Guvernu No Setor Privadu Halo Meza Redonda Diskute Turizmu Ba Futuru

SAPNewsTL,Dili: Ministeriu Turismu Komersiu no Industria (MTKI) hala’o diskusaun meza-redonda iha ambitu komemorasaun  loron mundial turizmu  ba tinan 2022, iha ne’ebe involve husi governu no setor privadu sira atu hamutuk hodi ko’alia kona-ba dezenvolvimentu turizmu iha Timor Leste.

“Atu Selebra Loron Mundial Turizmu nian ida ne’ebé mak ita hahú selebra ne’e ho limpeza jeral iha Dili, depois halo abertura ba ever cross Dili Culture nian no mos iha kompetisaun ba pintura, turistika no ohin to’o iha nia pontu finalidade kona-ba diskusaun meza-redonda atu koalia kona-ba pensamentu husi sektor privadu, akademista, pensamentu husi sektor públiku seluk liga ba turizmu”. Dehan Vise Ministra Turizmu Komunitáriu no Kultura Inácia da Concenção Teixeira ba jornalista sira iha Centro Convenção Dili,Tersa-Feira, 27/09/2022.

Governante ne’e akresenta, liu husi meza-redonda ne’e ho tema Rethinking Tourism katak hanoin fila-fila pensamentu bá turizmu hodi define estratejia turizmu nian tanba turizmu la’os hatama reseita de’it maibé foka mos ba ema nia vida.

 “Ita hasoru pandemia Covid-19, entaun muda pensamentu lideransa mundial ba turizmu nian katak ita tenke define fila-fali ita nia estatejia hanoin kona-ba turizmu ba oin atu foka de’it katak turizmu ne’e la’os oinsa hatama reseita maibé oinsa foka ba ema nia vida atu oinsa hadia liu husi turizmu ba tema Rethinking Tourism katak hanoin fila-fila pensamentu ne’ebe mak ita hala’o ona”. Tenik nia.

Vise Ministra ne’e hatutan área turizmu atu la’o ba oin presiza sektor hotu-hotu nia hanoin, nune’e presiza koopera hamutuk hodi kria kondisaun hodi bele dezelvolve turismu ba oin.  

“Ha’u fiar katak ho diskusaun hanesan ohin ita bele hateke turizmu ba oin katak ita bele akumula turizmu atu la’o di’ak, la’os husi Ministru rasik mak tenke hanoin maibé Ministeiru no sektor privadu sira mos tenke fo hanoin hamutuk no husi parte akademista ne’ebe mak produz rekursu humanu mos bele komprende katak oportunidade ba área turizmu nian barak maibé ita tenke koopera hamutuk para kria kondisaun ida ne’ebé kria empregu ne’e”. Nia informa

Entretantu, nia  salienta tan, área turizmu ne’e iha oportunidade servisu ne’ebé mak barak tanba ne’e juventude nia papel importante tebes hodi halo kriasaun di’ak iha área turizmu hotu-hotu.

Jornalista: João Marito & Marcela da Costa

Editor: Luis dos Santos