DJD-MJDAC Sei Kontinua Atividade Desportu Husi Tinan Kotuk
SAPNewsTL, Dili: Ministériu Juventude Desportu Arte Kultura sigla portuges (MJDAC) liu husi Diresaun Jéral Desportu (DJD) sei kontinua atividade desportu husi tinan kotuk nian kona ba desportu eskolar, komunitaria no alta prestasaun.
“Planu husi ami parte diresaun jeral desportu nian iha MJDAC ne’e kontinuasaun nafatin tinan kotuk nian kona ba desportu komunitaria, eskolar no koalia kona ba alta prestasaun”, dehan diretor jerál desportu João Rodrigues ba jornalista sira iha resintu edifisiu MJDAC Lecidere,Dili kinta (11/01/2024).
Diretor jéral hatutan, atividade alta prestasaun nian mak kompetisaun boot iha mundu besik daudaun ona Timor-Leste atu ba partisipa mak jogu Olimpiku 2024 iha Fransa akontese iha loron 26 fulan jullu to’o loron 11 fulan agostu 2024.
“Tan ne’e MJDAC sei koordenasaun ho CDTL , CONTL ho CPNTL tanba tempu besik sei halo preparasaun ba atleta nune’e program ne’e sira sei hasoru uluk no atleta Timor-Leste ho numeru kiik ba partisipa jogu olimpiku ne’e”. Nia informa.
João informa tan, planu seluk importante hala’o iha tinan 2024 mak tuir dadus daudaun diresaun desportu MJDAC hetan federasaun desportiva hamutuk 37 rejistadu iha CDTL.
Tan ne’e parte MJDAC sei halo koordenasaun ho komisaun nasional desportu hodi bele husu federasaun desportiva sira nia kondisaun para tinan 2024, sira foku hadia organizasaun para iha 2025 hahu dezenvolve ho atividade kompetisaun sira.
Nia afirma tan, planu sira ne’e sira sei prepara orsamentu naton para hala’o atividade sira ne’e maibe numeru serteza sira sei konsolida tiha iha diresaun Jéral desportu MJDAC depois mak sira fo sai montante orsamentu serteza maibe inisiu fulan fevereiru sira hahu ona atividade desportu iha Timor-Leste.
Reportajen: Augusto dos Santos