Kongresu FFTL Manas ! Falur Ho Triste Husu Deskulpa & Nilton Resigna An

SAPNewsTL, Dili: Relasiona ho Kongresu Federasaun Futebol Timor-Leste (FFTL) da IX  Periodu 2024-2026 ne’ebe kanseladu tanba inkapasidade husi komisaun eleitoral, Presidente Interinu FFTL Falur Rate La’ek husu deskulpa ba nia desizaun no kandidatu Nilton Gusmão deside rezigna an.

Kandidatu  Nilton Gusmão deside rezigna an hosi nia kandidatura tanba nia parte konsidera kongresu refere nia kredibilidade la iha ona.

“Diskusaun manas tebes, hatudu dinamiku ida diak maibe hamosu dezentendimentu ita koalia familia Futebol mais  bosok deit, hakarak dezenvolve futebol maibe la hatene atu defende buat ne’ebe  no atu ba iha ne’ebe, kongresu ida ne’e nia kredibilidade la iha tiha ona, ohin hanesan ne’e, hanesan ne’eba no ba han tiha mai oin seluk, nune’e nu’udar kandidatu, ha’u la konkorda atu konkorre iha eleisaun ida ne’ebe laiha kredibilidade, tan ne’e ha’u deside rezigna  an husi hau nia kandidatura ba prezidente FFTL,” Nilton Gusmão deklara iha Otel Timor Colmera, Dili kuarta (10/01/2024).

Iha fatin hanesan, Falur Rate Laek mos husu deskulpa ba desizaun ne’ebe komite eleitoral FFTL halo no ho situasaun dezentendimentu ida ne’e obriga nia atu halo desizaun  la fo satisfas ba membru hotu-hotu nia hakarak maibe nia tenke halo kanselamentu ba kongresu ohin loron  no sei halo reuniaun ho ezekutivu FFTL nian para bele halo deliberasaun ba kongresu tuir mai mezmu triste no laran dodok mos tanba kongresu adia.

“Ita nia kongresu ohin loron ita kansela tanba ita nia komisaun rekursu no eleitoral nia desizaun halo ita hotu la satisfas hodi hamosu dezentendimentu entre kongresista  sira, deskulpa ba desizaun ida ne’e maibe sei halo reuniaun ho ezekutivu FFTL hodi delibera kongresu tuir mai”, dehan  Prezidente interinu FFTL Tenente Jeneral Domingos Raul “Falur Rate Laek”

Prezidente Interinu deklara, komite eleitoral nia desizaun halo  ulun moras tan ne’e ba oin FFTL  sei troka hotu, sira sei koalia ho ezekutivu para hare’e asuntu ne’e.

Bainhira prezidente interinu FFTL fo komite eleitoral no rekursu FFTL  halo esplikasaun kona ba lalaok sira ba votasaun,  iha momentu  ne’e kedas mosu dezentendimentu entre kongresista husi asosiasaun futebol no asosiasaun profisional sira  kona ba direitu  votu iha kongresu  FFTL hamutuk ema nain-21.

Dezentendimentu ne’e mosu tanba direitu votu husi asosiasaun futebol munisipiu Viqueque ho Ainaro no asosiasaun arbitrajen iha delegadu nain rua tanba tuir estatutu FFTL so delegadu ida deit mak iha direitu votu buat sira ne’e mosu tanba  komite eleitoral no rekursu FFTL mak halo failansu iha prosesu rejistrasaun delegadu ba hili kandidatu nian.

 

Dezentendimentu  kontinua manas  ikus mai prezidente interinu FFTL foti desizaun hodi husu atu asosiasaun sira  iha disputa ne’e kontinua halo konsulta ba malu atu hetan solusaun mak asosiasaun futeból Viqueque, Ainaro no Arbitrajen tan ne’e asosiasaun Viqueque, Arbitrajen no Ainaro deside sei la ba vota tanba iha problema ba delegadu.

Molok atu tama ba votasaun  ikus mai komite eleitoral no rekursu FFTL hamosu fila fali desizaun hodi  halo deside  katak   prezidente asosiasaun arbitrajen, Viqueque no Ainaro iha fali direitu votu tan ne’e ho desizaun komite eleitoral no rekursu la mantein entaun hamosu fila fali dezentendimentu husi kongresista sira halo barullu iha kongresu laran 

Hafoin dezentendimentu  ne’e kontese iha kongresu FFTL nian  hatudu komite eleitoral no rekursu FFTL la mantein desizaun ida, Jornalista Media SAPNewsTL  tenta halo kedas konfirmasaun ho parte komite eleitoral no rekursu FFTL, maibe sira rejeita fo komentariu.

Tuir observasaun Media SAPNewsTL iha terenu kongresu  FFTL nian hahu iha  10:00 Otl, partisipa husi ministru juventude desportu arte kultura Nelyo Isaac Sarmento, prezidente CDTL Macario F. Sanches, prezidente interinu FFTL Tenente jenerl Domingos Raul “Falur Rate Laek”  sekretariu jeral FFTL Gregorio Correia hamutuk ho ezekutivu sira  no reprezentante sira husi asosiasaun futebol no asosiasaun  profisional sira hanesan delegadu ba kongresu no kongresu ne’e rasik observa direitamente husi reprezentante mai husi FIFA, AFC no AFF.

Reportajen: Augusto dos Santos