Cristovão Husu Estudante UNTL, Brani Ko’alia Lialos

SAPNews TL, Dili: Senadu Estudantil Fakuldade Direitu Cristovão de Araujo husu estudante hotu iha Universidade Nasional Timor-Lorosa’e (UNTL) hodi brani fo sai ka ko’alia lialos ba públiku katak wainhira dosente los dehan los no sala dehan sala.

Senadu Estudantil saran lia hirak ne’e, hafoin hetan krítika husi estudante sira iha loron 12 Abril ligadu ho deklarasaun ne’ebé fó sai hosi nia maluk estudante fakuldade direitu UNTL, kona ba komunikadu imprensa ne’ebe estrutura Associação Acadêmica Estudantil da Faculdade de Direito halo iha loron 2 Fulan Abril.

Komunikandu imprensa ne’ebe sira realiza ohin ne’e, laos organiza husi Associação Acadêmica Estudantil da Faculdade de Direito da UNTL (AAEFD-UNTL), ne’e grupu ilegal kiik oan ida ne’ebe eziste iha Fakuldade Direitu.

“Maibe la buat ida, tanba sira ko’alia ona ba publiku maibe pozisaun nu’udar Senadu Estudantil Fakuldade Direitu, atu dehan deit katak durante prosesu ne’ebé maka liu ona ita kolabora ho estudante sira, sempre komunika ho chefi da turma sira, halo reuniaun ho estudante sira depois de reuniaun ita hato’o mai estrutura Fakuldade, hodi halo reuniaun ho estrutura Fakuldade atu bele rezolve problema sira ne’ebe durante nee estudante sira enfrenta”. Tenik Senadu Fakuldade Direitu UNTL Cristovão de Araujo ba Jornalista iha kampus Sentral UNTL, 12/04/2024.

“Depois de ita hato’o ba estrutura Fakuldade liu hosi karta, halo reuniaun ho Vise Dekana Asuntu Estudantis, aleinde ida ne’e ita mos hasoru estrutura universidade atu bele rezolve problema sira ne’e, depois de hasoru estrutura universidade, maibe ikus mai la konsege rezolve tuir prazu ne’ebe mak ita iha liuliu ba estrutura fakuldade, Tanba ne’e mak ita deside halo konferénsia imprensa iha dia 02/04/2024 semana kotuk liu ba”.

Senadu Fakuldade Direitu Cristovão hateten antes atu halo konferensia imprensa sira mos halo reuniaun ho estudante sira kona-ba problema sira ne’ebe sei infrenta, depois de reuniaun hotu hafoin hasai ba públiku.

Nia afirma, assosiasaun rezeita deklarasaun ne’ebe maka sira fó hatene katak asosiasaun laiha kordenasaun ba sira, ne’e informasaun falsa no lalos, dala ida tan assosiasaun estudantil rezeita sira nia deklarasaun katak assosiasaun la halo enkontru ho sira, ne’e informasaun falsa.

“Durante ne’e assosiasaun halo kolaborasaun no reuniaun ho estrutura da turma no inklui mos halo reuniaun ho estudante sira, maibe sira ne’ebe ohin halo konferénsia da imprensa durante nee la hola parte iha reuniaun, la partisipa iha reuniaun sira, tanba ne’e maka sira lahatene prosesu hafoin sira bele kestiona i sira kestiona kona-ba asosiasaun nia aktu.”

“Hanesan Prezidente Asosiasaun Akademiku Estudantis fakuldade direitu, hatete katak “saida mak akontese iha Fakuldade Direitu ne’e Senadu iha papel importante atu ko’alia, primeiru ita tenta rezolve interna, se ita ko’alia ho fakuldade direitu mak lakoi atu rezolve, i klaru katak ita tenke foti medida seluk ida atu bele iha solusaun ba problema ne’e”.

