DR. LU OLO : HA’U HAKRUK BA KONSTITUISAUN NO RESPEITU BA VONTADE POVU MAIORIA NIA DESIZAUN IHA ELEISAUN
Sapnewstl. (Covalima, 03 Abril 2022) : Kampanha Loron Daruak Kandidatu Presidente Repúblika Demokrátika Timor Leste Segunda Volta Nian Iha Covalima, Dr. Francisco Guterres Lu Olo Deklara Prontu Hakat Dala Ida Tan Ba Palasiu Presidente Ai-tarak Laran Sai Presidente Ba Povu Tomak, Se Ha’u Sai Presidente Ha’u Sei Hakruk Nafatin Ba Konstituisaun, Respeitu Povu Nia Vontade Maioria Husi Eleisaun Laos Atu Tuir Fali Ema Ida Nia Vontade no Hakarak.
Iha diskursu Kandidatu Presidente Francisco Guterres Lu Olo hateten Presidente da Republika nu’udar orgaun soberania ida. Atu sai Presidente da Repúblika tuir konstituisaun nia tenke hetan uluk legitimidade husi povu ninia votu, ita ba tuur iha aitarak laran la tuir ema ida nia vontade nein ninia vontade rasik maibe tu’ur iha Palasiu Presidente nian tuir vontade povu ninia. wainhira povu maioria hili nia. tamba ne’e duni mak mai husu imi nia konfiansa atu ha’u bele eleitu sai Presidente da Repúblika.
Kandidatu Presidente ne’e hatutan, Hau hakarak atu hateten katak segunda ronde la signifika Lu Olo lakon ka manan, la signifika mos Dr. Jose Ramos Horta lakon ka manan maibe ita fila-fali ba zero, ita fila – fali kotuk hahu fila fali prosesu foun ida hakat ba segunda ronda. Tamba ne’e hau hakarak tu’un dala ida tan hau nia lian ba imi hotu atu hamutuk dala ida tan ba iha loron 19 Fulan Abril Tinan 2022 ida ne’e. Ba iha Urna atu husik hela ita nia votu ba kuak iha númeru sorteiu 2.
Hau sei hametin diak liu tan Estadu de Direitu Demokratiku ida ne’e katak ha’u sei kumpri liu konstituisaun liu interese ema ida nia, liu ho nia interese rasik. Tamba saida. Tamba konstituisaun maka bele kesi metin ema hotu-hotu ka sidadaun hotu-hotu iha estadu ka nasaun. Tenik Lu Olo iha nia diskursu ba Populasaun Covalima, 03 Abril 2022.
Iha fatin hanesan, Koseleiru Supremu Partidu Khunto José dos Santos Naimori hateten, Dr. Francisco Guterres Lo Ola, ema ida simples, haraik an no rona ema hotu-hotu ninia hanoin, no idea. Naimori mos husu ba Covalima oan sira atu hambrik fila fali, vota ba Dr. Lu Olo ba Presidente Repúblika Periodu 2022-2027 iha dia 19 de Abril 2022.
Entretantu Konseleiru Konseleiru Khunto ne’e mos husu ba arte marsiais, arte rituais no organizasaun hotu-hotu vota ba Lu Olo iha eleisaun ida ne’e, tanba Dr. Francisco Guterres Lu Olo hatene hakuak ema hotu, fuan boot no rona ema hotu liliu hatene kumpri no Hatuur Konstituisaun tuir nia dalan. Tenik Naimori iha nia diskursu iha Covalima, 03-04-2022
Enkuantu iha Kampanha ne’e hetan partisipasaun maksimu husi Militantes Partidu Fretilin, Khunto no Partidu Libertasaun Popular, iha ne’ebe la’o iha ambiente hakmatek, paz no estabilidade nia laran.
Jornalista : Clementino da Silva
Editor : Germano Nokoili