Deskonfia Militante KHUNTO Lelan Material UKL, Deputadu Luis Konsidera Propaganda Falsa

SAPNewsTL, Dili: Militante Partidu KHUNTO iha Atabae deskonfia lelan material ba konstrusaun Uma Kbi’it Laek, tan ne’e husu Ministeriu Administrasaun Estatal (MAE) halo investigasaun ba asuntu ne’e.

“Ha’u simu telefone husi komunidade feto faluk ida iha suku Atabae ne’ebe hetan UKL agora nia prosesu konsrtusaun hela maibe material ne’ebe lori ba rai atu halo konstrusaun hanesan besi no sementi, partidu Khunto ne’ebe mak kaer hela ukun haruka ninia estrutura iha baze ba foti hotu tiha material sira hodi dehan, hein imi ukun ba mak kontinua konstrusaun ne’e”, dehan Deputada Bankada CNRT Maria Barreto Gorimali ba jornalista sira iha Parlamentu Nasional segunda (16/01)

Maria hatutan, UKL ne’ebe agora ninia konstrusaun foin to’o iha sinta jeral husu ba governo liu- liu MAE atu delega ekipa ida hodi tun ba halo investigasaun, Husu mos ba PDHJ ho KAK atu tun ba hodi rona direita husi inan faluk ne’e, ne’ebe hetan apoiu husi governo maibe ukun nain husi governu ida ne’e nian haruka fali ninia membru ba foti hotu tiha material sira ne’e, simenti sira ne’ebe sira ba foti agora sira uza ba halo tiha sira nia uma, atu klaru liu halo investigasaun klean.

Iha fatin hanesan deputadu bankada KHUNTO Luis Roberto hatete, relasiona ho UKL ne’ebe dehan katak estrutura partidu Khunto nian tun ba impede ka foti fila fali material ne’ebe mak atu halo uma kbi’it iha Atabae ne’e informasaun ne’ebe la los, sira nia partidu nunka halo propaganda falsu ka bosok ema tun sa’e ne’e laiha, material ne’ebe atu halo ba povu kbiit laek ninia uma ne’e imposivel tebes.

“Ami nia estrutura partidu nian tun ba impede ka foti fila fali material ne’ebe mak atu halo uma kbi’it iha atabae ne’e informasaun ne’ebe la los, ami nia partidu nunka halo propaganda falsu ka bosok ema tun sae ne’e laiha, material ne’ebe atu halo ba ita nia povu kbiit laek ninia uma ne’e imposivel tebes”, tenik Luis

Nia afirma, nu’udar reprezentante povu hotu-hotu tenke koalia buat ne’ebe faktu ka realidade labele liu husi vja telefone ka mensajen tanba ema koalia husi ne’e los, tenke tun direita ba haree ho matan no rekolla dadus konkreta mak foin fo sai, komprende tempu ida ne’e tinan politika maibe labele halo propaganda politika tanba KHUNTO nia estrutura la hanesan CNRT ninia estrutura diferensia boot- tebes maske partidu KHUNTO foin harii iha 2011.

Reportajen: Ermelinda Soares