Nelyo: Kongresu Kansela Prezudika Finanseiru FIFA Mai FFTL
SAPNewsTL, Dili: Ministru Juventude Desportu Arte Kultura (MJDAK) Nelyo Isaac Sarmento hatete, kongresu Federasaun Futebol Timor-Leste (FFTL) da IX kansela prezudika finanseiru husi Federation International Football Association (FIFA) nu’udar organizasaun ba futebol iha mundu.
“Kanselamentu kongresu FFTL da IX ne’e prezudika tebes ba ita nia FFTL agora tanba klaru katak apoiu finanseiru husi FIFA sei la mai tan depois ema nain hira servisu FFTL mos sei lakon oportunidade tan ne’e ha’u husu ba lideransa FFTL daudaun ne’e buka dalan urjente para oinsa realiza fali kongresu FFTL nian atu nune’e hamosu fila fali konfiansa FIFA, AFC no AFF ba Timor-Leste iha nivel Asean, Azia no internasionál”, dehan ministru juventude desportu arte kultura Nelyo Isaac Sarmento ba jornalista sira iha resintu edifisiu MJDAC Lecidere, Dili kinta (11/01/2024).
Ministru hatutan, tuir informasaun nia hetan kona kongresu FFTL kansela ne’e komisaun eleitoral la halo tuir desizaun ne’ebe komisaun rekursu hasai maibe tuir lolos komisaun rekursu mak as liu iha lalaok eleisaun kongresu FFTL nian no karik iha membru ezekutivu FFTL balun iha interese ba kandidatu prezidente FFTL entaun sira baralla buat hotu la iha konsistensia lidera meza kongresu.
Nune’e buat sira ne’e hatudu imajen Timor-Leste nian la diak ba internasional tanba foin daudauk kongresu ne’e marka prezensa mos reprezentante husi FIFA, prezidente AFC no sekretariu jeral AFF, sira mai tanba Timor-Leste nune’e sira mai akompaña kongresu ne’e.
Nelyo informa tan, karik ema sira hakarak ne’e tuir lolos aktu ne’e la akontese maibe tanba sira la iha pensamentu diak katak futebol Timor-Leste integra iha mundu nune’e iha jogu barak obrigatoriu Timor-Leste tenki partisipa maibe tanba grupu ka ema ida rua nia egoismu halo baralla buat hotu iha kongresu.
Nia afirma tan, aktu kongresu federasaun futebol iha nasaun hotu mai kedas padraun husi FIFA katak ne’e iha regra atu halo tuir bainhira federasaun futebol ida halo kongresu hanesan FFTL nian, nune’e orgaun ida ne’ebe mak lidera eleisaun ne’e mak komisaun eleitoral no rekursu bainhira aktu ruma iha eleisaun lalos membru iha direitu atu hatama rekursu.
Enkuantu, tuir informasaun ne’ebe SAPNewsTL asesu antes ne’e Presidente Interinu FFTL Falur Rate Laek afirma nia parte sei reuniaun ho ezekutivu FFTL hodi realiza fali kongressu FFTL iha tinan ne’e.
Reportajen: Augusto dos Santos