Finaliza Treinu Iha Brazil, Jogador Ario & Noberto Hetan Kontratu Husi Qatar

SAPNewsTL, Dili: Hafoin Jogador Ario M. Ximenes ho Noberto O. Da Costa ohin fila hikas mai Timor-Leste tanba finaliza ona sira nia treinamentu iha Brazil, iha hasoru ho Ministru Juventude Desportu Arte Kultura (sigla portuges MJDAC) Nelio Izaac Sarmento aprezenta katak sira hetan kontratu husi klube iha nasaun Qatar.

“Ohin ami hasoru MJDAC Nelio Izaac Sarmento aprezenta rezultadu treinu husi jogador Ario M. Ximenes ho Noberto O. Da Costa durante iha Brazil, ita nia jogador nain rua hatudu progresu diak tebes iha kompetisaun lubuk ida depois oferese tasa rua ba klube ne’ebe fo oportunidade estajiu ba sira no sira nain rua mos hetan ona kontratu husi klube Fujairah FC iha Dubai, Qatar”,

“Jogador Ario Ximenes nia para kontratu ohin ami lori mai ona entrega ba MJDAC, ami sei hare’e hamutuk ho MJDAC Ho FFTL tanba Fulan setembru jogador nain rua ne’e tenki ba Dubai, Qatar ona “, Dehan Representante Sentru Treinamentu futebol juvenil Munisipiu Baucau Adelino da Silva ba jornalista sira iha edifisiu MJDAC Lecidere, Dili sesta (11/08/2023).

Adelino hatutan, jogador nain rua ne’e aranka husi Timor-Leste ba Brazil iha loron 6 fulan fevereiru 2023 bainhira to’o Brazil sira nain rua hala’o kedas treinamentu asosiasaun Atletico Viuna Iha São Paulo depois hatudu progresu diak tebes, jogador Ario M. Ximenes mos hetan oportunidade reforsa selesaun nasional munisipiu sira hela ba hodi kompete jogu rejional São Paulo nian

Ohin fila hikas mai Timor-Leste tan ne’e husi parte sentru treinamentu futebol juvenil Baucau fo obrigadu no agradese ba MJDAC nia apoiu, tanba esforsu lori jogador nain rua ba Brazil laos esforsu mesak husi sentru treinamentu futebol juvenil munisipiu Baucau deit maibe hamutuk ho sentru treinamentu futebol Timor-Leste, MJDAC no FFTL.

Iha fatin hanesan, Jogador Norberto O. Da Costa hatete, durante sira hala’o treinamentu iha Brazil sira nain rua hatudu progresu diak tanba sira konsege lori tasa rua ba klube sira treinu ne’e no sira senti kontente tanba klube husi nasaun boot hanesan Brazil bele fo oportunidade ba sira hala’o treinamentu.

“Durante ami hala’o treinamentu iha Brazil, ami hatudu progresu diak tanba ami konsege lori tasa rua ba klube ami treinu ne’e, tan ne’e ami mos senti kontente tanba klube husi nasaun boot hanesan Brazil bele fo oportunidade ba ami hala’o treinamentu”, tenik Norberto
Iha sorin seluk, Ministru Juventude Desportu Arte Kultural Nelio Izaac Sarmento informa, sira nain rua durante treinu hatudu progresu diak maski hetan difikuldade no tuir lolos sira la fila mai Timor-Leste tanba hetan kontratu husi klube husi Qatar maibe tanba problema visa iha Brazil nune’e ho esforsu governu haruka sira fila mai Timor-Leste.

“Sira nain rua hatudu progresu joga diak tebes no aprende mos karater jogu Brazil nian, durante hala’o treinu importante tebes ba jogador nain rua ne’e, durante sira hala’o treinamentu sira hetan difikuldade maibe ladun boot tanba governu mos fo apoiu masimu ba sira liu husi monitoriza sira treinu, tuir lolos jogador nain rua ne’e la fila mai Timor-Leste tanba sira hetan kontaktu husi klube ida husi Qatar atu ba joga iha neeba maibe jogador nain hetan problema iha visa iha Brazil nune’e ho esforsu governu haruka jogador nain rua ne’e fila mai Timor-Leste”.

“Antes sira fila mai ne’e sira nia kontratu ho klube iha Qatar la’o tiha ona tanba Ha’u mos simu ona kontratu husi Qatar ne’e no Ha’u buka informasaun ba klube ne’e profesional iha Qatar ka lae? Ikus mai Ha’u hetan konfrimasaun duni husi federasaun futebol Qatar katak klube ne’e profesional iha Qatar”, dehan Nelio
Nia haforsa tan, jogador nain rua nia kontratu ne’e klube iha Qatar halo uluk ba jogador ida depois ohin sira antes to’o Timor-Leste kontratu ba jogador ida seluk ne’e mai tan nune’e sira nain rua hetan kontratu profesional husi klube iha Qatar

Nune’e fo orgullu ba jogador nain rua ne’e no diak tebes ba Timor-Leste no mos nia informa ba inan aman sira hamutuk ho sentru treinamentu futebol juvenil munisipiu Baucau sempre akompaña sira tanba keta husi sira sai vitima ba klube boot sira hodi halakon sira nia espiritu joga nian
Ministru ne’e afirma tan, sira nain rua sei ba joga iha Qatar ne’e iha idade U-18 nian ne’ebe fo oportunidade diak ba sira atu sa’e ba kompete senior nian tan ne’e ba jogador sira hotu iha Timor-Leste bainhira aprende diak ho dixiplina sei hetan oportunidade hanesan jogador nain rua ne’e

Hein katak sentru sira governu hari’i ne’e bele produs jogador sira tan tanba sentru sira laos fo treinamentu deit tenki buka merkadu iha area Brazil, Portugal no nasaun sira iha Azia para bele hetan klube sira lori jogador idade kiik sira ba halo estajiu hanesan jogador nain rua agora ne’e.

Nelio dehan tan, nia hakarak hato’o ba públiku esforsu kada sentru treinamentu futebol juvenil estabelese iha kada munisipiu durante tinan naruk to’o ikus sentru treinamentu futebol juvenil munisipiu Baucau halo komunikasaun ho organizasaun futebol sira iha rai liur espesialmente iha Brazil

Reportajen: Augusto dos Santos