FSKTL Realiza Kampionatu Nasional Prepara Ba Kompetisaun Internasional

SAPNewsTL,Dili: Federasaun Shorinji Kempo Timor Leste (FSKTL) realiza kampionatu nasional ne’ebé partisipa husi atleta nain-64 husi munisipiu sira tanba federasaun halo selesaun  hodi prepara atleta ba kompetisaun internasional iha Futuru.

“Ohin ami realiza kampionatu nasional, ami nia atleta sira ne’ebé ohin partisipa kampionatu nasional mai husi munisipiu Bobonaro, Ermera, Lautem, Baucau no Dili ne’ebé hamutuk nain 64  feto 32 mane 32, kada munisipiu sira ne’e mai ho atleta feto 6 no mane 6 ne’ebé feto sei joga iha randori 45 kg, 46-50 kg, 51-55 kg no mane 46-50 kg, 55 kg no 60 kg”. Dehan Prezidente Komisaun Organizadora Serviano A. Cardoso ba jornalista sira iha Jinaziu Desportu Caicoli-Dili, Sexta-Feira,26/08/2022.

Prezidente komisaun ne’e akresenta tinan  oin sei iha kompetisaun internasional kempo nian ne’ebé espera katak sira hatudu jogu ne’ebé di’ak.

“Kampionatu Nasional ne’e nu’udár planu anual federasaun nian para sai nu’udar dalan ba federasaun atu kualifika atleta sira atu nune’e bainhira iha eventu rejional no internasional iha futuru, atleta sira bele partisipa tanba tinan oin sei iha Sea Games no kompetisaun internasional kempo nian, ne’ebé hein katak sira bele hatudu jogu di’ak hodi manan kualifikadu tanba eventu sai hanesan sasukat ba sira”. Tenik nia

Serviano hatutan, kompetisaun ne’e hetan apoiu husi SEJD  durante loron rua no kompetisaun ne’e iha tipu randori no embu ba feto mane

“Kompetisaun ne’e ami hetan apoiu masimu husi governu atraves Sekretariu Estadu Juventude Desportu (SEJD) ne’ebé finansia ho orsamentu montante 9,608 USD ba atividade durante loron rua nia laran  ne’ebé iha eventu ami fahe ba tipu randori (free fight) no embu (aplika tekniku kempo)  ba feto no mane”. Nia informa

Prezidente ne’e mos husu ba governu atu tau atensaun mos ba modalidade individu tanba sira mos hatudu prestasaun di’ak.

“Husu ba ita nia governu tau importansia mos ba modalidade individu sira tanba durante ne’e tau atensaun liu ba modalidade grupu para atu nune’e ba futuru ita bele hetan prestasaun di’ak iha jogu rejional no internasional sira tanba  ita haree dala barak modalidade individu hatudu prestasaun di’ak liu kompara ho modalidade grupu sira iha kompetisaun internasional”. Nia hatete

Iha fatin hanesan Prezidente FSKTL Miguel Manetelu apresia ba SEJD ne’ebé apoiu ona federasaun halo kampionatu nasional ne’e tanba kuaje atividade federasaun desportivu iha Timor Leste depende ba orsamentu governu.

“Ha’u hakarak fo apresisaun ba SEJD ne’ebé fo apoiu orsamentu ba federasaun hodi realiza kampionatu nasional ba dala sia iha tinan ne’e  nu’udár ami nia planu anual federasaun nian no ba dahuluk sua eselensia Sekretariu Estadu partisipa kampionatu nasional federasaun Shorinji Kempo nian, kuaje ita nia federasaun desportivu iha Timor Leste atu realiza kampionatu nasional ne’ebe fo biban ba atleta sira hatudu tekniku sira ne’ebe hetan iha treinu nian maibé ne’e depende ba orsamentu estadu mai husi SEJD”. Miguel realsa

Entretantu,  reprezentante CDTL Zeferino Tilman Viegas parabeniza federasaun tanba liu husi kompetisaun ne’e federasaun bele produs atleta kualifikadu hodi prepara ba jogu internasional sira.

“Ha’u lori CDTL nia naran hato’o parabéns ba federasaun Shorinji Kempo tanba liu husi kampionatu nasional ida ne’e mak bele hetan atleta kualifikadu, ne’ebé bainhira iha kompetisaun internasional federasaun prepara ona ita nia atleta sira no liu husi kompetisaun ne’e bele fo biban ba ita nia atleta sira hatudu jogu hodi bele sai manan nain ho kualidade no atleta kualifikadu”.  Zeferino relata

Enkuantu,Sekretariu Estadu Juventude no Desportu Abrão Saldanha kontente partisipa kampionatu nasional FSKTL

 “Ha’u kontente tebes ohin partisipa kampionatu nasional ba FSKTL nian ba dala sia ne’ebé ha’u lori governu nia naran  hato’o parabéns ba federasaun mezmu iha tempu difisil realiza kampionatu nasional iha tinan ne’e tanba hari’i federasaun desportivu ida nia dezenvolvimentu final maka kampionatu nasional ne’e hein katak liu husi kompetisaun ida ne’e ita bele produs atleta kualifikadu, ne’ebe fo orgullu ba federasaun no Timor Leste ba jogu internasional sira”. Nia subliña

Jornalista: Augusto dos Santos

Editor: Ekipa Editorial