Estrada Ermera Aat ! PAM Deklara La Iha Kbi’it Atu Responde
Imajem : Jornalista hala’o entrevista ho Presidente Autoridade Munisipiu Ermera (PAM-E) José Martinho dos Santos iha Gleno, 13/03/2025.
SAPNewsTL, Ermera : Relasiona ho estrada ne’ebe kotu iha postu administrativu Atsabe, suku Atara munisipiu Ermera, ne’ebe difikulta ba suku Lima(5) inkliu munisipiu Bobonaru, Presidente Autoridade Munisipiu Ermera(PAM-E) José Martinho dos Santos deklara, la iha kbiit atu responde emergênsia ba ida ne’e maibe nia sei komunika ho nasional atu bele responde.
“Infelizmente munisipiu la iha kbiit atu responde sasan sira ne’ebe maka emerjensia, emerjensia sira ne’e ita tenki husu apoia ba iha Institutu Gestaun Equimentos Apoia Desenvolvimentu Infraestrutura (IGEADI).”Dehan PAM-E José Martinho dos Santos ba jornalista iha salaun Municipal Ermera Quinta-Feira 13/03/2025.
PAM-E akresenta nia hatene ona kona ba estrada ne’ebe kotu no difikulta ba suku lima inklui munisipiu Bobonaru, nune’e PAM-E sei komunika ho Ministériu Obras Públikas (MOP) hodi haree detalladu kona ba problema ne’ebe postu Atsabe hasoru.
“Ha’u hatene ona kona ba estrada ne’ebe kotu depois ha’u sei ko’alia ho MOP hodi haree, iha ne’e mos iha delegasaun territorial munisipiu Ministeriu Obras Públiku, ha’u hanoin sira bele komunika lalais ba ministeriu para bele responde ho lalais”.
Nia hatutan, estrada ne’ebé aat presiza orsamentu mai husi nasional maibe PAM-E sei komunika ba nasional no husu apoia ba emprejariu lokal sira ne’ebe iha kbiit hodi bele responde lalais problema ne’ebe postu Atsabe hasoru.
“Ita la iha regras iha munisipiu ne’ebe maka atu responde emergensia ida ne’e ita la iha, presiza orsamentu mai husi nasional, nune’e ami nia obrigasaun maka tenki komunika imediatamente ba nasional para sira bele responde kedas ou husu apoio husi emprejariu lokal Sira ne’ebe iha kbiit atu halo, se sira iha kbiit atu halo ita bele husu ba sira atu halo”.
Imajem : Estrada ligasaun Atara ba Bobonaru kotu iha loron, 12/03/2025.
Antes ne’e, Komunidade Cleofas Da C.Soares haktuir iha oras lokraik tuku, 1 to’o tuku 4 akontese udan ho intensidade ne’ebe makas, nune’e bee mota tun ho volume ne’ebe makas no sobu ponte hodi resulta estrada kotu total.
“Ohin loraik udan ho intensidade ne’ebe makas hahu husi tuku 13 liu to’o tuku 16 liu, nune’e mota tun ho volume ne’ebe makas maka sobu hotu ponte kiik ne’e halo estrada sai kotu total”. Dehan Cleofas ba SAPNewsTL liu husi via Telefone iha loron Quinta-feira/13/03/2025.
Nia hatutan, estrada ne’ebe kotu husi diresaun Atara ba Bobonaru ne’e difikulta tebes transporte sira atu halo movimentu ba mai tanba estrada refere mos iha ligasaun ho suku 5.
“Estrada ne’ebe kotu ne’e grave, halo trasporte mos la bele halo movimentu tanba estrada refere mos hanesan estrada uniku deit ba Suco 5 maka hanesan Lação, Batumano, Atara, Laubono, Obulo, no Municipio Bobonaro. nune’e trasporte sira la iha dalan alternativu hodi bele halo movimentu” Nia informa.
Nia akresenta kauza husi estrada aat tanba estrada refere la iha valeta ka bee dalan, nune’e bainhira udan, bee halai los ba estrada no fo impaktu ba estrada kotu.
“Nia kauza ida tan maka estrada ne’ebe iha ne’e la iha baleta ka bee dalan ho nune’e bee ne’ebe halai husi etrada to’o ikus estrada sai kotu”.
Hafoin akontesementu ne’e parte autoridade Atsabe no seguransa tun direta ona iha lokraik ne’e hodi observa maibe seidauk halo normalizasaun
“Depois de akontesementu ne’e husi parte autoriedade Postu Atsabe no Seguranca tun direita ona loraik ne’e, maibe seidauk halo normalizasaun tanba estrada refere grave.
Cleofas husu atu parte relevante ou governu atu haree ho seriedada ligadu ho estrada diresaun glenu ba to’o Ermera no ba liu iha munisipiu Bobonaru tanba quaze 100% estrada grave total.
“Ha’u nia rekomendasaun ba parte governu atu haree ho seriedade bele normaliza lalais estrada refere iha tempu badak hodi transporte sira bele halo movimentu hanesan baibain.
“Husu ba Governo atu haree mos asunto estrada husi Gleno to’o Atsabe ba liu Bobonaro ne’ebe grave 100% ona tanba husi ami nia observasaun katak estrada kotu ne’e mos kauza ida mak bmvaleta la iha bee halai tuir estrada maka sobu sai kotu”.
Akontesimentu ne’e mosu iha parte Bairo Keltete Bacuani Aldeia Ua-abe Suco Atara balija ho Batumano. Hafoin notisia ne’e publika SAP News TL seidauk halo komfirmasaun ho parte governu sentral.
Jornalista : Conzita Mota
