Dahuluk Iha Jornada UNTL, Engenharia Sivil Presta Klasifikasaun A Husi Akreditasaun ANAAA
Imajem Intervista Diretor Departamentu Alfredo Ferreira iha Kampus FEST-UNTL Hera, 19/01/2023
SAPNewsTL, Dili: Iha Ambitu Estudante Departamentu Engenhara Sivil Fakuldade Engenharia Siensia no Teknolojia UNTL hala’o apresentasaun Proposta Monografia iha Kampus UNTL Hera, Diretor Departmentu Engnharia Sivil Alfredo Ferreira hatete,Primeira Vez iha istoria Universidade Nasional Timor Lorosa’e hetan akreditasaun ho valor A husi Ajénsia Nasionál ba Avaliasaun Akreditasaun Akadémika (ANAAA) iha tinan 2022
“Iha avaliasaun programatiku husi Ajénsia Nasionál ba Avaliasaun Akreditasaun Akadémika (ANAAA) iha tinan 2022, iha fulan hira liu ba nia rezultadu Departamentu Enjinaria Sivil, Fakuldade Enjinaria UNTL hetan klasifikasaun (A), no rezultadu ida ne’e mai husi koperasaun ne’ebe serbisu hamutuk iha parte fakuldade, departamentu no UNTL tomak ne’e mak hetan rezultadu A”. tenik Diretor Departamentu Enjenharia Sivil Alfredo Ferreira iha Kampus UNTL Hera, 19/01/2023
Diretor Departamentu ne’e konsidera, klasifikasaun A hanesan responsablidade bo’ot ida atu bele hadia no prepara diak liu tan alumni sira,tantu estudante ativu sira hodi bele hetan kualidade ne’ebe diak liu tan hodi serbi iha merkadu servisu nian
Antes ne’e, Reitor Universidade Nasional Timor Lorosa’e João Soares Martins haktuir iha nia pajina Privadu Facebook João Soares, katak nia sente orgullu tanba iha istoria UNTL, Departamentu Engenharia Sivil UNTL hetan valor A husi Ajénsia Nasionál ba Avaliasaun Akreditasaun Akadémika (ANAAA)
Reitor UNTL mos apresia no parabeniza Estrutura Fakuldade Engenharia Siensia no Teknolojia, liliu Departamentu Engenharia Sivil hamutuk ho nia Korpus Dosentes, Staf, Estudantes ativu sira no alumni sira ne’ebe kontribui maximu iha momentu avaliasaun
Imajen Apresentasaun Poster Monografia Iha Kampus Fakuldade Engenharia Siensia no Teknolojia UNTL Hera, 19/01/2023
Entretantu, antes ne’e Vise Reitór ba Asuntu Akadémiku no Garantia Kualidade Profesór Dr. Samuel Venâncio de Sousa Freitas, ne’ebe SAP News asesu liu husi Pajina Ofisial UNTL, hateten kursu ida husi Fakuldade Enjeñaria Siénsia no Teknolojia (FECT) mak akreditadu A ho valór exelente liuhusi avaliasaun ne’ebé halo husi ANAAA iha 2022.
“Iha 36 kursu ne’e mak hetan ona akreditasaun, husi kursu hirak ne’e Departamentu Enjeñaria Sivil husi Fakuldade Enjeñaria Siénsia no Teknolójia (FEST) mak akreditadu A ho nia valór exelente reprezenta persentajen (90%), aleinde ne’e, kursu 13 mak hetan valor B no 22 mak akreditadu C”, dehan Vise Reitor ne’e iha Kampus Sentral UNTL nian, Díli (16/01)
Kursu hirak ne’ebé hetan Valor B mak hanesan Departamentu Formasaun Profesór no Ensinu Básiku, Língua Ingleza, Komunikasaun Sosial, Parteira, Enfermajen, Medisina Jeral, Enjeñaria Mekánika, Enjeñaria Eletrónika no Elétrika, Enjeñaria informátika, Jestaun, Agronómia, Fakuldade Siénsia Ezata no Fakuldade Direitu.
UNTL iha Kursu hamutuk 41 no iha 5 mak seidauk hetan avaliasaun husi ANAAA mak hanesan kursu Siénsia Biomédika no Labortóriu, Peskas no Siénsia Mariña, Siénsia Solo, Pre-Escolar, Inklusaun Komunitária Sosial sira-ne’e mak seidauk hetan avaliasaun tanba seidauk iha graduandu.
Enkuantu, Alfredo afirma tan, iha futuru sei serbisu makaas, liliu ba professor sira no ba estudante sira tenki badinas estuda, badinas peskija, badinas buka no lee referensia atu bele asegura nafatin klasifikasaun A ne’ebe mak hetan ona, departamentu enjinaria civil husi 2018 to’o agora produs estudante lisensiatura kuaze nain- 200 resin graduadu no estudante ativu kuaze nain- 500 resin
Jornalista : Antonio Altamirando