Domin Lolos La’os Koko Husi Relasaun Sexual, Jovens Labele Sai Atan Ba Sexu

SAPNewsTL, Dili : Perspektiva Jeral Kona Ba Moralidade Sexual, Matrimonial, Familiar tuir ita nia doutrina

Sexo no Domin, Maromak nia soin ne’ebé haraik ona mai ema hotu entre feto no mane hodi hatún iha geração hotu iha universu. Maibé Sexo la’os Domin. Domin la’os Sexo.

“Domin La’os Sexu no Sexu La’os mos domin, Ita boot bele halo relação sexual no la sente hadomi. Ita boot mos bele sente hadomi teb-tebes maibé la halo relação sexual”.

“Ema mane ida pode ser ódio hela o maibé halo daudaun sexo ho o. Nune’e mos o, bele ódio hela mane ida maibé halo sexo ho nia. Ne’e sexo, maibé ne’e la’os Domin. Keta confundi. Cuidado ba”.

Relasaun Sexual laos sasukat hodi hatudu katak domin lolos no hadomi entre feto ida no mane ida mak ida ne’e

“Uza sexo atu manipula deit, to’o loron ida sei falha. Sala boot se o iha hanoin katak halo sexu ho ema atu halo nia hadomi o. Domin loloos la obriga ita atu envolve-an iha relação sexual”.

“Ema nebé la hadomi ita, susar atu muda ninia hanoin hodi hadomi ita tamba deit sexu. Se nia dehan ba o, “prova to’ok katak o hadomi ha’u” hodi husu imi halo sexu, ne’e nia bosok, bosok kompletu, nia atu aproveita deit o nia isin”.

“Nia estraga dadaun o. Se nia iha o nia moris atu sexu deit, loron ida nia sei ses-an lakon husi o, tanba nia hedonista, ninia moris orienta deit buka prazer sexu nian. Fo o nia an ba ema ne’e hodi sai ninia atan sexu, ne’e o beik, o idiota (desculpa Jesus dehan ita labele dehan ema “beik”, maibé ema ne’e rasik halo nia an beik)”.

“Lalika koko atu harí o nia uma kain ho hanoin no hahalok katak sexu ne’e mak diak liu, tanba sei akaba deit ho tanis”.

Hanesan S.Paulo koko explica Jesus nia hanorin, Domin la hatún ka hamoe. Domin la hanoin an rasik, Domin ne’e entrega an tomak, no hakarak diak tomak ba ema seluk.

“Se o durante ne’e koko atu sosa ema ida hodi entrega o nia an ba sexo ho nia, diak tebes se agora kedas foti decisão atu soe kedas ba dook. Labele hein tan, tamba mundo ne’e la’o ba oin, la ba kotuk: vida ne’e minutu ba minutu badak tan la’os naruk tan, koko atu coloca didi’ak fali o nia domin iha alicerse nebé loos no forte”.

“Ema ida hakarak karik moris no kaben ho o, husik nia kaben ho o tamba nia Hadomi o. No nia kompreende didi’ak katak nia hadomi o la’os tamba ninia kbiit deit maibé tamba Maromak nian”.

“Ha’u hadomi o tamba Maromak hadomi ona Ha’u, hanesan mos Nia hadomi no kuida ona o”. Ema nune’e sei respeita no kuida o, hatene responsabilizadade ba o nia vida, iha sentimentu emosional, mental no espiritual ho o, compaixão ho o iha tempu susar no ksolok, hakarak no sempre hafoun komitmentu atu moris deit ho o to’o mate mai hasoru nia”.

Ne’e hotu katak sa? Katak Domin boot liu sexu, Sexu ne’e hola deit parte iha Mundu boot ida naran Domin; Domin iha umakain ida hanaran Familia.

Roma, 30 Maio 2018
Pmouzy Lopez

Jornalista: Marcela Mery da Costa