Estrada Direksaun Luro Nakfilak Ba Mota, Komunidade Luro Ezize MOP Tau Atensaun Urugente
SAPNewsTL. Lautém, 21 Abril 2022 : Komunidade Postu Administrativu Luro Munisipiu Lautem, Ezize Governu liliu Ministériu Obras Públikas tau atensaun urugentemente ba Estrada Regional Ligasaun Luro. Veteranu Lamberto Soares Freitas Alias Ri’i-Loi husu Ministériu Relevante Liliu MOP atu solusiona lailais tanba konsidera Estrada refere risku, aat no superkrítiku ba sirkulasaun transportes Públiku no Privadu sira ba Luro.
Iha intrevista ho Veteranu Lamberto Soares Freitas hateten, desenvolvimentu infraestrutura importantes tebes atu kontribui ba desenvolvimentu fisiku humanidade nian liliu iha desenvolvimentu sosial, kultural no ekonomia.
Veteranu ne’e hateten, Estrada ligasaun Luro tinan barak ona, husi Suku Daudere to’o mai Luro Vila ho distansia liu 12 kilómetrus resin kontinua aat ba beibeik, wainhira udan, bee sempre nakonu iha Estrada, Estrada nakfilak ba mota, iha ne’ebe difikulta tebes movimentasaun transporte privadu no públiku sira quandu akontese udan boot.
Entretantu, nia akesenta Estrada ho distansia 12 kilómetru ida ne’e, infelizmente laiha valeta ka saluran ne’ebe sufisiente, nune’e, wainhira udan, bee sempre estraga Estrada liliu iha area Liliri, limitasaun entre Suku Afabubo Postu Luro no Suku Daudere Postu Lautém ne’ebe durante tinan naruk nia laran mota boot sempre estraga kada fulan wainhira akontese udan ho grande intensidade. Lamberto Ri’i-Ili hatete. Luro 21/04.
Ho mudansa klimátika ne’ebe mosu, Estrada iha area refere ninia fator ambiental Krítiku tebes, inklui rai refere ho formasaun tahu, fasil tebes mosu erozaun no agora daudaun rai sei halai, maske IGE normaliza ona Estrada refere 700 metrus iha semana rua liu bá.
Entretantu, Lamberto husu ba governu atu tau atensaun ho seriedade no urugentemente tanba Estrada refere konsidera kritiku liliu fasilita komunidade transporta sira nia produtu ba Kapital Minisipiu Lautém no Kapital nasaun Dili. Luro-Lautém, 21 Abril 2022.
Enkuantu, Estrada refere hetan asesu husi populasaun sira Postu Luro nian hamutuk rihun sanulu liu ne’ebe kada loron sempre halo viajem husi Luro ba Lospalos, Dili, Baucau no seluk tan, inklui Estrada ne’e mos hetan asesu husi komunidade Postu Lautém no Komunidade Baucau balun ne’ebe kada semana sempre ba halo transaksaun sasan no faan sasan iha Postu Adminstrativu Luro. Luro, 21 Abril 2022. Media SAPNewsTL.
Jornalista : Sergio Delekuar
Editor : Jermanos Dias
