Dom Leandro Sei Fo Krisma Ba Sarani 500 Resin Iha Lautém
SAPNwesTL, Lautém: Bispu Dioseze de Baukau, Dom Leandro Maria Alves sei fo Krisma ba sarani atus lima resin iha Parokia Nossa Senhora Ranha dos Apóstolos de Luro, Vigararia Lautém
Tuir Informasaun ne’ebé SAP News Timor-Leste asesu liu husi Xefe Katekista iha Parokia Luro, Deolinda da Costa Hornay haktuir, Bispu Dioseze Baukau Dom Leandro Maria Alves sei to’o iha Luro, iha Loron 21 Fulan Agustu 2023
Objetivu husi vizita ne’e hodi fo Krisma ba sarani atus lima resin ne’ebe daudaun ne’e prepara no selebra misa agradesimentu ba aniversáriu Parokia nian ba dala VI
“Bispu Dom Leandro Maria Alves sei to’o iha loron, Segunda-Feira, 21 Fulan Agustu, Presenza Bispu nian ne’e sei fo Krisma ba sarani atus lima resin tuir lista lista Provizóriu, tanba lista seidauk Tama hotu”, Tenik Xefe Katekista Deolinda da Costa Hornay ba SAP News TL iha Luro, 19/08/2023
Deolinda hatutan, Bispu Dioseze de Baukau mos sei Selebra Missa Agradesimentu ba aniversáriu Parokia Luro ba dala neen iha loron 22 Fulan Agustu 2023 hamutuk ho sarani Luro
Xefe Katekista ne’e informa, Agora daudauk sarani sira kontinua halo preparasaun kona-ba resepsaun simu Bispu Dom Leandro Maria Alves no Serimónia Sira ne’ebe sei hala’o iha Segunda Feira loraik no Tersa Feira dader
Daudaun ne’e Kandidatu Krismante Sira atus lima resin ne’e halo ona konfesaun no gladi ba Krisma ne’ebe sira sei simu iha Segunda Feira loraik tuku 4 :00
Tuir Informasaun ne’ebé SAP News TL asesu katak, Sarani Parokia Luro sei simu Bispu Dioseze Baukau ne’e ho karavana liu husi Sa’e Kuda no Kultura Postu Administrativu Luro nian
Jornalista: Luis Pailofo