EBF Leu-Basa Obriga Estudante Kuru Bee Ho Distánsia Kilómetru 1
Imajem : Entrevista Ester de Deus iha Aldeia Leu-Basa, Suku Lauana,20/11/2024
SAPNewsTL, Ermera – Manorin haruka estudante kuru bee obrigatóriu kada sabadu, defisiente Ester de Deus hateten, kada sabadu sira tenke kuru be litru ida ho distansia km 1 molok to’o eskola.
Eskola Ensinu Basiku Filial Nú. 238 Tata-Mailau-Leu-Bassa ne’ebé pertense iha suku Lauana, Postu Administrativu Letefoho, Munisípiu Ermera menus bee, kada estudante tenke kuru bee hodi sustenta sira nia nesesidade eskola.
Estudante defisiente matan Ester de Deus hatete, kada sábadu manorin haruka sira tenke ba kuru bee ho distansia km 1 no obrigatóriu kada estudante tenke ba.
“Iha loron sábadu, ami kuru bee tanba ida-ne’e professór mak haruka no obrigatóriu ami tenke ba, depois distánsia husi eskola ba bee matan kilómetru 1 liu.” Dehan Ester de Deus ba Jornalista sira iha Eskola Filial Tata-Mailau-Leo-Basa, iha aldeia Leobasa, suku Lauana, Kuarta (20/11/2024).
Estudante ne’e salienta, la’os sira deit maibé profesor sira mós lori, ema ida masa ida hodi sustenta ba merenda eskola no haris fatin.
“La’ós ami de’it mak lori bee, maibé profesór sira mós lori, no estudante sira kada ema na’in ida masa ida, atu nune’e bele utiliza ba hodi tein merenda eskolar no ba iha haris fatin.” Nia subliña.
Imajem : Koordenadór Ensinu Báziku nú. 238 Fillial Tata-Mailau-Leu-Basa, Domingos Soares.
Iha fatin hanesan, Koordenadór Ensinu Báziku nú. 238 Fillial Tata-Mailau-Leu-Basa, Domingos Soares deklara, eskola tau regras katak loron sabadu obrigatóriu estudante tenke lalin bee-moos hodi tein merenda eskolar no ense haris fatin tanba bee sai difikuldade ba estudante sira.
“Los duni eskola kria regras ida iha loron sabadu, estudante sira tenke lalin bee-moos, tanba iha ne’e ema hot-hotu enfrenta liu mak bee-moos ho ida maka eskola kria inisiativa katak iha sabadu estudante obrigatóriu tenke kuru bee-moos hodi uza ba tein merenda eskolar no ense haris fatin”. Nia deklara.
“Durante semana ida nia laran iha loron sabadu mak estudante foin kuru fali, nune’e bele uza ba tein merenda eskola nian no ba haris fatin, se estudante sira mak la kuru be haris fatin ne’e fo’er los, entaun obrigatóriu haruka labarik sira tenke kuru bee, ida ejize husi eskola tanba iha ne’e difikuldade ne’ebé mak eskola enfrenta maka bee moos”.
Koordenador ne’e hatutan, “Distansia husi bee matan mai eskola to’o kilometru ida, bee-moos iha fali karik eskola lokaliza iha foho leten, tanba ne’e bee ne’e la sa’e, karik sira la ba kuru ita bolu komunidade sira lori bee mai, ne’e ita tenke selu fali tanba ida ne’e mak ami kria regras ida-ne’e atu bele uza ba semana ida”.
Lideransa eskola ne’e dehan, “Tuir lolos ami la bele obriga labarik sira ne’e, ida ne’e ami kontra regras maibé ida ne’e obrigatóriu, se eskola iha haris fatin, bee laiha ne’e problema boot, karik loron -loron mak nia simu ai-han husi merenda eskola depois atu soe bee boot atu ba ne’ebé, entaun ida ne’e maneira ne’ebé mak ami uza hodi halo maibé ba estudante sira ne’ebé boot obrigatóriu tenke kuru maibe labarik kiik ami la autoriza sira ba kuru”.
Domingos rekunhese katak nia parte kontra regras ne’ebé edukasaun estabele maibe nesesidade eskola, obrigadu tenki orienta alunu sira hodi kuru bee ba eskola maske dook.
“Kona-ba regras ami kontra duni, se bee mak iha mak halo hanesan ami kontra regras, mais bee la iha pasiénsia ami obrigatóriu tenke halo hanesan ne’e, depois ami haree sira ida ki’ik la foti maibé ida boot sira ne’e obrigatóriu,”nia afirma.
Estudante Sira iha Aldeia Leu-Basi, Suku Lauana
Xefe Aldeia Leu-Basa Alfredo Maia Pires rekonhese problema bee-moos sai preokupasaun boot ba komunidade no estudante sira iha Leu-Basa tanba ne’e tenki sakrifika alunu sira hodi kuru bee.
“Problema kona-ba bee-moos ne’ebé mak eskola no aldeia Leu-Basa enfrenta entaun eskola ho komunidade kria inisiativa ida ne’e hodi bele uza ba nesesidade lor-loron no mós ba haris fatin”.
“Hanesan Autoridade sente triste tanba bee la iha, tuir lei dehan katak estudante sira la bele lori bee no labele obriga maibé bee susar entaun obrigatóriu tenke halo hanesan ne’e tanba sira mós iha sentina ka uza ba tein merenda eskola, ne’ebé mestre mós lori hotu tanba ida ne’e hetan konkordansia husi parte inan aman, autoridade lokál ho parte eskola nian”. dehan Xefe Aldeia Leobasa Alfredo Maia Pires.
Autoridade lokal ne’e mós husu ba Ministériu Obras Públikas (MOP), Bee Timor-Leste Empreza Públika (BTL,E.P) hodi bele toma atensaun ba problema bee-moos iha Aldeia Leu-Basa, Suku Lauana, Postu Letefoho, Munisípiu Ermera.
Entretantu, Ensinu Báziku Fillha nú. 238 lokaliza iha Aldeia Leu-Basa, Suku Lauana, Postu Administrativu Letefoho, Munisípiu Ermera ho estudante hamutuk atus ida ualunulu resin-sia (189) no profesór hamtul na’in hitu.
Kobertura ne’e, SAP News TL hala’o iha liu hosi programa media tour ne’ebé organiza hosi Assosiasaun Jornalista Timor Lorosa’e (AJTL) no hetan apoia hosi Oxfam iha Honkong.
Jornalista : Marciana Conceição
#Ermera #Sapnewstl #timorleste #ClimateActionChallenge