Diplomasia Iha Asaun: PM Xanana Hala’o Vizita Ofisiál Ba Vietname
Imajem: Primeiru-Ministru Kay Rala Xanana Gusmão ho delegasaun governamentál to’o ona iha Vietname, simu hosi Ministru Siénsia no Teknolojia Vietname, Huynh Thanh Dat iha iha Aeroportu Internasionál Noi Bai, Hanói, Domingu, 07/06/2026. Foto: Média-GPM
SAPNewsTL, Vietname : Primeiru-Ministru, Kay Rala Xanana Gusmão, hamutuk ho delegasaun governamentál to’o ona iha Aeroportu Internasionál Noi Bai, Hanói, iha loron 07 fulan juñu, tuku 14:55 oras lokál, ho aviaun Singapore Airlines no simu ho serimónia Guarda Onra.
Iha aeroportu, Primeiru-Ministru simu hosi Ministru Siénsia no Teknolojia Vietname, Huynh Thanh Dat, akompaña hosi Embaixadór Timor-Leste iha Vietname, João Pereira. Hafoin serimónia resepsaun, PM Xanana ho delegasaun kontinua bá fatin deskansa.
Vizita ofisiál ne’e realiza tuir konvite hosi Primeiru-Ministru Repúblika Sosialista Vietname, Le Minh Hung, ne’ebé sei hala’o durante loron tolu, hosi 07 to’o 10 Juñu 2026.
PM Xanana kontinua kedan reuniaun ho Embaixadór Timor-Leste iha Vietname, João Pereira, hodi simu atualizasaun kona-bá programa no ajenda ofisiál sira ne’ebé sei hala’o durante vizita ne’e.
Akompaña Primeiru-Ministru iha vizita ofisiál ne’e maka Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay; Vise-Primeiru-Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino; Ministru Negósiu Estranjeiru no Kooperasaun, Bendito dos Santos Freitas.
Ministra Edukasaun, Dulce de Jesus Soares; Ministru Komérsiu no Indústria, Filipus Nino Pereira; Vise-Ministra Asuntu ASEAN, Milena Maria da Costa Rangel; Sekretáriu Estadu Komunikasaun Sosiál, Expedito Dias Ximenes; no Xefe Gabinete Primeiru-Ministru, Elizabeth Exposto.
Vizita ne’e atu reforsa relasaun bilaterál entre Timor-Leste ho Vietname, liu-hosi kooperasaun iha área oioin ne’ebé sai interese komún bá nasaun rua.
