F-FDTL & PNTL Iha Ona Medida Nesesáriu, Asegura Seguransa Vizita Papa Francisco

SAPNewsTL, Díli – Durante partisipa iha Meet the Press ne’ebe organiza husi Sekretaria Estadu Komunikasaun Sosial (SEKOMS),  Ministériu Defeza (MD) apresia preparativu autoridade forsa konjunta husi Polísia Nasionál Timor-Leste (PNTL) no Falintil-Forsa Defeza Timor-Leste (F-FDTL) ne’ebe sei garante seguransa simu vizita sua santidade Papa Francisco mai Timor-Leste.

Ministru Defeza Donanciano Costa Gomes “Pedro Klamar Fuik” hateten, forsa tarefa Konjunta entre PNTL ho F-FDTL hahú halo preparativu asegura seguransa simu vizita Amu Papa Francisco mai Timor-Leste.

Ministru Defeza Donanciano Costa Gomes “Pedro Klamar Fuik” informa, vizita sua santidade Papa Francisco mai Timor-Leste, Autoridade Forsa Tarefa Konjunta halo check point ba movimentu transporte hodi garante seguransa ne’ebe seguru no hakmatek.

“Vizita Amu Papa Francisco mai Timor-Leste, entaun tenki hatene medidas seguransa ho dalan intensifikadu, Autoridade Forsa Tarefa Konjunta sei halo check point beibeik kona-ba movimentu transporte hotu hodi garante seguransa ida hakmatek ho seguru”. Dehan Donanciano iha media meet press iha Salaun Ministeriu Transporte Komunikasaun Merkadu Lama (23/08/2024).

Klamar Fuik hatutan, “Ita apresia ba preparasaun Forsa Tarefa Konjunta ba vizita Amu Papa Francisco mai Timor-Leste iha fulan Setembru”.

Ministru Defeza ne’e salienta, hakarak vijita Papa Francisco alkansa nia objerivu pastoral no relijioza ba ema hotu, inklui vizita nu’udar Xefe Estadu Vatikanu.

“Ita hakarak vizita ida ne’e atu alkansa nia objetivu pastoral no vizita relijioza ba ema se de’it, entaun ema se de’it hanoin vizita ida ne’e oportunidade hodi aproveita halo polítiku, kuandu akontese iha regra impenamentu balun governu aprova ona iha Konsellu Ministru atu impoin ba sidadaun hotu atu kumpri kria situasaun seguransa hakmatek ho seguru”. Nia deklara

Nia informa, iha preparasaun simu vizita amu papa Francisc mai Timor-Leste, Autoridade Forsa Tarefa Konjunta iha ona medidas balun, bainhira sidadaun balun hakarak aproveita halo polítiku iha eventu ida ne’e.

“Iha ona medidas nesesariu ba ita nia Forsa Tarefa Konjunta atu implementa iha vizita Amu Papa Francisco mai Timor-Leste, bainhira ema ruma hakarak aproveita halo polítiku iha Vizita relijiosa ida ne’e ba Timor-Leste,” hakotu nia.

Enkuantu, Sua Satidade Papa Francisco sei to’o Timor-Leste iha loron 9 to’o 11 Fulan Setembru tinan 2024, tuir planu ema hamutuk rihun atus hitu (700.000) mak sei partisipa misa boot iha Tasi-Tolu iha loron 10 fulan Setembru.

Jornalista : Ermelinda Soares & Marciana da Conceição