CNRT & KHUNTO Husu IX Guvernu Konstrui Edifísiu Foun PN
SAPNewsTL,Dili: Bankada Partidu Kmanek Haburas Unidade Nasional Timor Oan (KHUNTO) no Bankada Partidu Kongressu Nasional Rekonstrusaun Timorense (CNRT) husu ba governu tuir mai bele realiza programa harii edifisiu foun Parlamentu Nasional (PN) iha Hera.
“Durante tinan lima nia laran ita tau ona orsamentu ba konstrusaun edifisiu parlamentu Nasional foun no konsege ba identifika ona rai iha Hera maibe to’o agora informasaun konaba edifisiu refere ami deputadu ami la hetan ona nune’e orsamentu gasta hira ita la hatene to’o agora tan ne’e ami husu ba governu foun mai atu realiza programa konstrui edifisiu PN foun ne’e”, dehan Xefe Bankada CNRT Duarte Nunes ba jornalista sira iha sala bankada CNRT (31/05/2023).
Xefe Bankada CNRT hatutan, informasaun ba konstrusaun refere husi meza parlamentu rasik mak bele fo sai situasaun lolos esforsu iha tinan lima to’o iha ne’ebe ona no mos hatutan husi tinan lima mai to’o agora seidauk nafatin agora sira hanesan deputadu seidauk hetan informasaun kontinuasaun ba ida ne’e ba ida ne’e.
Iha sorin seluk, Deputadu husi Bankada KHUNTO Antonio Verdial hatete, sira laran susar tanba iha legislatura da-haat parlamentu nasional hasai osan lubun wain maibe la iha rezultadu to’o agora nune’e husu ba governu foun favor tau ba ajenda nafatin hodi hari’i edifisiu PN foun ida ne’ebe dignu.
“Ami husu nafatin bainhira legislatura da-neen hahu nia funsaun favor ida tenki agenda nafatin assuntu ida ne’e tanba ne’e importante ba povu no mos nasaun TL, oinsa harii fatin ida ne’ebe dignu ba ita hotu, harii edifisiu parlamentu nasional foun VIII governu no V legislatura la konsege nunee favor ida bainhira governu da-sia hahu nia funsaun tenki prosesa nafatin hodi harii edifisiu parlamentu nasional foun iha Timor Leste”, tenik Antonio Verdial
Nia informa, nu’udar kandidatu ida ba deputadu VI legislatura bainhira hala’o nia funsaun sei fo liman ba malu hodi ajuda meza PN atu harii edifisiu foun PN nian, tamba realidade komisaun espesializada husi A too G la iha kondisaun estavel
Nune’e, husu deputadu hotu bainhira hala’o ona funsaun ba VI legislatura tenki harii ona edifisiu foun, dignu ba funsionariu sira hala’o servisu ba povu no nasaun.
Antonio haforsa tan, prossesu atu harii no halo konstrusaun ba uma fukun Parlamentu Nasional foun ne’e importante tanba hanesan reprezentante povu presiza iha fatin dignu, mandatu ba V legislatura atu hotu dadauk ona maibe la konsege harii edifisiu Parlamentu foun nune’e husu ba governu foun atu agenda nafatin tamba ne’e importante.
Jornalista: Ermelinda Soares