Finadu ! Buat Ne’ebe Sira Uluk, Ita Agora, Buat Ne’ebe Sira Agora, Ita Seidauk

SAPNewsTL, Lautem : Tempu finadu momentu kulminante ne’ebe familia ida-idak halibur hamutuk hodi ba vizita matebean sira nia rate, momentu ne’e ema hotu ba hodi hanoin, saudades, halo orasaun no kari ai-funan, “Buat Ne’ebe Sira Uluk, Ita Agora, Buat Ne’ebe Sira Agora, Ita Seidauk”.

Loron finadu hanesan loron ida ne’ebe importante ba umanidade ne’ebe sei halo viagem iha mundu, atu bele halo koneksaun espiritu ho matebian sira ne’ebe husik ona sira nia jornada moris iha mundu.

Iha loron 2 Fulan Novembru sai hanesan orasaun bo’ot ba matebian sira, loron ne’ebe lori saudades entre ema moris sira ba ema ne’ebe husik ona mundu, tuir tradisaun kristaun nian, dala-barak liu husi loron importante ida ne’e, jerasaun foun sira bele koñese nia ema sira ne’ebe husik ona mundu antes sira seidauk haree mundu nia furak.

Loron ida ne’e nu’udar loron importante no loron koneksaun ba ita ne’ebe sei moris iha mundu ho familia ne’ebe husik ona sira nia jornada moris iha mundu, kontinua afirma moris ne’ebe maromak fo hela mai ita hodi sai hanesan instrumentu domin no paz husi ita hotu no familia matebian sira.

Liafuan FINADU mai husi lia Latin katak “FINIS” ne’ebe signifika FIM ka hotu ona no adota ba lian portuguesa liu-husi verbu FINAR ho forma partisipiu passadu mak FINADO katak hotu ona, mate ona, to’o limite ona ka to’o ona ninia rohan. Tanba ita ema moris sempre iha Fin ka rohan.

Istória badak ho alin doben Ramízia da Silva ho idade tinan sia (9) ne’ebe tur iha nia Mama Ninia Rate, Horo, Luro-Lautém.

Wainhira ba kari ai-funan nia inan nian, Ramízia husu hakarak haree ninia mama nia oin tanba kleur tebes ona la haree ninia mama.

Ramízia : “Maun, Ha’u Hanoin, Ha’u Saudade Los, Ha’u Hakarak Haree, Ha’u Nia Mama …..!”.

Sergio : “Mama, Maromak Bolu Ona, Ita Labele Ona Haree Nia, Buat Ne’ebe Nia Uluk, Ita Foin, Buat ne’ebe Nia Agora, Ita Seidauk”. Lautem, 29/10/2024.

Ramízia : “Ha’u Hakarak Tebes Haree, Ha’u Nia Mama Nia Oin, Ha’u Hakarak Nia Hakuak & Kous Ha’u Hanesan Uluk. Ha’u nia mama uluk haree didiak ha’u, la hirus ha’u no sempre bolu ha’u. Lori ha’u ba eskola no fila ba uma, fo han no fo hemu ha’u. Agora nia lian ha’u la rona kleur ona”.

Sergio : “Alin, Buat Ne’ebe Liu Tiha Ona, Ita Labele Ona Atu Repete Hanesan Ramízia Imajina”.

Ramízia : “………Maibe, ha’u nia mama uluk dehan ba ha’u atu besik nafatin nia, labele ba dook husi nia”. (Ramízia ho oin triste, dehan sai liafuan ne’e).

Sergio : “Mama nia hakarak hamutuk nafatin ho ita, maibe Maromak bolu uluk ona nia ba dook husi ita, ita labele ona haree no hasoru nia hanesan uluk”.

Ramízia : Entaun, saida mak ita bele halo ?

Sergio : “Ita bele reza no harohan ba Maromak hodi nia hetan fatin di’ak iha Lalehan”.

Ramízia : “Ha’u sei ki’ik mos, Maromak bolu ona ha’u nia Mama. Ha’u sente triste no lor-loron ha’u ha oin hela deit kona ba nia”.

Sergio : “Nonok……… No Kaer Ramízia nia liman. Kalan ona, ita bele ba uma agora”.

Ramízia : “Entaun hasai ha’u nia foto lai, ha’u nia foto ho ha’u nia mama laiha, hasai foto hotu mak ita fila ba uma, depois ita ba Dili tanba ha’u eskola, uluk mos ha’u nia mama dehan, ha’u tenki ba eskola nafatin”.

Sergio : “Diak, Ramízia. Bele tur no hateke ba kamera. Ha’u hasai Ramízia nia foto”.

Hafoin hasai foto, Alin Ramízia ho família sira fila ba uma, rai ne’ebe kalan ona, Ramízia seidauk bele la’o kalan, Ramízia kous husi nia Maun to’o uma (kuaze 3 kilometru).

Lisaun badak, entre Sergio da Costa & Ramizia da Silva iha Lautem maka Mama nia domin ne’ebe inkondisional no la sukat, labele sura no nunka bele haluha. Mama ne’ebe sempre halo buat hotu ho domin ba oan sira, maske Ramízia sei labarik maibe buat hotu ne’ebe nia mama ko’alia, hatudu no halo ba Ramízia, Ramízia nunka haluha iha nia memória.

Agradese wainhira sei iha Mama, favor rona, respeita, kuidadu, tulun, hadomi, akompanha, fo hamnasa, fo kontente no halo huat hotu ne’ebe bele halo nia seguru, komfortavel no hakmatek ho hahalok sira ne’ebe ita halo ka expresaun sira ne’ebe ita fo iha ne’ebe deit, ba saida deit no bainhira deit. (Tasi & Rai Nia Luan, Ita bele sukat, maibe domin inan aman nian, ita nunka bele sukat ho saida deit).

Hein tan loron rua, tama ona iha loron finadu, loron 2 fulan Novembru tinan 2024, loron ne’e fo lisaun no reflesaun ba ita hotu katak mate la’os finalidade ida maibe mate mos hanesan misteriu maromak nian ba ema mak moris no mate, tempu ba moris, tempu ba mate, moris ne’e grasa ida maibe mate mos inisiu ida ka pasu ida ba moris rohan laek nian.

Bom finadu ba ema hotu, finadu ne’ebe lori reflesaun, saudades, matak no malirin ba ema hotu.

Jornalista : Dircia Baptista Belo