Estudante UNTL, Tomerlius Hili Bandeira Ne’ebe Deskunhesidu Soe Ba Lixeiru Iha Portugal
SAPNewsTL, Portugal : Estudante Universidade Nasionál Timor Lorosa’e (UNTL) Tomerlius de Jesus hili Bardeira Timor-Leste ne’ebe ema deskunhesidu soe ba lixeiru ida iha Sidade Lisboa Portugal.
Sidadaun Timor oan, Estudante Universidade Nasionál Timor Lorosa’e (UNTL) Tomerlius de Jesus haktuir, nia hetan Bandeira Timor-Leste ne’e iha oras dader molok nia ba servisu, hafoin nia haree ema soe iha foer fatin tanba ne’e nia deside ba foti no lori fila ba uma.
“Iha oras dader, ha’u atu ba servisu maka haree Bandeira Timor-Leste ema soe ba Lixeiru ida iha sidade Lisboa, Nasaun Portugal tanba ne’e ha’u ba foti no lori ba uma. Ha’u foti tanba ha’u sente katak Bandeira ne’e laos hanesan hena baibain ne’ebe ema soe maibe bandeira ne’e ema wain pinta ho ran no ruin mak forma sai bandeira ida”. Tenik Finalista Estudante UNTL Tomerlius de Jesus ba SAPNewsTl liu husi via telefonika iha Lisboa, 10/01/2024.
Estudante Finalista UNTL ne’e hatutan, wainhira nia hetan bandeira ne’e ho fuan nakdedar no ran nakali nia ba hili hodi ba tau iha nia kuartu ne’ebe nia uza ba nia deskansa, hafoin sai husi servisu.
“Ha’u hadomi Timor-Leste, ha’u hadomi bandeira Timor, bandeira ne’e pinta ho ema rihun atus tolu ninia ran no ruin ne’ebe fakar no naklekar, ha’u sente triste wainhira ema soe ida ne’e ba foer fatin, ha’u sente la hakmatek, ha’u ho fuan nakdedar no ran nakali katak ema ne’ebe soe ne’e traidor no laiha sentidu ba Timor”. Tomerlius de Jesus hateten
Sidadaun Timor oan, Lautem nia oan mane ne’e husu ba Timor oan hotu atu hatene hadomi ninia povu no nasaun, liliu labele soe bandeira Timor-Leste iha lixeiru tanba ne’e hahalok traisaun ida ba heroi funu na’in sira.
“Soe bandeira ne’e traisaun no insultu ida ba heroi funu nain sira, Timor oan ida-idak tenki hatene valoriza, dignifika no tane aas povu no nasaun, inklui baku malu, oho malu, fahe malu no estraga malu ne’e hotu kontra liberdade, direitus humanus, demokrasia no valor humanidade nian”. Tomerlius Sublinha
Enkuantu, Tomerlius de Jesus estuda iha Departamentu Enjenharia sivil, Fakuldade Enjenharia Siénsia no Teknolojia, UNTL desde 2019 no sai estudante finalista iha tinan 2022, Estudante ne’e deside ba Portugal iha Janeiru 2023 hodi buka servisu no agora daudaun servisu iha Lisboa Portugal, tuir planu nia sei mai fali hodi finaliza nia estudu iha tempu badak.
Jornalista : Marcela Mery da Costa