Senadu Estudantil Fakuldade Direitu Cristovão de Araujo husu estudante hotu iha Universidade Nasional Timor-Lorosa’e (UNTL) hodi brani fo sai ka ko’alia lialos ba públiku”.

“Ita estudante direitu tenke brani atu koalia buat ne’ebe los, ita tenke hatete sai dosente ne’ebe maka viola regra, hatete sai dosente ne’ebe mak la kumpri regra, hatete sai dosente ne’ebe maka viola estudante nia direitu, Ita tenke koalia atu nunee bele hetan atensaun masimu husi ita nia entidade hotu hotu, tanba Iha instituisaun Estadu ema hotu presiza fó nia kontribuisaun, liuliu hanesan Universidade Nasional Timor Lorosa’e (UNTL) presiza ema hotu nia kontribuisaun atu bele garante dezenvolvimentu ne’ebe diak iha UNTL”. Nia husu

Assosiasaun akademiku estudantil realiza konferensia imprensa atu defende direitu estudante nian, tanba asaun ne’ebe halo liu hosi konferensia imprensa ne’e asaun pozitiva atu kontribui ba mellora sistema iha Fakuldade Direitu, kontribui atu garante dosente hotu labele viola diteitu estudante nian.

“Hau nia kolega sira ida dadaun halo hela konferensia imprensa sira mos sai hanesan vitima ba dosente sira nia aktu, dosente ne’ebe halo sira sai vitima sira la kestiona ida ne’e, asosiasaun foti pozisaun atu defende sira nia direitu, sira kestiona fali, husu ba kolega estudante sira hotu mai iha Fakuldade Direitu labele hakruk ba dosente, dosente ne’ebe sala tenke dehan sala no dosente ne’ebe halo los tenke dehan los”. Nia hatutan.

Senadu Fakuldade Direitu Cristovão de Araujo hateten, estudante tenke lee regulamentu akademiku, tenke lee estatutu UNTL no kodigu luta UNTL atu nune bele entende, bainhira halo asaun karik tama iha asaun koridor legal labele tuir asaun vontade ema ida nian.

Entretantu, konferensia imprensa ne’ebe assosiasaun halo la estraga Fakuldade nia naran, nunka atu estraga Fakuldade nia naran diak, bainhira estraga Fakuldade nia naran mak lori fakuldade ba halo problema no lori Fakuldade nia naran ba apoiu partidu ida, no lori fakuldade ba halo kobransia ilegak nee mak hatun fakuldade nia naran, no estraga fakuldade nia naran diak.

“Se ita hamutuk ho estudante no ezize estrutura univeridade, estrutura Fakuldade atu kumpri regra, atu rezolve problema estudante nian née la afeta ba naran diak Fakuldade nian”.

Antes ne’e, Estudante Jose da Costa haktuir sira nia parte hamutuk halo komunikadu imprensa hodi kontra pozisaun assosiasaun estudantil kona ba problema sira ne’e kestionadu tanba konsidera assosiasaun haree problema ho pessoal dosente sira nia hahalok maibe la haree ba problema institusional katak problema hirak ne’e mosu tanba mal jestaun husi Magnífiku Reitor ho nia estrutura tanba la rekruta dosente sira ho númeru ne’ebe naton ba fakuldade direitu.

“Ami konsidera sira la haree problema ho klean maibe foti konkluzaun sedu iha minutu balun nia laran hodi kestiona deit aktu pessoal dosente balun nian, maibe la haree ba mal jestaun hosi reitor UNTL ho estrutura universidade”. Jose da Costa hateten.

Relasiona ho kazu ne’e, tuir informasaun ne’ebe SAPNewsTL asesu katak estrutura fakuldade sei halo reuniaun hamutuk hodi rezolve problema refere iha tempu badak tanba antes ne’e dosente la tama tuir oráriu, abandona aula, taka sai valor tarde no valor estudante balun lakon. Nune’e assosiasaun foti medida hodi kestiona.

Jornalista : Marciana da Conceição