CDTL Realiza Simpóziu Nasionál, Tansá Desportu La Ba Oin ?
SAPNewsTL, Dili: Konfederasaun Desportu Timor-Leste sigla portuges (CDTL) realiza simpóziu nasionál desportu tanba hakarak lori joven sira kunese no la kunese desportu atu mai ko’alia sai tanba sa desportu iha Timor-Leste labele ba oin no halo protesta ba dezenvolvimentu desportu.
“Ha’u kontente hamriik iha oin, atu bele hahu ita nia atividade simpoziu nasional desportu iha loron ohin liu husi simpoziu ida ne’e ami husi CDTL hakarak lori joven sira kunese no la kunese desportu atu mai ko’alia sai tanba sa desportu iha Timor-Leste labele ba oin”,
“Halo protesta ba dezenvolvimentu desportu tanba tinan 20 ita ukun rasik an no nasaun sei joven hela tan ne’e ita tenki iha idea dezenvolve desportu”, dehan Presidente CDTL Macario F. Sanches ba jornalista sira iha salaun CNE Caicoli, Dili sexta (15/09/2023)
Macario hatutan, Iha simpoziu ne’e iha diskusaun panelista sira husi eis atleta, eis sekretariu estadu juventude no desportu, eis diretor jerál turizmu no bainaka espesial vise prezidente KONI husi Indonesia, fahe sira nia esperensia kona ba mudansa mentalidade joven desportista
“Hein katak hanoin sira husi panelista bele fo hanoin diak ba mudansa mentalidade joven desportista para ba oin Timor-Leste kompete no Timor-Leste prestasaun.” Nia subliña
Iha fatin hanesan, Ministru Juventude Desportu Arte Kultura Nelio Isaac Sarmento hatete, iha simpóziu ne’e atu diskute importansia desportu iha Timor-Leste tanba nasaun foun hasoru problema barak nune’e ezizi setor ida susar tanba estadu tau atensaun ba setor hotu iha Timor-Leste
“Ohin ita hamutuk iha simpóziu nasional ne’e atu diskute importansia desportu iha ita nia rain, ita nia rain hanesan nasaun demokratiku ida, ita nia nasaun foun nune’e situasaun hasoru problema barak tan ne’e estadu sei tau atensaun ba setor hotu”,
“Ita ezizi setor ida susar tanba setor seluk mos ezizi hanesan edukasaun, saúde, agrikultura no infrastrutural, estadu investe barak iha setor haat ne’e nune’e area desportu hetan apoiu husi estadu pursentu kiik liu kompara ho setor sira seluk estadu tau atensaun maibe iha inisiu tinan 20 mai ita sente desportu modalidade importante laos atu ezizi orsamentu barak maibe atu hamosu koezaun sosial iha ita nia sosiedade”, tenik Nelyo
Ministru informa tan, modalidade desportu kria paz maibe dezde Timor-Leste ukun an pratikante desportu kria mos konflitu tanba Timoroan seidauk tau atensaun iha fair play (spotifitas) no desportu atu buka inimigu maibe tuir lolos iha desportu lakon ho manan laos problema maibe lakon ho manan halo kolega
Tan ne’e iha programa IX governu tau prioridade masimu ba atividade desportu, atu hahu atividade desportu tau atensaun laos deit iha atleta maibe organizasaun iha responsabilidade interna.
Nelyo afirma tan, responsabilidade interna ne’e ko’alia ba federasaun sira tanba federasaun barak seidauk iha kondisaun hari’i tiha ona federasaun depois mos la iha atividade garante organizasaun tan ne’e iha periodu governasaun ida ne’e
Primeiru Ministru informa ona katak oinsa atu fortifika organizasaun para realiza atividade desportu, orsamentu ba realiza atividade governu garante orsamentu naton atu apoiu ba federasaun tanba governu fo prioridade ba atividade desportu no hari’i infrastrutura sira
Durante ne’e lao ona infrastrutura naton maibe atividade beibeik fo vantajen ba atleta sira atu pratika desportu iha sira nia moris loron-loron, tuir lolos atu mudansa mentalidade joven desportista ne’e hahu kedas husi eskola maibe kuaze iha munisipiu hotu eskola sira la iha fatin ba atividade desportu.
Entretantu, panelista iha simpóziu nasionál ne’e mak eis sekretariu estadu juventude desportu Osorio Florindo da Conceição, eis atleta Fidelia Ferreira ho Luisa dos Santos, eis diretor turizmu no bainaka espesial husi Vise Prezidente Komite Olahraga Nasional Indonesia.
Partisipa iha simpoziu nasional ne’e bainaka espesial husi Komite Olahraga Nasional Indonesia, ministru juventude desportu arte kultura Nelyo Isaac Sarmento, reprezentante prezidente republika, embaixador Malaysia ba Timor-Leste, estrutura federasaun, atleta, estudante ensinu baziku no sekundaria sira no simpoziu ne’e CDTL realiza ba daruak.
Reportajen: Augusto dos Santos