Inkapasidade Lideransa ! Kongresu FFTL IX Laiha Rezultadu
SAPNewsTL, Dili: Kongresu Federasaun Futebol Timor-Leste (FFTL) da IX Periodu 2024-2026 kansela tanba inkapasidade husi komisaun eleitoral no rekursu FFTL toma responsabilidade ba rejistrasaun kandidatu to’o eleisaun hodi rezulta kandidatu Nilton Gusmão rezigna an.
“Ita nia kongresu ohin loron ita kansela tanba ita nia komisaun rekursu no eleitoral nia desizaun halo ita hotu la satisfas hodi hamosu dezentendimentu entre kongresista sira, nune’e ita adia tiha ba kongresu ba tempu tuir mai maibe ne’e FIFA la tau osan ona no sira ne’ebe interesadu atu halo kongresu ne’e mak tau osan”, dehan Prezidente interinu FFTL Tenente Jeneral Domingos Raul “Falur Rate Laek” ba jornalista sira iha Otel Timor Colmera, Dili kuarta (10/01/2024).
Prezidente Interinu hatutan, komite eleitoral nia desizaun halo ulun moras tan ne’e ba oin FFTL sei troka hotu, sira sei koalia ho ezekutivu para hare’e ida ne.
Falur Rate Laek mos husu deskulpa ba desizaun ne’ebe komite eleitoral FFTL halo no ho situasaun dezentendimentu ida ne’e obriga nia atu halo desizaun la fo satisfas ba membru hotu-hotu nia hakarak maibe nia tenke halo kanselamentu ba kongresu ohin loron no sei halo reuniaun ho ezekutivu FFTL nian para bele halo deliberasaun ba kongresu tuir mai mezmu triste no laran dodok mos tanba kongresu adia.
Desizaun komite eleitoral no rekursu FFTL halo ne’e hatudu inkapasidade tan ne’e hamosu dezentendimentu entre kongresista sira ikus mai kandidatu Nilton Gusmão deside rezigna an hosi nia kandidatura tanba kongresu nia kredibilidade la iha ona.
“Diskusaun manas tebes, hatudu dinamiku ida diak maibe hamosu dezentendimentu ita koalia familia Futebol mais bosok deit, hakarak dezenvolve futebol maibe la hatene atu defende buat ne’ebe no atu ba iha ne’ebe, kongresu ida ne’e nia kredibilidade la iha tiha ona, ohin hanesan ne’e, hanesan ne’eba no ba han tiha mai oin seluk nune’e nu’udar kandidatu, ha’u la konkorda atu konkorre iha eleisaun ida ne’ebe laiha kredibilidade, tan ne’e ha’u deside rezigna an husi hau nia kandidatura ba prezidente FFTL,” Nilton Gusmão hatete ba kongresista sira hotu iha kongresu laran.
Tuir observasaun Media SAPNewsTL iha terenu kongresu FFTL nian hahu iha 10:00 Otl, partisipa husi ministru juventude desportu arte kultura Nelyo Isaac Sarmento, prezidente CDTL Macario F. Sanches, prezidente interinu FFTL Tenente jenerl Domingos Raul “Falur Rate Laek” sekretariu jeral FFTL Gregorio Correia hamutuk ho ezekutivu sira no reprezentante sira husi asosiasaun futebol no asosiasaun profisional sira hanesan delegadu ba kongresu no kongresu ne’e rasik observa direitamente husi reprezentante mai husi FIFA, AFC no AFF.
Bainhira prezidente interinu FFTL fo komite eleitoral no rekursu FFTL halo esplikasaun kona ba lalaok sira ba votasaun, iha momentu ne’e kedas mosu dezentendimentu entre kongresista husi asosiasaun futebol no asosiasaun profisional sira kona ba direitu votu iha kongresu FFTL hamutuk ema nain-21.
Dezentendimentu ne’e mosu tanba direitu votu husi asosiasaun futebol munisipiu Viqueque ho Ainaro no asosiasaun arbitrajen iha delegadu nain rua tanba tuir estatutu FFTL so delegadu ida deit mak iha direitu votu buat sira ne’e mosu tanba komite eleitoral no rekursu FFTL mak halo failansu iha prosesu rejistrasaun delegadu ba hili kandidatu nian.
Nune’e kongresista sira halo diskusaun manas ho komite eleitoral no rekursu bazeia ba desizaun komite eleitoral no rekursu nian
Dezentendimentu kontinua manas ikus mai prezidente interinu FFTL foti desizaun hodi husu atu asosiasaun sira iha disputa ne’e kontinua halo konsulta ba malu atu hetan solusaun mak asosiasaun futeból Viqueque, Ainaro no Arbitrajen tan ne’e asosiasaun Viqueque, Arbitrajen no Ainaro deside sei la ba vota tanba iha problema ba delegadu.
Molok atu tama ba votasaun ikus mai komite eleitoral no rekursu FFTL hamosu fila fali desizaun hodi halo deside katak prezidente asosiasaun arbitrajen, Viqueque no Ainaro iha fali direitu votu tan ne’e ho desizaun komite eleitoral no rekursu la mantein entaun hamosu fila fali dezentendimentu husi kongresista sira halo barullu iha kongresu laran
“Entaun prezidente interinu FFTL deside kansela kongresu ne’e rasik hodi hadia ba tempu tuir mai no kandidatu Nilton Gusmão mos hatete ba kongresista sira katak nia rezigna husi nia kandidatu prezidente FFTL ba periodu 2024-2026”.Jornalista SAPNewsTL akompanha direita.
Dezentendimentu akontese iha kongresu FFTL nian hatudu komite eleitoral no rekursu FFTL la mantein desizaun ida, Jornalista Media SAPNewsTL tenta halo kedas konfirmasaun ho parte komite eleitoral no rekursu FFTL, maibe sira rejeita fo komentariu.
Entretantu, kanselamentu ba kongresu FFTL nian ne’e sei hamosu tristeza ba amante no adeptu hadomi futebol iha Timor-Leste, klube futebol no futsal sira iha Timor-Leste.
Reportajen: Augusto dos Santos