FFTL La Iha Lideransa ! MJDAK Sei La Fo Apoiu Finanseiru

SAPNewsTL, Dili: Ministeriu Juventude Desportu Arte Kultura (sigla portuges MJDAC) sei la apoiu finanseiru bainhira Federasaun Futebol Timor-Leste (FFTL) la iha lideransa tanba kongresu FFTL da IX mos kansela nune’e FFTL seidauk iha iha estrutura kompletu ba periodu 2024-2026.

“Bainhira federasaun ida iha ita nia rai, atu futebol, voleibol ka basketebol no sira seluk tan, sira nia organizasaun lao la diak la iha lideransa mak governu liu husi MJDAC sei la fo apoiu finanseiru ba sira nia atividade maibe governu nia servisu liu husi komisaun nasional desportu hare’e lalaok organizasaun sira”,

“Nune’e kongresu FFTL nian kansela ne’e ita nia ema husi komisaun nasional desportu balun mos akompaña hela no sira iha relatoriu ba kongresu nian depois ita sei halo desizaun aktu kongresu FFTL da IX nian ne’e”, dehan Ministru juventude desportu arte kultura Nelyo Isaac Sarmento ba jornalista sira iha resintu edifisiu MJDAC Lecidere, Dili kinta (11/01/2024).

Ministru hatutan, governu la fo apoiu ne’e laos governu husik deit ona maibe governu iha komisaun nasional desportu atu hare’e problema iha federasaun sira tanba governu nia servisu ba fatin hotu no organizasaun nia interese hotu-hotu.

Nia informa tan, governu mos sei haruka surat ba FFTL atu nune’e FFTL halo esplikasaun ho relatoriu kongresu FFTL oinsa depois submete mai governu atu foti desizaun problema akontese iha FFTL liu husi kongresu FFTL da IX kansela ne’e.