Breaking : Daniel Halakon Prastio Iha HSN ! Délio & Saroha Sei Hasoru Malu Iha Jullu

Imajem:  Daniel Asis Belo & Prastio, Delio Mouzinho  no Saroha iha Atlas Super Club Bali. Foto: Sosial Média

SAPNewsTL, Indonésia : Boxista timoroan Daniel Asis Belo halakon nia adversáriu Prastio hosi Indonesia iha eventu “The New Matchday Rundown | Holywings Sport Night (HSN) Volume 9 iha Atlas Super Club Bali.

Tuir transmisaun direta ne’ebe Sapnews.com asesu liu hosi YouTube Paris Pernandes hatudu katak Daniel Asis Belo domina jogu husi ronde dahuluk to’o daneen (1-6).

Durante jogu Boxista timorense ne’e tuku makaas hasoru nia adversáriu, kontrola an no hatudu performansia to’o jogu termina iha ronda daikus.

Nune’e, ekipa juri fo sai resultadu katak Boxista Daniel sai manan na’in no simu premiu ho piala ida, vitória ne’e daniel hetan ona ba dala lima iha nia kareira boxing.

Iha tempu hanesan, Boxista Délio Anzaqueci Mouzinho mós halo ona face off ho Boxista Indonesia Saroha hodi deklara prontu hasoru malu iha fulan Jullu 2026.

Boxista Indonesia Saroha hateten, Délio seidauk kunhese nia, tanba ne’e nia husu Délio atu treinu ho didiak molok hasoru malu.

“Treinu didiak, karik seidauk kunhese ha’u, ha’u sei hanorin iha ring leten”. Deklara Boxista Saroha iha Bali, 17/05/2026.

Relativamente ho pozisaun ne’e Délio Mouzinho responde katak nia parte prontu hasoru nia iha fulan Jullu mai.

“Prontu hasoru, depois ita sei haree se mak diak liu iha ring leten, até Jullu”. Dehan Délio.