FFTL Fo Lampu Matak, AFTL Sei Realiza Liga Futsal 2022
Imajen Intervista Sekretariu Jeral AFTL Fernando Baptista
(SAP News TL) DILI- Asosisaun Futsal Timor-Leste (AFTL) sei realiza liga futsal Timor-Leste iha fulan Novembru tinan ne’e maibe depende ba rejistrasaun klube 24 ne’ebe antes ne’e kompete ona iha pra liga futsal 2020-2021 tanba Federasaun Futebol Timor-Leste (FFTL) fo lampu hijau ba assosisaun atu realiza liga ne’e rasik.
“Ita iha ona lampu hijau husi FFTL ne’ebe agora ita hein klube sira rejistu hotu ona tuir rekezitu liga nian, ita komesa ona ita nia liga futsal Timor-Leste iha fulan Novembru 2022 tanba ita halo konkordansia ho klube sira lolos rejistrasaun hotu ona iha semana kotuk maibe ita prolonga tan semana ida ba rejistrasaun ne’ebe foin klube haat mak halo rejistrasaun”, sekretariu jeral AFTL Fernando Baptista ba jornalista iha kampu Habibie Bidau Santa Ana, Dili tersa (8/10).
Sekretariu jeral akresenta, agora sira fo tan semana ida ba klube sira atu halo rejistrasaun tanba foin daudauk klube sira sei partisipa Iha Tasa AFAMA no Femenina F-FDTL 2022 ne’ebe hein to’o klube 24 ne’e halo rejistrasaun hotu sira hala’o liga futsal 2022 ba divizaun dahuluk no daruak ne’ebe klube sanulu mak sei kompete iha divizaun dahuluk no klube 14 mak sei kompete mos iha liga futsal Timor-Leste 2022.
Fernando informa, kampu AFTL sei esforsu para utiliza kampu Fatuhada tanba ne’e mak klube sira sujere ba assosisaun para hala’o liga ne’e iha kampu refere
“Kampu ne’ebe klube sira sujere mai ami maka utiliza kampu kuartel jeneral F-FDTL Fatuhada tanba tuir standarte internasional nian, AFTL sei esforsu atu nune’e utiliza nafatin kampu ida ne’e tanba kampu altenativu hanesan jinaziu desportu Dili klube sira hotu rezeita”, tenik Fernando
Reportajen: Augusto dos Santos