Asaun Ba Justisa Klimátika ! Oxfam & AJTL Forma Jornalista Ba Terenu

SAPNewsTL, DILI – Oxfam no AJTL forma jornalista na’in 17, molok sira hala’o media tour ba asaun justisa klimátika iha Munisipiu Lautém.

Reprezenntante Asosiasaun Jornalista Timor-Leste (AJTL) Acasio Pinto hatete, Oxfam Timor-Leste no Asosiasaun Jornalista Timor-Leste (AJTL) serbisu hamutuk hodi forma Jornalista 17 bá atividades, média tour liga ba asaun bá Justisa Klimatika iha Munisipiu Lautem Postu Lore.

“Formasaun bá kada Jornalista husi media ida ema ida durante loron rua (27-28/05),  ho tema maka “hametin Média no Jornalista nian papel hodi halo kampanha advokasia bá Justisa Klimatika”, atividades média tour sei hala’o durante loron tolu hahu 29 to’o 31 Maiu iha Lore, Munisipíu Lautém”. Tenik Acasio Pinto ba Jornalista sira iha Salaun Oxfam Hudi Laran, 27/05/2024

Representante AJTL ne’e akresenta, formasaun ba kolega Jornalista husi kada media ne’e hanesan materia baze ida kona-ba mudansa klimatika ne’ebé globalmente mundu hasoru inklui Timor-Leste, ida ne’e bele fasilita ona Jornalista nia kobertura ba média tour iha Postu Lore, Munisipiu Lautém.

“Reprezenta AJTL atu loke Workshop bá loron ohin ne’e loloos Prezidente mak mai, maibé nia iha hela viajen, ita mós konvida ita nia parseiru hanesan PERMATIL atu fahe ninia esperiénsia sira durante ne’e halo oinsá prevene ba mudansa klimátika, globalmente nasaun hotu hasoru inklui Timor-Leste”. Nia informa

Nia dehan, AJTL serbisu hamutuk ho Oxfam Timor-Leste iha inisiativa hakarak apoiu Jornalista Timor oan sira kada Instituisaun media halo kobertura direita bá Munisípiu liu-liu iha área rural sira.

“Iha tinan hirak liu ba kotuk, ita ho tema hanesan ita halo iha Oekusse no Ermera, agora tinan ida ne’e foin dadauk ita halo ne’e ho tema seluk ne’e bá Ermera, agora ita bá fali Lore iha Munisípiu Lautém,” nia dehan.

Acasio informa, “Iha ne’eba estrada mós aat, karik udan boot bele halo estrada ne’e kuak ka aat liu tan, depois iha ne’eba mós Parseiru Oxfam nian ne’ebé sira halo Grupu hortikultura no mós Grupu joven kreativu sira ne’eba, entaun ita sei bá hasoru sira iha Lore,” dehan nia.

Acasio salienta, iha workshop ne’e marka presenza mos husi PERMATIL no ONG La’o Hamutuk, instituisaun rua ne’e apresenta matéria ba jornalista sira oinsa bele fasilita jornalista halo kobertura iha terenu kona ba mudansa klimátika.

“PERMATIL ho ONG La’o Hamutuk sira aprezenta bá ita oinsá atu lori materia ne’ebé durante ne’e ONG rua ne’e halo ona, PERMATIL foka barak liu kona-ba konserva Debu nia impaktu ba mudansa klimatika no La’o Hamutuk aprezenta kona-ba dadus orsamentu ne’ebé mak durante ne’e Governu aloka iha mudansa Klimatika,”

Dadus ne’e importante atu bele sai hanesan background notisia hodi sita, Tanba tinan 2024, Governu aloka orsamentu hanesan ne’e ho parseiru International husi nasaun boot sira investe bá nasaun ne’ebé ki’ik hanesan iha Timor investe kona-ba rai matak.

“Diskusoens ida ne’e mak sei lori ita boot sira ba ne’eba bele tau inisiativa kobertura iha inisiativa seluk ka Asuntu seluk la liga ho mudansa Klimatika mós ita bele halo, maibé ida ne’e mak ita sei bele fokus, ita bele hetan tarjetu ne’ebé mak iha”.

Jornalista bele halo kobertura mos kona ba infraestrutura, agrikultura, edukasaun, saúde no ekonomia.

“Hadia infrastrutura bázika sira fó apoiu ba ita nia grupu Agrikultor sira para bele kontribui iha produsaun, iha setór edukasaun kona-ba fasilidade sira iha eskola, iha Sentru Saúde no Postu Saúde sira ne’e tenke hetan atensaun, tanba ida ne’e nesesidade báziku ne’ebé ke kabe direitu sidadaun sira nian, ne’ebé nia tenke hetan ida ne’e urjensia liu duke bá halo sasán sira ne’ebé sei presiza mais la’os tempu agora”.Nia hameno

Iha Fatin  hanesan, Diretor programa  Oxfam iha  Timor Leste Fausto  Ximenes Bemo hateten durante loron rua jornalista sira tuir ona workshop, papel jornalista importante  los bainhira ba halo kobertura iha issue importante  sira no mudansa klimatika.

“Papel jornalista importante ba halo kobertura kona ba mudansa klimátika, Ha’u senti kontenti tanba  entre jornalista sira iha tour ne’e mesak joven deit, ida ne’e hanesan   futuru lideransa  ba nasaun nebe  tenki halo serbisu ho diak”. Fausto Ximenes Bemo haktuir

Diretor ne’e hatutan, durante ne’e Oxfam serbisu hamutuk  parseiru lokal barak maibe ba assosiasaun  jornalista Timor Leste ne’e hanesan etapa foun no espasu foun ida ne’ebe Oxfam implementa.

“AJTL serbisu hamutuk ho Oxfam iha tinan rua kotuk, bainhira dezenha programa oinsa mak implementa programa sira no media Tour sira ne’e, entaun ida ne’e hanesan buat foun Oxfam, senti interesante boot ba ami tanba serbisu jornalista ne’e importante, Jornalista sira atu halo ba espasu siviku ne’ebe envolve ema hotu ba asaun ne’ebe interesante públiku nian”. Nia fundamenta

“Ita haree Timor no mos nasaun seluk mos ladun tau importansia ba mudança klimátika, no balun la fiar katak  mudansa klimátika ne’e bosok maibe iha sientífiku ne’e ita hare katak mudansa klimátika ne’e akontese duni iha ita nia moris”.

Enkuantu, Oxfam ho AJTL serbisu hamutuk ne’e ho objetivu  hodi haforsa no fo prioridade ba asuntu mudansa klimátika iha Timor-Leste.

Jornalista : Ermelinda Soares