Ministru Dezenvolvimentu Rural no Habitasaun Comunitária ne’e afirma Meta-Mali bele husik fizikamente maibe ispiritualmente sei nafatin hamutuk ho Partidu Demokrátiku.

“Ikus ona maun mai vizita ami ho fizikamente maibé ami fiar katak maun nia espiritu la’o nafatin ho ami, valores ne’ebé maka maun luta, rai hela no konstrui iha partidu ida ne’e, gerasaun ba gerasaun iha paridu nia laran sei fó kontinuidade nafatin, se lahaluha Meta-Malik nia hanoin, lalaok no ideia hotu ne’ebé sai hanesan legasi ida ne’ebé maun rai hela mai partidu ida ne’e.”Assanami afirma

Mariano Assanami, saliente jerasaun no familia tenki orgullu tanba Meta-Malik rai hela nia legasi ne’e nia rasik hari’i hamutuk ho nia maluk sira tanba ne’e oan no beioan sira nia uma lisan iha ne’e.

“Imi tenke orgullu katak aman ida ne’ebé karik la rai riku ba imi maibe nia rai hela legasi istória, luta ba rai ida ne’e atu liberta no kontinua hamrik ho vontade tomak, totalidade tomak hodi kontinua luta ba rai ida ne’e, ida ne’e maka rikusoin seluk ne’ebé imi lahare ho matan no kaer ho liman maibe ida ne’e maka prinsipiu valor ne’ebé maka sei puro ba imi, bei-oan sira no ba gerasaun puru, ran rezistensia ida ne’ebé la sura nia kolen ba rai ida ne’e.” Nia fundamenta

“Ami mos ho laran no domin tomak ami husik ona maun ba Maromak, buat hotu ne’ebé maun halo iha rai ida ne’e, halo hasoru militante no kuadru sira, lider sira, ha’u reprezenta maun Meta Malik atu husu ba imi hotu ho imi nia laran no fuan, buat hirak ne’e rai hela sai hanesan memoria, no ita husik hela ita nia maun fila ba Aman Maromak, maun sei fila ba iha rai moris fatin ne’ebé maka sei halot sai hasesan jardin ne’ebé buras nafatin nia valor no prinsipiu”. Mariano Assanami Sabino hateten.

Antes ne’e, Familia realiza misa requem ba Saudozu Meta Malik iha igreja Balide, kontinua translada mate isin ba presta omenagem iha Gruta Nossa Senhora Aituri-Laran, Ministériu Asuntu Veteranus, Sede PD no Conselho Combatente da Libertação Nacionál (CCLN), hafoin lori ba nia rai moris fatin postu administrativu Maubessi, Munisipiu Ainaru.

Familia hakoi ona Saudozu Julio Sarmento Meta Malik iha postu Maubessi iha loron 26 Fulan Maiu 2024.

Jornalista : Marciana da Conceição & Conzita Mota