Hetan Dalan Ba Vitória ! Governu Satan Anita Nia Futuru
![](https://sapnewstl.com/wp-content/uploads/2024/07/IMG-20240709-WA0154.jpg)
Imajem: Entrevista estudante ISC Anita de Jesus Brito iha Jardim 5 maiu, Díli, 05/07/2024 Foto: Dircia Baptista Belo
SAPNewsTL, Díli – Estudante Institutu Superior Cristal (ISC) Fakuldade Siênsia de Saúde, Departamentu Parteira semester III, Anita de Jesus Brito senti la satisfaz ho desizaun IX Governu liu husi FDCH ne’ebé transforma bolsa hakbi’it ba bolsa parsial hodi halakon kustu de vida ba estudante ne’ebé kategoria kbi’it laek.
Relasiona ho IX Governu liu husi Fundu Dezenvolvimentu Kapitál Humanu (FDCH) nia desizaun ne’ebé muda bolsa hakbi’it ba bolsa parsial halo estudante Anita senti la satisfaz tanba nia nu’udar Ai-leba oan ne’ebé eskola dependente ba bolsa hakbi’it.
“Ha’u ho ha’u nia aman nia realidade moris ne’e hanesan ai-leba, ami rua luta atu hetan vitoria depois ami rua konsege hetan dalan ba vitoria ne’e, maibe vitoria ne’e seidauk konkista, governu hapara tiha bolsa hakbi’it ida ne’e ha’u la satisfaz, karik ita bo’ot hakarak hapara, hapara ida ne’ebé la hatene esforsu (valor ki’ik), la bele hapara ema hotu, tanba esforsu lubuk ida ne’ebé mak ami halo to’o mai faze ida ne’e sira hapara tiha sein ami hatene”.dehan Anita de Jesus ba jornalista SAPNewsTL iha jardim 05 de Maiu hafoin remata komunikadu imprensa, sexta-feira 05/07/2024.
Benefisiária bolsa ne’e hatutan antes sira atu hetan bolsa hakbi’it sira mos priense kriteria barak ne’ebe la haree kona-ba valor maibe liu husi xefe suku no xefe aldeia sira mak identifika katak sira mos merese hetan bolsa tanba la iha duni kbi’it no mai duni husi ai-leba nia oan hafoin husi nasional ba halo selesaun.
“Ami hakarak ita bo’ot sira mantein nafatin ami nia bolsa ne’ebe mak durante ne’e ami hetan hela, nune’e ami bele hala’o fali ami nia estudu ho di’ak, se ita bo’ot sira hapara ona bolsu estudu iha rai laran, ita boot sira mos tenki hapara bolsu estudu ba rai liur nian, nune’e la bele fó oportunidade ba oportunista nia oan sira hodi aproveita de’it”. Hateten Anita.
Estudante Anita informa nia valor semester I Index prestasaun akademika(IPA) 3,13,semester II (IPA) 3,45. Estudante Anita konsidera Governu hatudu inkapasidade tanba halakon kbi’it laek sira nia direitu hodi asesu ba bolsa hakbi’it tanba transforma bolsa hakbi’it ba bolsa parsial
”Ami nafatin organiza malu no mobiliza malu hodi luta kontra injustisa tanba ami nu’udar akademista ne’e mai para atu transforma sosiedade laos mai para atu uza poder hodi hanehan ema seluk nia direitu ne’e inkapasidade”.
Entretantu, antes ne’e diretor FDCH Julio Aparicio informa muda bolsa hakbi’it ba parsial ho razaun katak durante ne’e monitozasaun ho avaliasaun la’o la di’ak, ba siensias sosiais lolos ne’e prestasaun tenki 3,0 ba ezatas 2,75 tanba prestasaun la to’o nune’e maka muda maibe sei reve fila fali.
![](https://sapnewstl.com/wp-content/uploads/2024/07/IMG-20240705-WA00122.jpg)
Imajem : Diretor Ezekutivu FDCH Julio Aparício iha Salaun Delta Nova, 04/07/2024 Foto: Dircia Baptista Belo
Iha sorin seluk, Diretor Ezekutivu FDCH Julio Aparício hateten, transferénsia bolsa hakbiit ba bolsa parsial ne’e tanba sira halo ona monitorizasaun iha kada universidade no hetan ona dadus katak estudante befenisiariu balun la aproveita ho diak, nune’e lamentasaun estudante sira ne’ebe mak sei la asina kontratu FDCH sei hapara bolsa parsial.
“Ha’u halo monitotizasaun ne’e mak hetan dadus ne’e, ema seluk nia problema labele todan mai ha’u, sira nia problema bainhira sira la asina, ha’u sei hapara tanba ne’e sira mak hakarak,” Dehan diretor ezekutivu Fundo Dezenvolvimento Capital Humano Julio Aparicio, ba Jornalista sira hafoin remata worshop iha salaun Delta Nova,(04/07/2024)
Nia haktuir planu no programa ne’e governu nian atu hapara bolsa hakbiit maibe bazeia ba FDCH nia avaliasaun hapara total sei fó inpaktu ba iha estudante befenisiariu sira tanba ne’e mak halo transferêncsia bolsa habi’it ba bolsa parsial hodi selu estudante sira nia propinas.
“Nu’udar diretor ezekutivu ha’u luta mak daudaun sira hetan bolsa parsial ne’e maibe bolsa ne’e revoga katak la iha ona ne’e tanba bazeia ba avaliasaun ida, maibe FDCH no konsellu administrasaun sei hanoin katak hapara total ne’e labele tanba ne’e mak ami buka dadus no ikus liu ami transfere bolsa hakbiit ba bolsa parsial hodi selu sira nia propinas”.Nia informa.
Diretor ezekutivu salienta bazeia ba orsamentu ne’ebé mak prevé ne’e 500 Mil dolares, entaun atu responde ba estudante befenisiariu sira sei fó subsídíu 150 dolares kada tinan.
“Atu responde pedidu individual, bolsa parsial no bolsa rai liur nian ne’e 500 Mil dolares, entaun atu responde ida ne’e ami atu fó resposta ba sira supsidiu ba kada estudante ida ho 150 dolares iha tinan ida ne’e opsaun primeiru laos kada fulan, maibe tuir ami nia hanoin katak ida ne’e la responde estudante sira ne’e mak iha universidade privadu sira”. Nia deklara
Entretantu, antes ne’e estudante sira ne’ebe benefisiáriu bolsa hakbi’it liu husi komunikadu imprensa deklara sei la asina bolsa parsial tanba konsidera injustu.
Estudante benefisiáriu bolsa hakbi’it hamutuk rihun tolu resin tolunulu (3.030) mak hola parte iha bolsa refere.
Antes ne’e, estudante sira deklara sira nia parte sei halo asaun pasífiku hasoru governu tanba revoga bolsa hakbi’it ba bolsa parsial.
Jornalista: Conzita Mota & Dircia Baptista Belo