FECT No FMCS Sai Kampiaun Iha Kompetisaun Desportu Dias Natalis UNTL 2022
Imajen Adeptus Jogadores sira husi FECT no FCMS UNTL
DILI-Ekipa Fakuldade Enjenaria Siensia Teknolojia (sigla portuges FECT) sai kampiaun iha kompetisaun desportu Dias Natalis Univesidade Nasional Timor-Leste (UNTL) 2022 ba modalidade Futsal, hafoin halakon nia adversariu Fakuldade Ekonomia no Jestaun (sigla portuges FEG) iha jogu final.
Rezultadu Jogu final mane entre ekipa FECT kontra Ekipa FEG no jogu feto entre Ekipa Fakuldade Medisina Siensia Saude (FMCS) kontra Fakuldade Siensia Exata (FCE) realiza iha kampu Habibie Bidau Santa Ana, Dili tersa (8/11), iha ne’ebe jogu refere Ekipa FECT konsege hetan vitoria hafoin halakon nia adversatiu ekipa FEG ho skore 12-8 no ekipa FMCS manan FCE ho skor 9-2, rezultadu refere lori ekipa FECT ho FMCS sai kampiaun iha Dias Natalis UNTL Cup 2022.
Hafoin Remata jogu kapitaun husi ekipa FECT Angelo Fernandes hatete, sente kontente tanba bele sai kampiaun no marka istoria iha fakuldade antes sira husik sira nia almamater iha univesidade ne’e
Imajen Manan Nain FECT Simu Premiu
“Ha’u sente kontente tanba ami bele sai kampiun iha Dias Natalis UNTL Cup, kampiun ida ne’e sai istoria ida ba ami halo iha fakuldade enjenaria siensia teknolojia antes ami husik ami nia almamater iha UNTL, durante ne’e ami la iha preparasaun masimu ba jogu ida ne’e tanba ami nia jogador ida ne’e iha esperensia jogu ne’eb diak ne’ebe ami komunika ba malu hodi mai tuir jogu ida ne’e konsege hatudu rezultadu diak”, tenik Angelo iha Kampu Futsal Ponte Habibie, 08/11/2022
Iha Sorin Seluk jogador ekipa FEG Gumario Morreira dehan, la triste no kontente liu, ne’eb sira hato’o obrigdu ba UNTL no durante sira tuir kompetisaun ne’e sira halo preparasaun masimu.
“Ha’u la sente triste liu no kontente liu, ami hakarak hato’o obrigadu tebes ba ami nia eskola UNTL tanba ami nia fakuldade ekonomia tuir eventu barak tebes inklui jogu Dias Natalis UNTL Cup 2022 ne’e”, Gumario hateten
Iha fatin hanesan Komisaun Organizador Fernando Baptista informa, kompetisaun desportu ne’e atu komemora loron Dias Natalis UNTL nian ba da-22 ne’ebe sira realiza jogu ba ekipa feto sia no mane sia ne’ebe reprezenta fakuldade sia iha UNTL
“Kompetisaun desportu ne’e atu komemora loron Dias Natalis UNTL nian ba da-22 ne’ebe ita halo kompetisaun desportu mak hanesan kompetisaun ba modalidade futsal no voleibol ba feto mane ne’ebe partisipa husi estudante sira reprezenta fakuldade sia iha univesidade ne’e, kompetisaun desportu ne’e partisipa husi ekipa feto sia no mane sia ne’ebe kompetisaun ne’e finansia husi Ministeriu Ensinu Superior Siensia no Kultura”, Fernando afirma
Fernando informa, rezultadu husi jogu ne’e mak ba ekipa mane manan nain dahuluk mak FECT ne’ebe hetan premiu orsamentu ho montante 500 USD, manan nain daruak mak ekipa FEG simu orsamentu 400 USD, manan datoluk mak ekipa fakuldade direitu hetan orsamentu 300 USD, kompetisaun feto manan nain dahuluk mak ekipa Fakuldade Medisina Siensia Saúde simu orsamentu 500 USD, manan nain daruak mak ekipa Fakuldade Siensia Exata hetan 400 USD no manan nain datoluk mak Fakuldade Edukasaun Arte Umanidade simu orsamentu 300 USD.
Imajen Ekipa Vensedor husi Fakuldade Medisina Ciensia da Saude
Enkuantu, iha modalidade Voleibol FECT mantein vensedor husi ekipa mane, wainhira halakon nia adversariu Fakuldade Ekonomia no Gestaun, entretantu, atividade extrakurikular refere hetan apoia husi Ministeriu Ensinu Superior siensia no Kultura ho orsamentu hamutuk rihun ruanulu resin-rua liu ba modalidade desportiva inklui formasaun, debate sientifika, dansa, gastronomia, poezia, trio vokal, limpeza jeral no seluk tan
Reportajen : Augusto dos Santos
Editor : Ekipa Editorial