Edifikasaun Eskola Sekundaria Geral Lasama Luro Hahú Hatur Ona Nia Fundasaun
SAPNewsTL. Luro-Lautém, 21 Abril 2022 : Eskola Sekundaria Geral Fernando Lasama Luro Fillial Nino Konis Santana Lospalos ne’ebe durante tinan 6 laiha edifisiu, felizmente, ohin loron hahú ona nia processu Construsaun ho orsamentu hamutuk $ 182,929.22 husi Fundu Transferensia Públikas / Kapital Desenvolvimento.
Iha intrevista ho Kordenador Eskola Sekundaria Fernando Lasama Luro Sr. Almerindo Pina hateten, Konstrusaun Edifisiu Eskola Sekundaria Lasama Luro ida ne’e kategoria iha Orsamentu geral do Estadu 2021 nian, iha ne’ebe ho montante hamutuk $ 182,929.22 husi Ministériu da Edukasaun Juventude e Desportu.
Almerindo Pina hatutan, konstrusaun eskola ida ne’e iha unidade II, bazeia ba desenhu hamutuk sala neen inklui haris-fatin ba manorin no kanorin sira hamutuk ualu (8). Maske nune’e, maibe sala de aula neen ne’e seidauk koresponde ba númeru estudante atuál tanba estudante ne’ebe estuda daudaun iha eskola ne’e hamutuk atus tolu limanulu resin-hitu (357) no nia manorin hamutuk 20 kompostu husi Professores permanente nain 2, Professores Kontatadu nain 14 no Kontratadu Eskola nain 4.
Entretantu, konstrusaun edifisiu ida ne’e hahu iha loron 31 Fulan Marsu no sei remata iha Loron 31 Fulan Setembru 2022, wainhira laiha mudansa klimátika ruma mak afeta, maibe ha’u garante katak kontrusaun ne’e sei remata iha fulan neen mai. Hatete Almerindo Pina ba Jornalista SAPNewsTL.
Kondenador ne’e afirma, ho konstrusaun sala neen ne’ebe la’o hela seidauk sufisiente,entaun, tinan ne’e ami sei hanoin hamutuk ho aman inan estudante sira nian hodi kontribui hamutuk ita bele konstrui tan edifisiu ida ho sala de aula tolu, nune’e bele koresponde ba númeru estudante sira nian ne’ebe kada tinan sempre aumenta ba beibeik. Tenik Almerindo
Iha sorin seluk, estudante atual Seorge Alves da Costa sente gratitude no apresia ba Ministériu da Edukasaun Juventude e Desportu tanba bele hatan ona ami nia preokupasaun ne’ebe ami hato’o beibeik durante tinan neen nia laran, ke fulan kotuk ami nia edifisiu rua ho sala neen hahu ona nia processu konstrusaun. Dehan Seorge ba SAPNewsTL, Luro 21 Abril 2022.
Enkuantu, Eskola Sekundaria Geral Fernando Lasama Luro, daudaun ne’e iha aula provizória hamutuk sia, iha ne’ebe harii husi estudante hamutuk ho nia professores sira iha tinan rua ba kotuk, maske ho kondisaun eskola ne’ebe aat, maibe iha tinan 2020, eskola refere konsege hetan klasifikasaun daruak ho valor 53 husi Estudante Ana Maria dos Santos Ribeiro iha nivel nasionál no kada tinan ninia estudante finalista liu nain 10 sempre admitidu ba UNTL. Luro, 21 Abril 2022.
Jornalista : Geraldo da Gama
Editor : Luis Pailofo
