Biblioteka & Laboratóriu Nu’udar Dapur Matenek Nian Ba Estudante

Imajem : Presidente Assosiasaun Sergio Alves da Costa halo diskursu iha auditorium kampus UNTL Hera, 04/05/2024. Foto : Marcela Mery da Costa

SAPNewsTL, Dili : Presidente Assosiasaun Estudantil, Fakuldade Enjenharia Siénsia no Teknolojia, UNTL Sergio Alves da Costa husu estudante hotu hodi badinas vizita universidade nia dapur tolu maka kantina, biblioteka no laboratóriu tanba dapur rua seluk ne’e nu’udar dapur matenek ba estudante ba estudante sira.

Iha festa amizade ne’ebe hala’o iha auditorium hera, Senadu Estudantil Fakuldade Engenharia Siénsia no Teknolojia, Universidade Nasional Timor Lorosa’e (FEST-UNTL) Sergio Alves da Costa husu estudante hotu hodi badinas vizita dapur universidade nian liliu biblioteka no laboratorium universidade nian hodi dezenvolve kapasidade ensinu, peskija no dedikasaun komunidade.

“Ita FEST-UNTL iha dapur tolu maka 1. kantina ne’ebe ita uza hodi ense kabun, 2. Biblioteka maka fatin ida ne’ebe ema bele vizita hodi lee, buka referénsia no dezenvolve kapasidade, 3. Laboratóriu maka fatin ne’e orienta ba kunhesimentu prátiku estudante sira nian. Entaun fatin tolu ne’e ita presiza ba vizita, se estudante mak la esforsu hodi lee no la estuda maka hanesan manu ne’ebe laiha liras, manu laiha liras, konserteza hasoru ameasa ruma nia labele semo no salva an”. Tenik Presidente Assosiasaun Sergio Alves da Costa liu husi diskursu iha auditorium hera, 04/05/2024

Imajem Partisipante Semináriu no Festa Amizade estudante foun tinan 2024 iha auditorium hera

Senadu estudante ne’e fakuldade engenharia ne’e hatutan, foinsa’e estudante maka fini, futuru no esperansa ba familia, sosiedade no nasaun tan ne’e tenki ativa iha leitura, estuda no aprende tanba jerasaun milenial maka sei kontinua lori nasaun ba oin.

“Ita foinsa’e sira asume responsabilidade boot ba nasaun, ita mak fini, futuru no esperansa ba familia, sosiedade no nasaun nian, tanba ne’e ita tenki lee, lee no lee, estuda, estuda no estuda nafatin. Tanba se o hakarak haree loron matan nia naroman no nabilan ne’ebe furak iha tempu dader, entaun keta hader tarde maibe koko hader sedu beibeik”.

“Se o hakarak sente mundu ne’e nia hakmatek, keta toba sedu maibe toba tarde, mehi ba susesu la’os ko’alia, ko’alia ba susesu la’o tur, maibe tenki aktualiza iha asaun tanba mudansa la mai husi liafuan, mudansa la mai deit liu husi orasaun, mudansa la hein milagre, mudansa ne’e mai husi dedikasaun no sakrifisiu ne’ebe forte”.

Liga ba festa amizade refere, Sergio da Costa husu estudante hotu labele hanoin halo festa no dansa deit maibe buka aprende barak liu husi semináriu no workshop sira ne’ebe bele kobtribui ba bem estar ida idak nian.

“Festa amizade laos deit tenki dansa, festa ne’e fo reflexaun ba ita hotu atu hatete, se maj ha’u, ha’u mak se, husi ne’ebe, atu ba ne’ebe no agora iha ne’ebe, orseik halo saida, ohin atu halo no aban atu halo saida, saida mak diak no saida mak sala, ita tenki hanoin oinsa hadia ita nia personalidade no kualidade ba futuru”. Sergio Alves da Costa hateten

Lider Estudante ne’e husu estudante UNTL hotu hodi hatene respeitu malu, rona malu, hadomi malu, tulun malu no labele kria konflitu ka rai odiu ba malu iha UNTL liliu iha Fakuldade Enjenharia Siénsia no Teknolojia.

“Iha fakuldade ida ne’e, ita tenki mantein ispiritu fraternidade, solidariedade no unidade hodi hatudu dixiplina, respeita malu, hadomi  no tulun malu hanesan maun alin iha Uma lulik  UNTL, kuartu sagradu FEST”. 

Iha serimonia festa amizade ne’e, Estudante foun kontizente 2024 realiza mos semináriu ne’ebe prense husi Pro Reitor Asuntu Informatizasaun, no Transformasaun Digital no Inovasaun (PRAITDI) Frederico Soares Cabral ne’ebe ko’alia kona ba Importansia Dizitalizasaun Iha UNTL, Entre dejafiu no Oportunidade.

Enkuantu, iha atividade ne’e hetan partisipasaun maximu husi estudante foun hamutuk 405, estrutura fakuldade no senadu fakuldade sira iha UNTL.

Jornalista : Dircia Baptista Belo