Deskunhesidu Soe Bebe ! Governu Haloot Matebean Anju Maria & José
SAPNewsTL, Dili – Relasiona ho bebe na’in rua ne’ebe ema deskunhesiu soe iha Area Motael no Eskola 10 dezembru Tinan kotuk, orseik Ministra Interina, Ministériu Solidariedade Sosiál no Inkluzaun (MSSI), Céu Brites, akompaña husi Diretór Nasionál Asisténsia Sosiál MSSI, Fernando dos Reis, haloot ona mate-isin matebian deskoñesidu na’in rua, iha Semitériu Becusse.
Tuir informasaun ne’ebe SAPNewstL asesu liu husi pajina ofisial MSSI, Diretor Nasionál Asisténsia Sosial Fernando dos Reis haktuir hafoin bebe ne’ebe ema soe ne’e hetan autopsia husi polísia forensic, sira entrega ona mai Governu liu husi MSSI, nune’e MSSI halot ona sira na’in rua iha semitériu becusse
“Ohin ita mai iha ne’e hodi haloot matebian deskoñesidu na’in rua, ne’ebé ninia prosesu autopsia husi polisia forensic remata ona, no agora dadaun polisia forensic entrega mai MSSI hodi haloot matebian na’in rua ho dignu”. Tenik Diretór Nasionál Asisténsia Sosiál, Fernando dos Reis, iha Semitériu Becusse Dili, 23/01/2024
Tuir kronolojia akontesementu, matebian deskoñesidu “Anju José” hafoin moris mai, ninia inan ka aman lori ba rai hela iha área eskola sekundária 10 de Dezembru Komoro, nune’e mos matebian “Anju Maria”, ninia inan ka aman lori ba rai hela iha igreja laran Motael.
Hafoin prosesu autopsia la’o, ohin polisia forensic entrega matebian na’in rua ba MSSI, hodi haloot sira na’in rua iha fatin hakmatek ikus nian.
Matebian deskoñesidu na’in rua ne’e, ida mane tau naran Anju José, ida seluk feto ne’e hanaran Anju Maria. Sira na’in rua hanaran Anju tanba sira moris mai fila-fali kedas ba Aman-Nia kadunan santu, tanba hahalok husi ema laiha responsabilidade.
Jornalista : Marcela Mesquita Lemos