Dom Virgílio Hato’o Agradese, Maromak Iha Planu Furak Ba Povu TL
SAPNewsTL, (ROMA): Arsebispu Arkedioseze Metropolitana Dili, Dom Virgílio do Carmo da Silva, akompaña husi Padre Ivo Martins da Silva no delegasaun husi Parlamentu Nasionál to’o Kuarta-Feira óras 1.25 horas Roma-Itália, iha Aeroportu Internasionál Leonardo da Vinci, Dom Virgílio fo agradese ba Timor oan iha Italia no husu timor oan fo agradese ba maromak ho planu furak ne’e
Amo Bispo ho delegasaun husi Órgaun Lejislativu hamutuk na’in 4 Xefia husi Vise Prezidente Parlamentu Nasionál Angelina Sarmento, simu diretamente husi ekipa Protokolu Komunidade Timoroan iha Italia (COMTIL) no Embaixadora Timor-Leste ba Vatikano, Juvita Rodrigues Ataide Gonçalves.
Embaixadora Timor-Leste ba Vatikano, Juvita Rodrigues B. Ataide Gonçalves hato’o benvindu bá Bispu Dili ne’ebé hala’o viazen hamutuk ho delegasaun Parlamentu Nasionál.
“Benvindu ho orgullu ami Embaixada hamutuk ho komunidade Timoroan sira bele simu Amu Bispu hamutuk ho deputadu sira hodi hala’o viazen hosi Timor-Leste to’o mai Italia, hodi hein prosesu investidura ba ita nia amu Bispu nu’udar Kardeál dahuluk ba Timor-Leste hamutuk ho Bispu no nai lulik sira husi nasaun seluk,” Embaixadora Juvita agradese.
Reprezentante Madre Kongregasaun SSpS, Joana Soares hamutuk ho komunidade Timoroan sira sente orgullu, tanba bele halo preparasaun hodi simu Bispu Don Virgilio ho delegasaun ho atividade simples tara tais no entrega aifuan fresku.
“Ami reprezenta Timoroan tomak organiza hamutuk ho ita nia Embaixadora ho orgullu hodi reprezenta Timoroan tomak ne’ebé hela iha Europa liu-liu iha Italia, ho domin boot hato’o ami nia benvindu ba Amu Bispu, tanba agora ami sente la mesak agora mai hamutuk ho ita iha Italia,” dehan Madre Joana.
Arsebispu Arkedioseze Metropolitana Dili, Dom Virgílio do Carmo da Silva mós hato’o agradese ba preparasaun hosi Embaixada Timor-Leste iha Vaticano hamutuk ho Timoroan sira hodi simu nia viazen iha Aeroportu.
“Ha’u agradese ba imi nia preprasaun tomak hodi simu viazen ida ne’e, ha’u hato’o de’it ba ita hotu hato’o agradese ba Nai Maromak nia planu furak sira ba ita nia rain Timor-Leste,” dehan Bispu.
Hosi Aeroportu, ekipa akompaña Arsebispu Arkedioseze Metropolitana Dili, Don Virgílio do Carmo da Silva kontinua ba hela iha rezidensia Kaza de Santa Marta iha Vaticano.
Enkuantu, Dom Virgílio sei simu investidura hosi Papa Fransisco sai Kardeál dahuluk iha Timor-Leste iha loron 27 fulan Agostu, nu’udar prezente furak ida hosi Papa Fransisco, hodi fó orgullu povu Timor-Leste ne’ebé maioria nu’udar sarani Katolika iha regiaun ASEAN.
Entertanto, Bispo Dom Virgílio sei hela hamutuk ho bispu sira seluk kompostu husi kandidatu kardeál foun na’in-ualu (8) hosi Europa, neen (6) hosi Ázia, rua (2) hosi Áfrika, ida (1) hosi Amérika Norte, haat (4) hosi Amérika Sentrál no Latina Amérika nian sei hela hamutuk hodi prepara hamutuk serimonia kriasaun ba sai kardiál foun hosi Amu Papa Papa Francisco iha Basilika São Pedro Vatikano.
Jornalista : Vinsensius Saldanha Morais De Araujo
Editor : Ekipa Editorial