Hakarak Xanana Fila Ba Primeiru Ministru, Kalbuady : Partidu CNRT Tenki Manan

SAPNewsTL, Dili : Partidu Congresso Nacional Reconstrução de Timor (CNRT) halo mini kampanha iha Postu Administrativu Kristu Rei Munsipiu Dili, Sekretariu Jeral Partidu CNRT Francisco Kalbuadi Lay hateten atu hadia povu nia moris no hametin estadu de direitu no demokratiku, maka povu tenki hili ema ida ne’ebe iha hanoin inkluzaun

“Ita presiza hadia estadu ida ne’e hodi bele hametin estadu direitu demokratiku katak ita presiza parlamentu forte mak hadomi nia povu no mos ita tenki inklina ema ida ne’ebe hanoin inkluzaun, ita presiza Avo Xanana hare rai no hadia povu nian moris, situasain ida ne’e ita labele husik tan, avo Nana tenki ba Primeiru Ministru, CNRT tenki menan” Dehan Sekretariu Jeral Partidu CNRT Francisco Kalbuadi Lay iha Ponte BJ Habibie, Postu Administrativu Kristu Rei, Kuarta (03/05/2023)

Francisco Kalbuadi Lay konsidera ema CNRT ne’e hakraik an, hadomi malu, hadomi ema hotu-hotu, festa demokrasia tinan lima dala ida, direitu ne’e povu nian, povu mak exerse sira nia direitu iha dia 21 Maiu, povu mak sei deside distinu nasaun ba tinan lima mai, Atu hadia povu nia moris CNRT presiza kadeira 33 ba leten iha Parlamentu Nasional

“Rai ida ne’e, ita presiza dezenvolve hamutuk Dr. Jose Ramos Horta, nia Presidente ba povu tomak, ita senti sedauk tinan ida iha mudansa boot, nia ema matenek hanoin povu, hadomi povu, nune’e ita presiza parlamentu forte  ho kadeira 33 ba leten, depois ahi rin bele forte, lori rai ne’e ba oin, ami hotu-hotu iha ne’e hamutuk ho Avo Nana, ita hotu prontu servi ba povu”. nia haktuir

Iha fatin hanesan, Vise Presidente Gil Oan Soru hatete tinan 2022 povu lori ona Dr. Jose Ramos Horta ba Presidente Republika, tinan 2023 CNRT Prepara an lori Kay Rala Xanana Gusmão ba Promeiru Ministru

“Iha 2022, Kandidata Presidenti da Republika Dr. Ramos Horta, Kandidatu CNRT nian ita hot-hotu fo ita nian votu lori tiha ona Presidenti da Republika, ita prepara an lori Kay Rala Xanana Gusmão ba Primeiru Ministru”. Hatete Gil Oan Soru

Vise Presidente Partidu CNRT ne’e hatutan “tinan sanulu (10) CNRT ukun gasta osan 10 bilhoens sira barak dehan la halo buat ida, mais ukun tinan ne’en ne’e espesialmente oitavu governu gasta ona osan 11 bilhoens, maibe  estrada mos seidauk halo, Husu ba ita hotu matan moris neon nain, vota ba CNRT “.nia husu

Entretantu, Iha komisiu sira antes, Partidu CNRT promete wainhira manan sei dada kadoras greater sunrise mai Timor Leste, hodi hadia infraestrutura bazika, saude, edukasaun, agrikultura, turismu, kria kampu de traballu no lori povu ba moris diak, entre sira CNRT mos sei rezolve Fonterira Tasi no Terrestre ho nasaun vizinho Indonesia

Jornalista : Esmeralda da Silva